2009-04-30

لو كان الرسول موجود شقال عنهم ؟؟






حدس تهدد أحد المرشحين : اصمت وإلا قدمنا الشيك الذي وقعته وأنت سكران .



في كل يوم نجد عجب العجاب من كل مرشح وكل حزب في الكويت ، للأسف عندما أقرأ هذه الكلمات من جهة تدعي الكمالية في الدين وتطبيق الشريعة الاسلامية ، هل التهديد وعدم الستر على المسلم من تعاليم ديننا الاسلامي ؟؟

هل يُحلل كل محرم اذا كان لأجل حدس ؟؟؟


وهل شرب الخمر حلال عند حدس ، وحرام اذا تعرضت لأي تهديد من صاحب الكأس ؟؟؟




ونعم المرشحين السكيرييين ونعم النواب الافاضل أصحاب الأمانات .. ونعم الاستشراف والتعنطز على الاوادم ...





وداعا لمستقبل الكويت مادام يسكنها أصحاب الفضائح ، وفعل المحرمات لأجل المصلحة الشخصية .

ولكن أرسل رسالة اعجاب لحــــدس :



الدين أكبر وأكبر وأكبر من تصرفاتكم الي ينكرها الدين الاسلامي السمح ، هل الدين الاسلامي واسطة لكم لكي تنفذوا كل مآربكم التي تضُر الكويت وشعبها جميعا ..؟؟؟



ربما أكون صاحبة فكر ليبرالي بحت ، ولكني استنكر ما يقومون به من تشويه تام لصورة الدين الاسلامي والنفاق الغير طبيعي على الناس ، ولكن لم يُخلق الدين كي يستهزئ به هؤلاء .







الرابط



جريدة الشاهد




ــــــــــــــــــــــــــــــــــــــــــــــــــــــــــــــــــــــــــــ




الى متى ؟؟؟


الى متى لا يفرق الناس بين من ينتقد الدين ومن ينتقد الاشخاص الذين يتخذون من الدين واسطة لهم ؟؟

بصراحة اعرف ناس كثيرين ملتزمين بالدين أصحاب خلق رائع وجوهر أروع عندما أجد اسلوبهم الرائع وشعور بصفاء نيتهم ، عكس من يتكلم بالدين ويتصرف تصرفات لا تمت بالدين اي صلة ...

ومن جهة أخرى هناك الكثير من الناس من يطيع علماء معينيين حتى لو كان حديثهم يخالف حديث الرسول عليه افضل الصلاة والسلام ، الدين الاسلامي ليس معقد و لكن هناك من الفتاوي ماتخاف العقل والدين ، فهل لأن صاحب الفتوى ذو لحية طويلة وثوب قصير أتبع كل حرف يقوله ؟؟؟






2009-04-29

كــــل عام ومدونتي مخرفة !!!!





الله بالخير


عيدج مبارك يامدونتي لوووول

اليوم مدونتي الغالية تكمل سنتها الأولى ، بصراحة حسيت ان مدونتي مثل ماتقولون طفلي الأول لوووول ، وايد أحبها حدي ومستانسة حدي لأنها كملت سنتها التخريفية الأولى ، وأتمنى السنوات القادمة تكون مخرفة بزود وزود يارب وتكون من المدونات المعروفات لووول .. اقعد عاد باجر الشركات تركض ورا مدونتي يترجوني اسوي لهم دعاية لووووول ..




أقول حق كل الي عاتبني من خلال المدونة أو غيرها ، سامحوني أيام امتحانات وحدي مالي خلق لا حق انتخابات ولا حق زنة ورنة ولا حق اي شي ثاني ، والبلشة لمن اشد حيلي وبيوم الامتحان ازفت .... منو داعي علي اعترفوا خلصوني :@؟؟؟؟



في مواضيع شكثر بخاطري اكتب عنهم صراحة ، بس لضيق الوقت والامتحانات واليوم كان عندي امتحانين شقاقييين والله العظيم اني طلعت من الامتحان مثل السكرانة ، فصلت حدي لدرجة اني رديت البيت نمت بهدومي وعفستي وتوني قاعدة وحدي مالي خلق بخلص عفستي وارد انام :)




أحب أقول لكم اني ناطرة من الحين الهدايا حق مدونتي والي اهي طبعا لي لووووول بس مابي ورد رجاء






سؤال حق بوراشد .....

منو بوثالث ؟؟؟ وأنا مو كشة انا بطة :( لا تحبطني والله قاعدة اجيك على كشتي لوووول




ــــــــــــــــــــــــــــــــــــــــــــــــــــــــــــــــ


باباي اليوم : لووووول هذي الحلقة من تيمون وبومبا كنت اشوفها مع عيال اخوي لمن كانوا صغار قدا قدا .. فكنا لمن تخلص نرد نعيدها مرة ومرتين وعشر ، لدرجة اني حفظت النص كله ، ومع اني اعرف اقلد اصوات .. احم احم يقعدون اليهال جدامي واسوي لهم الحلقة كلها بصوتي لووووول وشوفوا الضحك خاصة سريع الاهبل .. حدي قلدته واهم يضحكون علي ، احسهم يقولون شهالعمة المخرفة ؟؟



.



2009-04-24

زين بس فكونا من نفاقكم ...







الدائرة الخامسة وما أدراك ما الدائرة الخامسة :)



امتلأت الشوارع ببنرات المنافقين :) سبحان الله مايشكرون فلان الا قبل الانتخابات :) اوكي فلان خدمك اشكره أو اذكر خدمته بين الناس ماله داعي تسوي بنر شكبره شعرضه تقول (( من لا يشكر الناس لا يشكر الله )) كلنا ندري ان اشخاص كثر يساعدونا مو علشان سواد عينا علشان صوتنا وبس ..


انترست الشوارع ببنرات عزايم على عشا وغدا ، والناس الي تنافق بعضها شكر لفلان وشكر لعلان ، ليش مانشكر فلان لأنه قدم خدمة للكويت ؟؟؟ ليش نشكره لأنه ساعدنا احنا بس؟ ؟؟

شنو سووا فلان وعلان للمشاكل الي بالكويت ؟؟؟

اكثر مشاكل يهايط فيها المرشحين هي :

المال العام

اسقاط القروض

الجناسي المزدوجة

تجنيس البدون


وغيرها من هالمشاكل الي ما انحلت ، على شنو يقولون احنا وقفنا وتكلمنا ترى أقدر أوقف وأقول المال العام وفلان يقدر وفلانة تقدر شنو يعني ؟؟ هذا مو انجاز يا حضرات المرشحين ..
لمن يطلع لي كل واحد بعناوين حملاتهم الانتخابية الي اضحك عليها ، يحسسوني ان الكويت كلها خراب ودمار واهم بيبنونها من يد ويديد .


ولا البرامج التلفزيونية الي كل واحد يطلع يتناجر مع الثاني وانت شسويت وانت شعملت ؟؟ احنا شكو فيكم تهاوشوا بعيد عنا رجاء بس خلونا بالهدف الي شايلونه من مخوخ الناس ...


ليش التشتيت ؟؟؟


يقول لك القبيلة الفلانية اتحدت مع 3 قبائل أخرى ... يا سلام زين ليش ماتسوون خير وتتحد كل القبائل علشان الكويت ؟؟؟

ليش أحط مصلحتي فوق مصلحة الديرة ؟؟؟ اذا خدمني فلان اليوم باجر بيعطيني بيقولون لي انا داش بس علشانك انت ؟؟ مطالبنا ماراح تخلص .


تعلمنا بديرتنا أن مثل ما فلان وراه واسطة وعلان ممشي اموره لازم احنا بعد نضبط لنا جم شخص مثل فلان وذلك عن طريق اعضاء مجلس الأمة ، كيف يا طموحة ؟؟؟


عضو مجلس الأمة :

_ يحقق لك امنياتك ويوفر عليك قيمة الغداء والعشاء بالأكل في بوفيهاته .

_ عضو مجلس الأمة يفكك من القوانين الي وضعتها الدولة ويوقف في وجه القانون كي يحقق مطالبك .

_ عضو مجلس الأمة يجعل من الحكومة كرة في يده فيقول لك لا تخاف حكومتنا ضعيفة احنا نمشيها مو اهي تمشينا .

عضو مجلس الأمة يحاول قدر الامكان من تحقيق مطالب قبيلته أو عائلته قبل اهل ديرته .

_ عضو مجلس الأمة يحافظ على المال العام بأن يهدد فلان وعلان كي يسكتوه بجم بيزة .

_ عضو مجلس الأمة يفرض وضع القوانين الدينية في بلد دينها الاسلام .

_ عضو مجلس الأمة يصارخ في وجه فلان وعلان ، ولا يطبق المثل الي يقول (( لو كان بيتك من زجاج لا ترمي الناس بحجر )).

شنو بعد ؟؟؟؟ مامليتوا ؟؟؟


أعضاء مجلس الأمة الي كانوا في الدائرة الخامسة اهم اهم ماراح يتغيرون علشان جذي بحرق صوتي الي ماراح يأثر بالنتيجة لوووول ...



وحدة من الناس كانت عندها واسطة توظفها بس حل مجلس الأمة قعدها في البيت فملت من حياتها .
وين الكفاءة ؟؟؟ وين الحكومة الالكترونية في التوظيف ؟؟ وين واسطة الشهادة ؟؟؟ ولا ديرتنا تعتمد على واسطة مجلس الأمة بس ؟؟؟

والله كرهت شي اسمه انتخابات ... شنو هالحياة الصعبة ؟؟
ديرة توقف كل دوائرها ومؤسساتها علشان جم عضو تهاوش مع الثاني وهددوا الحكومة وكل شوي طالعين لنا بتهديد باستجواب !!!!!



الله يرحم حالج ياكويت !!!!


كل واحد يردد حبج ياكويت .. ويقول ماراح انجز الا لمن امسك منصب .... الي فيه خير لديرته ينجز بدون انتخابات ولا عمات عين ..



بطوا خشمي والله












درب الألــــــــــم

2009-04-21

غازلني وأغازلك !!!






هذا موقف صار أمس بس لا تضحكون وابي تعليقكم اوكي على موقف هالبنت وهالشاب :)



قامت ثلاثة من الصديقات بالذهاب لشراء الغداء قبل المختبر وكانوا حدهم (( جوعانيين )) المهم طلبوا اكلهم واهم رايحين الجامعة قاعدين ياكلون اكلهم بالسيارة من كثر الجوع ( أهم شي شلون قلبت من الفصيح للعامي ... ورووووح ) فماكان في وقت وقاعدين ياكلون ، المهم واحد من الشباب طبعا قاعد يغازل وغصب يبيهم يردون عليه ، فالي قاعدة جدام قاعدة تاكل بشراهة ولاعت خشمها من الصبي فقالت لرفيجتها : هشييييه هذا لوع جبودنا مانقدر ناكل !!!


2 _ شسوي له يعني خل اهو يروح .
والي قاعدة ورا رقم 3 _ تقول له لالا مانبي روح .

المهم يا جدام وقعد يحدهم ، فوقفوا عند الاشارة ولا يصرخ بحاجييج شوي ، جان تفتح الدريشة الي جدام ...

1_ مانبي نكلم اخوي خلنا نكمل غدانا لوعت جبدنا .

اهو : شوفي بعطيكم الرقم واي وحدة تدق بكلمها .

1_ اسمح لي اخوي بس لا تقزرها على نفسك .

اهني الصبي عصب : شهالاسلوب ؟؟؟ شهالاسلوب ؟؟

اهي : شنو قلت شي غلط اخوي ؟؟ سبيتك ؟؟ قلت لك لا تقزرها على نفسك انت ولد ناس ومحترم عيب تحط نفسك بهالموقف ، أنا ما أرضى أخواني يغازلون بنات بالشارع وجدام خلق الله هم ما أرضاها عليك .

اهو : أقول حطي على المارينا اف ام حاطين موضوع عن المغازل يالله باي .



وراح



.....................................

@@

انا الي باط جبدي ان البنت تكلمت باحترام ورد عليها جذي عيل لو سابته شسوى ؟؟ الحمدلله والشكر ومن هالمنطلق بتكلم عن موضوع المغازل ..


الشباب تلقاهم تارسين السوق ووقت الاذان مايروحون المسجد .

شنو المفيد بالسوق غير المغازل والترقيم ؟؟؟

متى يجتمع الكويتيين من بدو وحضر وشيعة وسنة ؟؟؟؟


في السوق !!!! @@

شدعوة !!!! شنو ماكو شي مهم يا جماعة الخير ؟؟ لهالدرجة المغازل والسوق و24 ساعة بالافينيوز والمارينا على المغازل بس ؟؟؟


بتكلم من ناحية الشباب لأن البنات شي طبيعي حبهم للسوقة ... والهبات لووول

ضيع وقته بالتكشخ والتعطر ..

دق على واحد من ربعه مرني البيت خل نروح السوق الفلاني ...

رفيجه ضيع بنزين على روحته لبيته ..

والثاني هم كاشخ ...

ركبوا السيارة وطقوا طريج ومسرعين وسب بسيارات خلق الله ولا تحدني ولا احدك !!!! ونطرة فوق الساعة بالمصافط خو زحمة شفيكم اول مرة يروحون سوق !!!

ويلقون مصفط بالغصب وينزلون السوق وابتدي المغازل وآخر اليوم يشوفون حصيلتهم من الارقام !!!

شهالحياة الصعبة ؟؟؟؟:(










كيفهم بس مو ملل ؟؟؟






ـــــــــــــــــــــــــــــــــــــــــــــــــــــــــــــــــ



سؤال من العزيزة bunch of thoughts

تقول بسؤالها والي يبي يجاوب خل يجاوب :)


سؤال للشباب ... شنو تسوون لمن صج تعجبون ببنت ؟؟
@@
هذا اللنك حق الي يبي يجاوب
http://just-a-bunch-of-thoughts.blogspot.com/2009/04/how-does-kuwaiti-guy-show-he-likes-you.html


بجاوب لو كنت شاب لوووول : بصارحها باعجابي واقول حق كل اهلي لووول واسأل عنها واذا كانت خوش وحدة اتزوجها اذا كانت طموحة وابعد الشياطين لووووول اووووف والله لو كنت ريال جان كل البنات حبوني لوووووول




ـــــــــــــــــــــــــــــــــــــــــــــــــــــــــــــــــــــــــ



اليوم يت لي وحدة من رفيجاتي وقالت لي : سارو ابيج ترسمين لي رفيجتي واعطيج حقج ..

أنا : أي حق ؟؟!!!!

اهي : يعني اعطيج سعر الرسمة @@

أنا : شكو ؟؟ أول شي أنا ما أبيع رسوماتي ، ثانيا انتي رفيجتي عادي وثالث شي انا مو محتاجة فلوس .

اهي : سارووو انتي خبلة ؟؟؟ كلهم يبيعون رسوماتهم لا تصيرين هبلة .


هذي ثاني وحدة تقول لي جذي بعد أمي ...


مادري احب ارسم علشان الناس تشوف مو علشان ابيع فمادري انتو شرايكم ؟؟؟




ــــــــــــــــــــــــــــــــــــــــــــــــــــــ


همسة :

حق فزاع الهندسة : مو جذي تفشلني جدام خصمي ...بس هين والله أوريك وياويلك ان علقت على موضوعي هذا لووووول بس خل يوصل لك هالتهديد من مدونتي لووول

لزميلة في كلية العلوم

اهلها خذوا لاب توبها علشان تدرس وتقول لي كل يوم شنو نزلتي بمدونتج لوول أقول لها ، مدونة تخاريف موجودة لووول ودرسي ابرك من هالمدونة وعندج سويرة تخرع على راسج كل يوم بالكلية شتبين بعد ؟ لوووول






حدي مستانسة هالايام الحمدلله ادعوا لي عندي امتحانات لوووووول



ـــــــــــــــــــــــــــــــــــــــــــــــ



أحبكم وايد يا بعد خشمي والله

i love you all , after my nose wala












خليط من التخاريف!!!!




وأخيرا :)

بعد أكثر من سنة كاملة تم اعتماد النادي الجيولوجي رسميا في جامعة الكويت .




1_ تنظيم لقاءات تنويرية للطلبة المستجدين في القسم .

2_ تعريف الطالب بمجالات العمل المستقبلية .

3_ تشجيع الطلبة الجيولوجيين على الابداع والابتكار .

4_ المساهمة في ايجاد حلول لمشاكل طلبة قسم علوم الأرض والبيئة.

5_ التعاون مع الشركات والمؤسسات لعمل دورات تدريبية للجيولوجيين .

6_ توثيق العلاقة بين الطلبة وأعضاء هيئة التدريس عن طريق الندوات والرحلات.






المشرف العام :

د. عرفات الشعيبي
د. زينب المسلم




رئيس النادي : سعد الرشدان


نائب رئيس النادي: سارة النومس

أمين السر : محمد صادق بوعباس


أعضاء لجنة الأنشطة والبرامج :

معاذ القعود ، حوراء أحمد ، صباح ، بدرية المحيسن ، عمر الشمري ، ايمان حسين



أعضاء لجنة شؤون الطلبة :

عبدالعزيز الهولي ، عذبي السلطان


أعضاء اللجنة الاعلامية :

عشبان المطيري ، مريم المياس


أعضاء لجنة العلاقات العامة :

فجر الشراح ، لولوة المجرن ، سارة النومس ، حنان الحسن .




ــــــــــــــــــــــــــــــــــــــــــــــــــــــــــــــــــــــــــــــــــــــــــــــ



ماذا جرا يا طموحة ؟؟؟



اليوم كان في بكلية العلوم معرض حق الاقسام العلمية وفرص العمل ، المهم وكان مقرر علي اني احجي بالمايكروفون مع اثنين من الزملاء عن قسمي ، وقالت لي الدكتورة شنو راح اقول ، المهم تكلموا ولمن يا دوري قلت شي غير الي قالته الدكتورة وحدي اشتطيت ... امبي انا قاعدة اتكلم وبداخلي اقول : يخرب بيتج شقاعدة تقولين ؟؟
حدي تكلمت عن الكويت وشنو دورنا لوووووول الي موجودين قعدوا يضحكون علي ، واحس بداخلي ودي اقول عاشوا عاشوا طقاقة مو سارة .... لمن خلصت ولا يصفقون حييل لووووول واحد من الحضور لمن خلصت قال لي اذا نزلتي المجلس بصوت لج لوووووول .



ـــــــــــــــــــــــــــــــــــــــــــــــــــــــــــــــــــــــــــــــــــــــــ





تحلطم



فوق التعب واليوم رادة البيت 6 باجر دوامي من 8 الصبح لل7 بالليل @@ بعرف انا شسويت بحياتي علشان هالشقى والتعب هذا كله ؟؟؟ كل هذا علشان احب العلوم ؟؟؟ من الحين باستغل كل دقيقة انام فيها لوووول







ــــــــــــــــــــــــــــــــــــــــــــــــــــــــــــــــــــــــــــــــ







وصلني ايميل صور فنانات اول شلون كان شكلهم ، ويضحكون عليهم !!!

أنا اذا حطيت صور يديدة لي وصور قبل جم سنة بضحك على شكلي والله ..


يعني خل نكون واقعيين يعني بتقنعوني ان كل البنات الي الحين جميلات خلقة ؟؟؟

قليل من البنات الي يكونون حلوين من صغرهم يعني ماله داعي نضحك عليهم ونتشمت ....




ــــــــــــــــــــــــــــــــــــــــــــــــــــــــــــــــــــــ

.

.


بعــــــــــــــــــــــــــــــد خشمي والله
...
...
...
After My Nose Wala



2009-04-20

هذا لعبنا ولا تقول استهتار .....!!!!!

السلام عليكم ورحمة الله وبركاته




تحذيربــــــــــــــــــــــــــــالغ الأهمية ..


..



..



..




اذا كنت تقرأ البوست وأنت تأكل فأنصحك بقرائته فيما بعد لأنه راح تلوع
جبدك ....!!!!!!!


انا حزرت ....


..




..





























..


..



..




..




..





..



ياجماعة الخير اليوم رديت البيت متأخر كعادتي من الخالدية للصباحية طالعة الساعة 5 رادة الساعة 6 شهالملاقة ؟؟؟
المهم وقعدت مع الأهل شوي ولا غداهم كالعادة عيش و (( دجاج )) قلت خل اطلب شي خفيف وكعادتي ما أتعامل الا مع سب وي وأقسم بالله العظيم أنه آخر مرة أطلب منهم عمى بعينهم .



يا ناس الصمونة ريحتها مقرفة قلت شالسالفة ؟؟؟؟


بطلتها وللحين لايعة جبدي والله



يليت شفت فيها صرصور شكبره عادتي مو مشكلة عندي حشرات نعمة ....



يليت شفت فيها شعرة هندي طايحة ...


ماراح اقول شنو فيها علشان لا تلوع جبودكم بس أقسم بالله اني ما تلوع جبدي من اي شي لاعت جبدي من الي شفته ...

دقيت عليهم وسفلت فيهم تسفل ، ويابوا لي صمونة يديدة ماكليتها طبعا يخرب بيتهم .... طلعت قلت له اخذ الصمونة ودها عندهم خل يشوفون شنو فيها ولا يقول لالا مايبي ومشا مشت عليه سيارة محروقة ....










ويـــــــــــــــــــــــــــــــع



ويــــــــــــــــــــــــــــــــــــــــع هذا وباجر عندي مدتيرم ومادرسته تحطمت والله بجيت من لوعة الجبد والله






وأعلن من اليوم في مدونتي ..... أني أنا الي راح اسوي بنفسي غداي وعشاي لا مطعم ولاهم يحزنون ....
ماراح آطلب مرة ثانية الله يخلي توست الجمعية مو مشكلة حتى لو جمعية الصباحية الزريبة أهون من الي شفته ، ومرتديلا ونروح الجبرة (( الشبرة )) ايييب لي خضرا من هناك لا بارك الله بهالمطاعم الخيخة ....








احس انه حلم خايس والله عاد كافي اليوم حلمانة اني متكافخة مع واحد لووووووووووول يمكن هذا تفسيره .... ويع ويع ويع



والله لو يحطون لي صحن دود وزهاوية حييين آكلهم ولا آكل هالشي ........






ادعوا لي حق امتحان باجر :(





كنت حاطة ببالي ما اكتب شي اليوم بس الي صار فتق جروحي وقلب مواجعي ياناس .....



وظليت أطق على الراس ...... هجع هجع هجع

2009-04-18

تخاريف تتحلطم







وصلت لي هالصورة وحدي ضحكت هذي الصورة التقطت في منطقة القادسية لوووول ويبيله نسوي تغطية حية ونسأل سكان القادسية شنو كان شعورهم بقدوم godzila وشمعنى ما يا عندنا بالصباحية جان قحصنا شوي ودوخناه لووووول ...



ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ


هل الحل بالحرب ؟؟؟

ياجماعة الخير ، في ناس من الناسات تشوفني طيبة وعسى ما سارة ساعدينا بجذي وبجذي واقول لهم ان شاء الله وحاضرة على بالهم خبيلة وينقص عليها بسرعة ، الي يقعدون سارة وعندها معارف وواسطات ولمن يخلصون مني ينقلبون ضدي وسارة ماسوت شي وسارة مانبيها مو علي انا هالحجي اوكي ، والي اييون لي كتبي المقالة الفلانية لنا وراح نذكر اسمج فيها بالأخير يحطونها تحت اسم فلان الفلاني مو علي هالحجي ، وفوق هذا كله تييني اتصالات فوق شينهم قوات عينهم ، للحين يتمصلحون ، أقول لهالفئة عيب وماعندي فيها اقلبها هوشة وحقي محد ياخذه مني والي يبيني انسحب من مناصبي (( الله يالمناصب )) أقول لهم روحوا شربوا من ماي البحر قاعدة على جبودكم لوووول ...
اخيس شي عندي لمن اتعب واوصل لشي بمجهودي واييون ناس يحفرون لي علشان ربعهم !!!!!
الي يقهرني لمن اتعب واشتغل علشان مصلحة الكل والقى اغلبيتهم يفكرون بنفسهم ... والله عيب


ـــــــــــــــــــــــــــــــــــــــــــــــــــــــــــــــــــــــــــــــ
















اخييي فصلت على هالاغنية والله ، بس الفيديو مالها رايح فيها ويعور الخشم لوووول فقلت احطها لكم من اليوم اغنيها حدها شي ، اخييييي في واحد يشابه انريكي ؟؟؟ هالريال معذبني لوووول شحلاته اتنح على شامته الي شالها مالت عليه لووول








ــــــــــــــــــــــــــــــــــــــــــــــــــــــــــــــــــــــــــــــــــــــــــــــ





التقيت بأحد العاملين في شركة المباني ، فقلت له شكثر أكره الافينيوز وضحك علي جان يقول لي ان عندهم مشاريع بكذا دولة غير الكويت ، واستانست على افكارهم بصراحة شي طيب افكارهم جان يقول لي آخر شي يالله روحي الافنيوز علشان خاطري لوووول جان اقول له : انا بروحي اكره السوقة ماروحها الا لبغيت شي واطقطق بسرعة بسرعة وارد البيت تقول لي روحي الافنيوز زحمة وكل الكوييتيين هناك على شنو ؟؟؟ علشان يفترون ؟؟@@

ولا رفيجتي تقول لي مالج خلق تمشين رياضة @@ والرياضة ماتحلى الا بالافينيوز ؟؟





ــــــــــــــــــــــــــــــــــــــــــــــــــــــــــــــــ


يقول لكم في شباب بالكويت قاعدين يتحلطمون على بنات الكويت : رايحات فيها !!
أغلبهم (( طووووووووووط )) كلش ما عنده خوات لا تخافون ..
فيهم فيهم فيهم فيهم فيهم
وآخر شي يروح عند جم ديرة من الديار الي حلال عندهم الفصاعة وبتزوج وحدة من هناك ... وعاش عاش

هذا واحد سلمكم الله كان خايف على حلاله فقال الكويتية تاكل حلالي وبس تتطلب وتعور راس الواحد ، قولوا شسوى ؟؟؟

تزوج لبنانة أكبر منه ب15 سنة مطلقة و عندها عيال كبار ، سجل حلاله باسمها وشرا لبناتها كل وحدة سيارة آخر موديل و عماراته ومشاريعه كلها باسمها ، يعني خرفنته عدل ، بعدين تطلقوا وطلع حافي منتف مايدري شيسوي ؟؟ فترجاها ان ترد له وردت له بس طبعا اهو الي عايش على أفاها لوووول استغفر الله اللهم لا شماته
بس لو بنت ديرته اهي الي مخرفنته وايد اهون لوووووووول


سارة بسج ... المشكلة اعرفها اللبنانية صج مهتمة بنفسها بس عيوز يحليلها ، وكله شو سارة مابدك تتجوزي ؟؟




وعاشت الخرفنة .... أغلب البنات الحين يدورون على واحد يخرفنونه .... راح زمان الاحترام والله راح ... :(



ترا مو كل الشباب علشان لحد يزعل علي بس خل نكون صريحين مثل ما في بنات خروفات هم في شباب جذي واغلب الي مروا علي يقولون هالكلام ؟؟ خرفنته خرفنتها حتى الشباب بينهم وبين بعضهم يالخروف ، والي يقول خروف مرته ليش تبون تشوهون سمعة الخرفان ، ترا لولا الخرفان ما استانستوا بعيد الأضحى @@ <<<<< سارة متى تخلصين ؟؟؟ ـــــــــــــــــــــــــــــــــــــــــــــــــــــــــــــــــــــ ... ... وفي الختام أقول لكم الف تحية وشكر لكم والله ماعندي موضوع وقاعدة احاول اعصر مخي شقول وبعد جم يوم مدونتي راح تكمل سنة فديتها والله ويليت الي عنده افكار حق رسم كركتيري مايبخل علي لأني محتاجة بجد بجد ... سويت كذا وحدة عن المجلس وقاعدة اصيد على المرشحين الي كل واحد مسوي من نفسه سوبر مان ... واسوي رسومات بس هم ابي :)


نشوفكم على خير وخيرات :)



بايات

2009-04-17

برحيلك يا أمي !!!







فُقِدَتْ رئتا المنزل
وعمّ الهدوء في أرجائه
..
..
آه يا أمّــــــــــاه
كم فاجأني غيابكِ
وآلمني فقدانكِ
وأحزنني بكاء الطفل بعد ذهابكِ
اشتقت لاستنشاق عطرِ أنفاسك
..
..
اشتقت لوجنتيك حين أقبلها
اشتقت لندائك يابني ياحبيبي
اشتقت لدعواتك لي حين اذهب وأعود
كم هو بائس ذاك المنزل دونك
كئيبة تلك الحيطان بغيابك
..
..
..
ذاك الطفل يرى دمعتي ولا يعلم
ماهو يحزنني
أنه بانتظارك
يفتقدك
مشتاق اليك
كما أنا مشتاق إليك
..
..
..
أسألك يا الله أن ترحمها برحمتك ..
وتسكنها فسيح جناتك
وتجعلها من نساء الجنة يارب
وترفق عليها بحنانك يارب
يارب قد فقدنا عطفها
فلا تحرمها من عطفك يارب
يارب منا الدعاء ومنك الاجابة فارحم موتانا يارب واسكنهم فسيح جناتك ..
..
..
..
كلمات بسيطة كتبتها لأنسانة وددت أن أحادثها وأجلس معها ، كنت بانتظار شفائها حتى أزورها وأكلمها ، أحببتها قبل أن أراها وكم تمنيت مقابلتها ولكن ،
ولكن شاء الله ان يرحمها
إنا لله وإنا إليه راجعون ..
اهدي خاطرتي البسيطة للعزيز عبدالله العتيبي على فقدان والدته الغالية أسأل الله المولى عز وجل أن يجعله آخر الأحزان يارب
ـــــــــــــــــــــــــــــــــــــــــــــــــــــــــــــــــــــــــــــــــــ
خارج الموضوع
استغفر الله قاعدة اكتب الموضوع ابي اركز موقادرة يايني بفاق وبصراحة تطلع مني بصوت يضحك فاليهال مسطرين جدامي ناطريني كل ماطلعت ضحكوا فكلش مو قادرة اركز بزفرهم الحين ...
اطقهم ؟؟؟
..
...
.....
سي يو ببوست يديد ان شاء الله
لا تنسون موتانا بالدعاء

2009-04-15

كل ماسمعوا تحلطم قالوا هذي سارة :p



المفروض يكون البوست معصب شوي بس حطيت صورة ام علي علشان تمتص الغضب عندي :p

في يوم من الأيام رحت حق شركة من شركات الاتصالات في الكويت ولأن الشركات كلش كلش ما تبوق وتخاف الله بالناس وكلش ما تستغفل عزيزها العميل ... فكان لي حق من هالشركة نقعوني 4 شهور بدون اي رد ، وأخيرا داقين اختي دفعي فواتيرج الحين ، كان عندي خط فواتير باسم الوالدة وهم رفيجتي خطها بإسم أمي ، فرحت معاها حق الفرع الرئيسي علشان ندفع الفلوس ومرة وحدة نشوف هل راح يردون حقي من غلطة الموظف ام راح يقطوني على صخر ؟؟

دشيت مع صديقتي المبنى ولا في الاستقبال 3 موظفين يستعبطون على بعضهم الحمدلله والشكر قلت لواحد منهم :
انا : لو سمحت أخوي أنا ياية أدفع فواتيري وعندي موضوع مقدمة شكوى من قبل 4 شهور محد رد علي .
الموظف الخبل : الخط باسم منو ؟؟
انا : اهو خطين باسم الوالدة وهذي بطاقتها المدنية .
خذا البطاقة وقعد يقرا اسم الوالدة بصوت عالي ، أنا حدي تنرفزت ... جان يقول : هذي اختج ؟ ( عن رفيجتي )
أنا بعصبية : اي لو سمحت لا تضيع وقتي .
الموظف الخبل : هذي أمج وأمها ؟؟ حدكم ماتشابهون بعض وبعدين اسم الاب بالبطايق يختلف ؟
أنا : والله يختلف ما يختلف مو شغلك بتخلصنا ولا لأ ؟؟

اهو : أمج موجودة بالكويت ؟؟
أنا حدي عصبت شوي واطقه : شلون يعني ؟؟؟ بتفتح تحقيق ولا شنو ؟؟؟ شهالاسلوب الزبالة انتو منو حطكم هني ؟
صج ماتستحي على ويهك هات البطاقة خلصني انا الغلطانة ييت هني .
واحد من الموجودين : لو سمحتي هدي اعصابج رفيجنا هذا يحب يتغشمر .
أنا : نعم ؟؟!!! لفيش يعرفني ؟؟ أعرفه ؟؟ يتغشمر موعلي أنا زين؟؟ وبطاقة امي ماراح اخليها بايده !!
اهو :ماعليه البطاقة بتصير عندي مو عنده حاضرين انتي تامرين .
والموظف الخبل قاعد يتحلطم مالت على الي حطهم بس حسيت مسويين كاميرا خفية والله ، المهم رحت فوق علشان اشوف شسالفة الشكوى الي ماراح تخلص وأخيرا ، حقي ماراح يرد وحقهم بياخذونه كامل فقر ان شاء الله يصكهم وحدي خنقتني العبرة مسكت البجية يعني مو انا الغلطانة واهم يدرون وفوق هذا خلوني ادفع فلوس اهم الي حطوها براسي انا مالي دخل فيها .
وقلت لرفيجتي والله ان طلعت والمهرج الي بالرسبشن قال شي والله ابط راسه اطلع حرتي كلها فيه .
رفيجتي : سارووو شفيج خل يولون واهو خل يولي انا باخذ البطاقة منه ماعليج .
واحنا طالعين خذت البطاقة وانا مشيت يقول مشكورين ويعطيكم العافية وانا حقرت لأني ان رديت راح امسح فيه الأرض .





شهالبوقات ؟؟؟ المشكلة بالجرايد فاضحينهم وفوق هذا للحين يبوقون ..!!! بعرف شنو يعني هواية البوق صارت عند اغلب الشركات ولا شنو ؟؟؟



عزيزنا العميل ، شركة البوق ترحب بك .. فان كنت راغب في الاكمال معنا فأهلا وسهلا وان لم ترغب فالباب يوسع

جمل لن تؤثر على ميزانية الشركة ، مع ألف سلامة .. طووووط طوووووط طوووووط طووووووووووط





ـــــــــــــــــــــــــــــــــــــــــــــــــــــــــــــــــــــــــــــــــــــ

تصبحون على خير









2009-04-14

مجتمعي العزيز .... أنا مطلقة ..!!!



بسبب ضعف المناعة لدي شعرت بمرض شديد وذهبت للمستشفى كي ترحب بي الأدوية والاكسجين والمكوث في المنزل يوم كامل بدون دوام ولا خروج والمرض يشتد علي فأقاومه بالنوم ... هذا أنا ... في كل كورس دراسي أوقع على مرض غريب يحل بي ... وأنا في فراش المرض فكرت بكتابة هذا الموضوع وبعد حديث مطول مع نفسي قررت أن أكتبه في مدونتي كي أناقشه معكم :) فما رأيكم .. ؟؟!!
الموضوع الأول :
ليس كل رجل دين منافق !!
بصراحة مرت علي لقطات كثيرة من المسلسلات العربية التي تعرض لنا صورة الدين بشكل خاطئ وتصوير من التزم بالدين وأصبح أكثر حرصا على الصلاة والتقرب لله أنه معقد مختل عقليا ، عاق بوالديه ودائما ما أجد تصوير الأهل بأنهم يائسون منه فهو من يضرب أخته ويصرخ بوجه والديه ، والعكس غير صحيح ، كثير من الملتزمين أراهم أطيب الناس ، فالحق لابد أن يُقال لماذا يصوروا لنا الدين بأنه معقد ومن يتبع الدين بالشكل الصحيح يصبح ارهابي كالذين نراهم في المسلسلات المصرية ، ومعقدين في المسلسلات الخليجية ، نعرف بأن كثير مِن مَن يدخل الدين لأجل مكتسباته الشخصية ولكن ليس كل من التزم يصبح منافقا للناس ، وكفى يا وزارات الاعلام تصوير الدين بشكل غير لائق أصبحت الدول الأجنبية تدافع عن ديننا نحن وهنا نجد من يجعل الناس تفر من الدين ، يعجبني ذاك الفلم الأمريكي الذي يصور الزنجي وهو يقتل ويسرق وعندما يُسجن مع رجل مسلم ويتعلم منه الاسلام والاخلاق السامية ليخرج من السجن ويربي ابنه على الخلق الحسن ولدينا هنا من يصور المسلم بأنه ارهابي معقد جاهل ، سحقا لكم يا جهلة فلم أجد أجهل من الاعلام العربي .
ـــــــــــــــــــــــــــــــــــــــــــــــــــــــــــــــــــــــــــــــــــــ




الموضوع الثاني :
مجتمعي العزيز .... انا مطلقة !!!
موضوع الطلاق مللت منه في جميع مراحل دراستي ففي كل سنة في امتحان اللغة العربية نرى : اكتبي موضوعا عن الطلاق !!! وتحدثي عن تأثيره على المجتمع ..
حسنا كان ذلك في مرحلة لم اكن اعلم فيها عن المواضيع التي تحدث في مجتمعي ، فاكتب عن الطلاق بصورته السلبية ومن وجهة نظري المحدودة جدا . ولكن اليوم أقف لأضع يد الاتهام على (( بعض )) المطلقات وعلى المجتمع وعلى الرجل بشكل أكبر .
ولا أريد الخوض في مواضيع المذاهب من ناحية زواج المتعة أو المسيار أو العرفي أو أو أو أو .... فهم في وجهة نظري جميعهم (( بــــاطل )) من وجهة نظري لأني لا أرى المرأة أداء متعة حتى ولو قالوا لي بأن المرأة بحاجة للجنس ، نعم هي بحاجة للجنس وبنفس الوقت هي بحاجة لرجل دائم ولأبناء يرعونها مستقبلا .
أعود مرة أخرى ، ولأتحدث أولا عن المرأة ، أرى كثيرا من الفتيات اليوم على اقبال شديد للزواج بسبب : قلة الرجال ، حاجتهم للجنس ، اجبار الاهل للفتاة على الزواج ..... الخ
وجميعها أسباب غير مقنعة بالنسبة لي بصراحة ، فجميعها أسباب تافهة ، ليحدث بعد ذلك بفترة قصيرة الطلاق .
ودائما وأبدا ومهما حدث في الطلاق فنسبة 90% من أسباب الطلاق برأي المجتمع هو المرأة ..
حتى ولو كان الرجل :
1_ يسكر ويزني ويلعب القمار ..... فهي السبب
2_ لا يحترم الحياة الزوجية ولا يحترم المرأة ...... هي السبب
3_ أهله دائموا الشجار معها ومسببوا الخلافات بينهم ..... هي السبب
4_ يريد امرأة متحررة جدا أو ملتزمة جدا ...... هي السبب
5_ تزوج 4 ويرغب بالمزيد فطلقها حتى يتزوج وينفذ ما أمره به الشرع ..... هي السبب
وبعد ذلك يتزوج ذلك الرجل ويبدأ حياته من جديد ، وتبقى تلك المرأة عار على المجتمع فهي ( مطلقة ) ولايحق لها أن تفتح فمها بشيء ، نعم الدولة لم تقصر بحق اي مطلقة ولكن المجتمع قد قصر بحقها من الناحية النفسية بشكل كبير ، في الدول الغربية نجد المرأة تبدأ حياتها من جديد ولا أرى أي أحد وضع يد الاتهام عليها ولو اني ارى بعض التقصير في حق المرأة في كل مجتمع إلا أنها أفضل حالا من المرأة الشرقية .
لا أريد الحديث بشكل كبير عن الطلاق فهو موضوع ممل بالنسبة لي ولكني أصنف الاسباب كالتالي :
80% بسبب المجتمع ، 15% الرجل ، 5% المرأة
:)
أعلم بأن هناك نساء هن السبب ولديهن هواية التنويع في الازواج ولكن نسبتهن قليلة جدا ، بعكس الرجل ... الذي يحمد ربه كل يوم لأن الشرع حلل 4 له ولايعلم بأن الآية القرآنية حللت هذا الشيء اذا كان الرجل يعدل بينهن فقط .... فتركوا هذا الشرط وذهبوا للزواج من أجل متعتهم فقط ...
شكرا لك يا مجتمعي لأنك تحب الرجل وتجعل من المرأة أداة للمتعة والتكاثر دون مراعاة لأنجازاتها وفضلها في المجتمع .
يال حظك الكبير يا رجل فكل شيء تحت امرك .. وأأسف على رجال ضيعوا حياتهم هدرا لو كنت رجلا لقمت بكل شيء لأجل مجتمعي فكلما ذكرنا خدمة مجتمعنا نجد الرد : ولكنك فتاة ولا يقبلون بالنساء في هذا المجال :(
هذا الموضوع يعبر عن وجهة نظري فقط :)




شكرا لوجودك يابوخالد يالصوت الجريح ... شكرا لوجودك :)

يقولون انا مزاجية :( ولقيت نفسي فعلا مزاجية ...:(

2009-04-12

لست أنثى تقليدية !!!!



ضاق قلبي على تلك الكلماتْ

واقشعر جسمي على حالي

هل أنا حقا أنثى ضعيفة ؟؟


..



..

راودتني الخيالاتْ

وعشقت في تلك الأحلام

وصدقت حلميَ القبيح

فسلمت قلبي للاهاناتْ


..



..





جميل أن تترك لأنثى ذكرى جميلة

وكريه ان ترحل وتجعلها تكره وجودك



..


..



..

قد عرفت سر عاطفة الأنثى

لا لكي تحب

ولا لكي توفي

بل لتجعل عاطفتها أضحوكة لدى الرجال ..


..



..



..




كم أكره رؤية فتاة تعاني

وكم أكره تللك الليالي

التـــــــــــــــي

جعلت من عيني سيل دموع

وجعلت من قلبي بركان دماء يغلي

وجعلت من لساني يلعن ويبغض


..




..



..





ربما سهل على الانسان أن ينسى

ولكن صعب عليه أن يكرر الخطأ من جديد


..



..





ربما ظننتَ ان قلبَ تلك لا يشعر بحبكْ

وهل فكرت في أن تكون تلك قد عانتْ من قبلكْ

لا تظلمها اذا احكمت أقفال قلبها




وتركت عواطفها جانبا

وعاشت مع عالم الرجال الواقعي سعيدة


..




..




..




لم تعد تفكر أن تكون فتاة تقليدية

تحكمها الأحلام والخيالات الزائفة

وتقع في حب رجل من الرجال

ربما سيحبها للأبد وربما لا


..



..



..





ولماذا تترك علامات التعجب فوق رأسها ؟؟

ولماذا تبكي كل يوم حزنا على يوم الفراق


..


..



..




هي لا تريد ترك فرصة وواحدة لقلبها للبدأ من جديد

هي لا تريد تلك العواطف والاحاسيس




هي تريد حريتها وهذا فقط ماتريد ...




.



.



.


.




آسفة ياذا القلب الكبير


آسفة ..



...




...




...




















انا آسف سامحيني
لو غلط قلبي عليك

وقال أحبك

واعذريني لو قسى نبضي عليك

وردد اسمك واغفريلي

اذا زلت عيون تمنت انها بلحظه تشوفك

وارحلي عني بعيد

ولا يهمك واتركنيني في مهب الريح

اعاني بين جرحين

جرح البعد عنك
وجرح حبك

وعذبيني كل ما مريت يمك

واطعني الف طعنه لو خيالي مر بك

او جاك زاير

وان لمحتيني بطيفك

أصرخي

وقوووولي كرهتك

ولا يهمك وأنسى اني كنت احبك

واتركيني ولا يهمك

ليه يا صووووت الندم تصرخ علي؟؟

ليه يا دمع الالم تقسى علي ؟؟

ليه يا نبض الوهم تخطي علي؟؟

وشهو ذنبي اللي بحقك ارتكبته ؟؟

غير دمع في غيابك كم سكبته

وكم ذكرتك في ضلام الليل

وقلت حبيبتي وانتظرتك

بس لو مره غلط فكرك

وجابني لك

اصرخي وقوووولي كرهتك

ولا يمهك وانسى اني كنت احبك

كان قلبك نادم اني كنت احبك

وكان صدرك ضاااق لأني صرت قربه

لو سمحتي

لو سمحتي

اصرخي وقووولي كرهتك

ولا يهمك
وفوووووق هذا وبعده

يشهد الله اني في نهايه كلامي

احبـــــــــــــــــــك

وابي اقولك ش ي

ترى الحب من الله

لاهو بكيفك ولاهو بكيفي

يعني غصب عنك



...




....




.....







احبــــــــــــــــــــــــــــــــــــــــــــــــــــــــــــــــــــــــــــــــــــــــك