2010-01-15

تغطية حفل الختام :)

السلام عليكم ورحمة الله وبركاته
اليوم راح أحط لكم تغطية لاحتفالية بسيطة يسويها قسم علوم الارض والبيئة كل نهاية فصل دراسي ، وكانت الاحتفالية بسيطة كالعادة ولكن الي يحليها اهو تعاون اعضاء هيئة التدريس والطلبة وتجمعهم في مكان واحد والي يخلي الواحد يفتخر انه يدرس في قسم يعامل الدكاترة الطلبة على أنهم ( اخوانهم وأبناءهم ) قبل مايكونون طلبة عندهم . وهالشغلة الي حسيتها من دخلت هالقسم حسيت اني بنتهم الي يوقفون معاها بكل شي يسعدها ويحزنها ، عائلتي الدراسية قسم علوم الأرض والبيئة ، وبهذه المناسبة أحب أشكر كل من :
دكتور جاسم العوضي : كل الشكر والتقدير لك على كل ( زفة ) تعطيني اياها ، لأن ماشفت من الزفات الي خذيتها منك الا كل عبر وادري ان انت ماتزفني الا علشان مصلحتي وعلشان اتميز في القسم ، أشكرك كل الشكر .
دكتور محفوظ بابطاط : الدكتور الي حسيته فعلا يعطي من كل قلبه وما أناديه بالقسم الا ( يبــــا ) لأنه فعلا أبوي الي ألجأ له لمن أواجه مشاكل ويساعد كل الطلبة ، كان يقفل باب القاعة علشان لحد يطلع و ويخلص واجباته واشغاله بالوقت نفسه ، اهتمام مبالغ فيه واعتقد هالشغلة غايبة عن اغلب دكاترة الجامعة لأن في دكاترة عندهم درس الطالب مادرس ماهمني بس مثل هالدكتور ماشفت ، عسى الله يشافيه من مرضه أطلب منكم قرائي إنكم تدعون له بالشفاء ، وأي أحد محتاج لمعلومات جيولوجية فهالدكتور فاتح باب مكتبه مايرد أحد كلش :)
دكتورة زينب المسلم : ونعم الدكتورة الي ماغبت ولا مرة بمحاضراتها :q وان شاء الله آخذ بونس على الحضور :) تشجيع متواصل لنا وتحب تحببنا وايد بالتخصص الي ندرسه تعطينا أمل كبير بأن الفشل مستحيل يتواجد عند الانسان المثابر ، تحسسنا انها اختنا قبل ما تكون دكتورتنا توقف معانا بمشاكلنا وتتكلم بجرأة وتشجعنا على أن نتكلم ومانسكت عن حقنا وماننطر احد يتكلم بلسانا :) ونعم الدكتورة وعسى الله يوفجها دوم يارب .
دكتور عرفات الشعيبي : هالدكتور لمن احضر محاضراته أحس رايحة سينما أفلام وثائقية ، يجتهد بعرض المعلومة للطالب ويجتهد ان مايخلي الطالب يمل من محاضرته ويهتم بصورة خيالية ويخلي الطالب يتعلم شلون يحسب الف حساب لكل شغلة يسويها بدراسته خذيت عنده مادتين كنت استحي اذا زفت بالامتحان .
دكتور اسماعيل : الي يزعل اذا ماحضرت محاضرته و يناديني ويزفني ويقول لي : انتي ذكية بس ماتستغلين ذكائج بالدراسة ، لوووول اعترف بهالشي :q يبت عنده درجة مو زينة بالامتحان الاول وظل واقف معاي ومهتم بتعليمي خطوة خطوة لحد ماعوضتها بالفاينل الحمدلله فاشكره وايد وايد وعسى الله يوفجه يارب .



دكتور فكري خلف : دكتور يديد بالقسم وذكرته من قبل سنة في مدونتي بأنه اول خريج في جامعة الكويت ، دايم يوصي الدكاترة علي ويحرص على اني اجتهد في دراستي ويعطيني امل كبير ان ماكو فشل بالحياة ، وان حتى لو فشلنا نستغل هالفشل للنجاح ، اشكره على هالشي .
استاذة مريم الشميمري : أختي الغالية والي دايم تنصحني وتهتم بطالبات القسم وتعلمنا شلون نستغل وقتنا ونهتم بدراستنا وهم دايم تقول لي انتي شاطرة بس تهملين بدراستج وتفكرين بأشياء ثانية ، متواصلة معاي دايم ودايم تدق وتسأل وصارت صديقتي الي احبها حيييل ، اجتماعية جدا عسى الله يوفجها يارب .




دكتور راو ديفي : دكتور رائع ابتسامته ماتفارق ويهه دايم يقولنا اسمتعوا بحياتكم ولا تاخذون الامور بتعقيد :) صاج والله


دكتور مايكل دويين : ( :) ) خلوني ساكتة مابي اسقط لوووول اهو يضحكنا بالمحاضرة ونستانس على شرحه بس يصدمنا بالنتايج :q الله يسامحه .
دكتورة أديبة الحربان : أمي الغالية وصديقة الجميع الي تساعد كل طلبة الكلية مو بس طلبة القسم ، ماكو مجال للفشل عندها وتعطي الطلبة فرص علشان يصحح من أخطاءه بالدراسة ، دايم تشجعني بالقسم أحبها حيييل عسى الله يوفجها يارب .
دكتور ابراهيم الرفاعي : هالدكتور طريقته بالشرح مسلية حيييل وكان يسميني ( أم الفول ) :q ، يعطينا 5 درجات اذا حفظنا سورة من سو القرآن الكريم الكريم فكنت اروح اقول له تعطيني 15 درجة واسمع لك 3 سور ؟؟؟ اذا تعقدت عندي اي مسألة اروح اكلمه ودائما ما يشرح لي الامور ببساطة جدا ، ويسألني عن دور المرأة في الانتخابات لأنه شايفني وايد مهتمة لهالامور ويسمع وجهة نظري ويعلق عليها بتعليقات جدا مسلية تضحكني وايد ويقول لي سلمي على بنت عمج ذكرى الرشيدي لأنها كانت طالبة عنده .
دكتور محمد الصرعاوي : هالدكتور كل القسم يحبه حيييل راح اخذ اول مادة لي عنده الكورس الياي والله يستر الدوام من 5 لحد 8 بالليل بس الدراسة مع هالدكتور وايد حلوة ، لمن كنت احتاج لمواضيع بيئية ماكان يقصر معاي كلش أخونا كلنا بالقسم يهمه حييل ان الطالب يهتم بالبيئة الي تحيط فيه فهالشي جدا يخلينا نحب دراسة المواد الي ناخذها بالقسم . وعلشان رفيج ابوي :q
أشكر حتى الموظفين في القسم السكرتارية أمل وسعاد أحبهم وايد لأن وايد يساعدوني اذا احتجت لشي ، محمود الي يصور لي الجدول الدراسي مايقصر معاي بشي كلش ، عماد عسى الله يوفجه يارب والبقية كلهم عمري ماشفت منهم اي تقصير نهائيا .
يمكن ماحبيت الدراسة بجامعة الكويت بس لمن درست بهالقسم هالشي هون علي وايد اشياء كنت اتحلطم فيها بالجامعة ماقول الا يابختي اني ادرس الجيولوجيا بصراحة :)





الدكتور جاسم العوضي رئيس القسم



دكتور عرفات الشعيبي وكلمة لمكتب التوظيف المهمي للطلبة المقبلين على التخرج

كلمة أمين السر السابقة للجمعية الأمريكية لجيولوجيا البترول ( طموحة ) :)



دكتور فكري خلف




هالاساتذة كلهم درسوني :) ( د.اسماعيل - استاذ ممدوح - استاذ منور خان -استاذ عزيز الله )





دكتور فكري خلف والدكتورة فوزية الرويح



دكتور محمد الصرعاوي

ـــــــــــــــــــــــــــــــــــــــــــــــــــــــــــــــــــــــــــــــــــــــــ

وقفة مع نفسي

في بداية السنة الجديدة تغيرت أشياء كثيرة فيني ، ربما مررت بمواقف جعلتني احسب الحساب لمستقبلا واتفادى الأخطاء التي كنت أواجهها في السابق ، ربما يظن البعض ان فات الأوان ولكن بالنسبة لي لا ، أخطأت في حق كثيرين وأخطأ كثيرين في حقي ، وجميع من يعرفني ويعرف سارة فعلا يعرف أنها مهما أخطأ في حقها ومهما فعل فهي تحلله ولا تبغضه نهائيا ، هذا التغيير وجده البعض رائعا وشجعوني على الاستمرار ووجده البعض الآخر مجرد تغيير بسيط وستعود الاحوال كما كانت ، والقرار يعود لي أولا وآخرا ووجدت في هذا التغيير أجمل وأفضل قرار اتخذته في حياتي ، الأخطاء تجعل البعض يندم ويتألم ولكن بالنسبة لي تجعلني انسانة أفضل فأنا لست ملاك ولست معصومة عن الأخطاء وكل ( طراق بتعلومه ) كما نقول ، الاستمرار في الخطأ هو الفشل ولكن الوقوف والتصدي للخطأ هو النجاح ، وهذا ماقمت به ، لذلك وجدت الكثيرين ممن يقولون : انتي وينج من زمان موشايفينج ؟؟

ومن يقول : نشاطج قل عن السابق وماقمنا نسمع لج خبر .

ولكن بالنسبة لمن هم قريبون مني ومن يعرفوني جيدا بأن هذه الطريقة هي الأفضل لكي أطور مستقبلي وخاصة مستقبلي الدراسي هنالك الكثير من الملهيات التي ألهتني عن دراستي وأولها مدونتي الغالية .

تلك الأخطاء التي اقترفتها بسيطة ولكن البعض رآها كبيرة جدا :q لذلك اعتذر كثيرا للجميع .

وأعتذر لكل من أخطأت في حقه أنا آسفة ولكل من أخطأ في حقي سواء أمامي أو من ورائي فأنا في هذه الحال لا أقول الا هذا الدعاء

(( اللــــهم اكفنيهم بما شئت ))

ـــــــــــــــــــــــــــــــــــــــــــــــــــــــــــــــــــــــــــــــ

أتمنى ان تعجبكم مقابلتي في مجلة (ماري كلير ) العدد الجديد ، أشكر الغالية سارة المكيمي على المقابلة .

ـــــــــــــــــــــــــــــــــــــــــــــــــــــــــــــــــــــــــــ

اعتذر كذلك لمن يقول أن رسوماتي جريئة وبها نسبة من الوقاحة :الكركتير لابد وأن يكون جريء وان خشيت من الجرأة كي اتفادى الانتقادات حينها فانا لا أستحق أن أكون رسامة كركتير .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مقولة اليوم

.

.

العلم خير من المال لأن العلم يحرسك

وأنت تحرس المال والمال تفنيه النفقة

والعلم يزكو على الانفاق

الامام علي بن أبي طالب رضي الله عنه


31 comments:

Sn3a يقول...

عادي اقولج شي ماله علاقه بالبوست

انتي تدشين القلب
صج ودي اصير مثلج ماشاءالله ربي يحفظج يارب


شدي حيلج
والله يوفقج يارب

Engineer A يقول...

ماشاءالله خوش احتفالية

حلو يحس الواحد انه قريب من اساتذته اللي يحبهم ويقدهم ويحترمهم واللي يقدرونه بدورهم..

الله يوفقج يارب وان شاءالله تحققين أحلامج وتوصلين لكل اللي تبينه ..

دمتي بخير

اقصوصه يقول...

تغطيه جميله للاحتفاليه :)

Sami يقول...

طلعتي مو بس طموحه و مملوحه ... بزيدها كلمه... وفيه :)
الله يوفقج في حياتج العلميه و العمليه
ودي انسوي حملة حملة حماية البيئه في بر الصبيه .. الوضع مزري هناك ..للاسف رواد البر ما يراعون النظافه ..شرايج

7mrMos يقول...

يعطيج العافيه والله يعطيج على قد نيتج ويوصلج للمكان اللي تحلمين فيه ونشوفج مكان هالدكاتره وطالبه تكتب عنج :) وتقول خوش دكتوره ساره طيبه بس شريره بالدرجات :p

أحمد الحيدر يقول...

خوش تغطية .. وعقبال كل كورس انشالله بخير وصحة وسلامة :)

sweetya يقول...

خوش احتفاليه

والله يديم هالمحبه بين الدكاتره والطلبه

بس بقول شي ضحكني اسم الدكتور بابطاط

اهو صج اسمه جذي والا لقب لووول



والله يوفقج وبالعكس رسوماتج وايد حلوه



وبالتوفيق ان شاء الله

Rami يقول...

الحمد لله على السلامة
خطاكم السو
قرت عينك
كلمات قد تقال لطالب انتهى من كورس في مواد من كلية العلوم .
يطري علي ايام ما كنت اخذ مواد في العلوم .. اتحلم حتى بعد نهاية الكورس بأشهر ان هناك امتحانات ما خلصت ولازم امتحن مرة ثانية .. صج مو خوش شعور .

على فكرة .. ماذكرتي دكورة فريال بوربيع .. طلعت من الكلية ؟؟

خبري فيها من 12 سنة .. أيم التكتونيك بليتس :)

مبروك النجاح وعقبال الدكتوراه .

خُـنْـزُبْ يقول...

لووووول
سارون ، اهم شي الجمله الشهيره اللي تقولها الوالده
روح يا وليدي الله يوفقك و الله انك مزيون لوووول

تعبي على بو خالد الدكتور الصرعاوي ، علم و اخلاق
و تواضع و خبره.. الهيئه العامه للبيئه كانت بعهده من احسن
مؤسسات الديره ، و يوم مشى ، اعتفست من وراه .

يا الله خلصي ، نبي الشهاده العوده
تحياتي :)

Daniel يقول...

مساء الخير ,

مشاءالله , شالتغطيه الحلوه هذي

اهم شي دكتور مايكل هههه احس انه يضحك عليكم مو وياكم لما يسولف هههه .


عجبني البوست صراحة لما فيه من فنتكه وجكجكه من المعلومات الحلوه .

وعلى فكره تم خلع الحمايه الوورد عشان عيب في الثيم .

وشكرا على اضافتي على اللسته , وانا ان شالله راح اضيفج بس نطري ليما اسوي لسته خاصه بي هههه .

محبتي ,
دانييل

Daniel يقول...

وعلى فكره انا احسدج على اعجابج الشديد بالتخصص التي اخترتيه , فنادرا ما ارى امثالج .

والله يوفقج يا رب :)

Daniel يقول...

ااوه آسف على تكرار التعليق , بس لاحظت هالشي في انجازاتج
" شهادة اتمام دورة في القراءة السريعة والخريطة الذهنية 2009م "

انا شفت جم فيديو عن هالشغله , اهو صج بس تطالعين الصفحة ثانيتين بس

جنج قاريتها كلها ؟


محبتي ,

طموحة مملوحة يقول...

سنعة


يابعد قلبي انتي والله يشرفني كلامج والله مشكورة وايد يالغالية :)

طموحة مملوحة يقول...

Engineer A

اي والله حدهم متعاونين والله :)

مشكورة وايد يالغالية ويوفقج يارب

طموحة مملوحة يقول...

اقصوصه

مشكورة يالغالية :)

طموحة مملوحة يقول...

Sami


اخوي سامي لو تدور على كل قطعة صغيرة بالكويت مع الاسف الشديد راح تلقى الوضع فيه جدا مزري ، يشرفني المشاركة اذا كانت لكم نية وفي تجمعات وايد ماراح تقصر لو كل هالتجمعات اجتمعت علشان هالقضية صدقني راح يسوون تأثير خيالي

طموحة مملوحة يقول...

7mrMos

الله يسمع منك يارب

فكرة اني اكون دكتورة حلوة بس اني ادرس مو حلوة اخاف باجر يقولون بعد ماتمر السنين يسألون للحين عندكم الدكتورة سارة ؟؟ شخباري للحين ماماتت :q تصير وايد ترا

طموحة مملوحة يقول...

أحمد الحيدر


آميين يارب مشكور وايد احمد :)

طموحة مملوحة يقول...

sweetya


لوووول هذي اسم العوايل عندهم هنا جذي باليمن يعني احنا اسماء العوايل تبدي بـــ ال اهم باب :)

بس عسل هالدكتور والله خل اقول لج موقف مع وحدة من رفيجاتي عبيطة اول سنة دشت القسم رايحة تبي تكلمه جان تقول له دكتور اباطة ؟؟ تدرين شلون عطاها نظرة حقد عليها لووووول يايتنا تقول لنا احنا فصلنا عليها مسكينة ومن صجها

طموحة مملوحة يقول...

Rami



اي والله عقدة الامتحانات صراحة انا ذكرت الدكاترة الي درست معاهم فريال هالكورس طلعت وراحت تعالج برا عسى الله يشافيها يارب فيها السرطان ادعي لها بالشفاء

طموحة مملوحة يقول...

خُـنْـزُبْ



اي جمال موطبيعي صراحة لووول

الصرعاوي اذكر سألت دكتور مصري بالمؤتمر قلت له والله الدكتور الصرعاوي ماكو مثله جان يقول لي انتي تعرفي لما كان ماسك الهيئة العامة للبيئة أعدوا يحفروا ليه لحد ماطلع وبمشكلة نفوق الاسماك حطوا اللوم عليه ...

انا عيوني صارت @@ نفس الصورة الي انت حاطها لوول

قلت له شكو نفوق الاسماك كارثة ولها اسباب طبيعية وبشرية الصرعاوي شكو ؟ قال والله حطوا اللوم عليه لحد ماطلع ولو تشوفه بالجامعة صج صج صج انسان قلبه على البيئة يعني فعلا الشخص المناسب لهالشي مو يحطون ناس تخصصات مادري شلون قايلة بمكان يختص بمواضيع البيئة ناس مادري شلون تفكر صراحة

طموحة مملوحة يقول...

Daniel


اولا اشكرك على كلامك الطيب :) واشكرك لأنك شلت تأكيد الكلمة

والتخصص هذا انا انجبرت فيه دشيت الجامعة مادري شنو ابي واهلي غصب دخلوني جيولوجيا والحمدلله حبيت التخصص صج الي يطيع اهله مايضيع :)

المهم مشكور وايد وعلى سالفة القراءة السريعة لوووول انا رحت لدورتين مو بس دورة وحدة بس مو ثانتيين لا يعني ان تفهم الصفحة بدون ماتقرا تفاصيلها عرفت ؟؟ انا حضرت دورات وشريت كتب القراءة السريعة وللحين اتنح وانا اقرا لووول ماكو فايدة بصراحة انا ودي اتعلم اكثر عنها لأني احب اقرا وايد بس مشكلتي الوقت مع الاسف الشديد :)

جده غير يقول...

تغطية حلوه وما قصرتى مدحتى الدكاتره ورديتى جميلهم عليج وحسن تدريسهم لكم وصور جميله بس ليش انتى اطول من اللى الدكتوره او المره اللى واقفه يمج ;)

وبالنسبة للتغير شئ جيد التغيير للافضل وعدم الركود وكذلك المجاملات اللى اكثر من اللازم او وضع النفس بزاوية معينه وعدم اكتشاف الاشياء الزينه والامكانيات اللى بداخل نفسك ورضى الناس كايد يا طموحه لابد وجود اللى ما يعجبه نجاحك او الميزه الحلوه اللى فيج ف شاعر عبس الشاعر عيد بن مربح الجلادى الرشيدى يقول

لقيت للقرحه علاجن طبيعى
فرقى ختوش الربع وانذال الاصحاب

الشطر الاول من البيت واضح

الشطر الثانى

ختوش الربع = هم اللى قريبين منك لكن خبول او نذول او حساد او كارهين النجاح لك او محبطين لك بدون حق

انذال الاصحاب = هم اللى مو من قرايبك من باقى الناس اللى تتعرف عليهم ويطلعون فيهم نذاله او حسد او حقد عليك او يدورون مضرتك او ينشرون سيئاتك ويخفون حسناتك من لعانتهم


هؤلاء ابتعد عنهم وتروح القرحه والمغثه منك بدون علاجات الاطباء


وطبعا بالمقابل هناك ناس محترمه وعزيزه ومعرفتهم لها معنى وتستاهل وتستحق ان لقوا خير بلغوك وان شافوا مضره نبهوك لصفاء قلوبهم واحترامهم لانفسهم قبل الغير

ومثل ما قال الامام على بن ابى طالب كرم الله وجهه قال الشاعر فى الحكم

العلم يبنى بيوت لا عماد لها
والجهل يهدم بيوت العز والشرف


وقريت تعليقات الاخوان والاخوات اللى يتمنى ان تكونى دكتوره بالجامعه واللى يتمنى انج تاصلين لقمة التخصص بالجيولوجيا واللى يتمنى توفقين فى عملج وتكسبى المال الكثير واللى يتمنى تكونى مشهوره ويشار لج بالبنان

ولكن ما دروا ان فيه امر عند ساره اهم من اللى ذكروا واعظم

على بالهم مجرد آله وشكل ووجه اعلامى جميل ومحاضره جيده وعريفة حفل ناجحه وصاحبة اسلوب حلو فى ندوه

ما دروا انها كتلة مشااعر مرهفه وانوثه طاغية تجلدها ليل نهار حفاظا على كرامتها وشموخها وشرفها لما ياتى الفارس اللى تتمنى ويبعثر كل هذا وتعبر عن ما نفسها بكل حرية وشفافية وسريه بينها وبينه وتجعل حضوره ووجوده بكفه لا تنافسها كفوف الشهره والمال والمنصب والمدح من الاخرين وبس

<< خلاص كافى استرسالك هذا وخل عندك كنترول شوى لا تحرجها او تضايقها فى اول سنتها الجديده .


واشوفج على خير

kal ho na ho يقول...

ليش المخيف د. علي المشوط مو وياهم؟؟

الله يذكر د. فوزية بالخير !!

ودمتم

الدانة يقول...

مساج الله بالخير ,,
شكرا على هالتغطية ..
ذكرتيني بكلية العلوم ذكرياااااااااات
خصوصا قسم الجيولوجيا :)
شكرا لج
الدانة

طموحة مملوحة يقول...

جده غير


تسلم على هالكلام الكبير اخجلتني والله اتمنى لك التوفيق ولا تنساني بالدعاء ياخوي الغالي

طموحة مملوحة يقول...

kal ho na ho


للحين ماخذيت عنده مادة بصراحة بس من ناحية التعامل انا وايد هم اروح استشيره ببعض الامور كلش مايقصر معاي والله :)

واي فوزية عندنا ثنتين :) ؟

طموحة مملوحة يقول...

الدانة


اهلين اختي الغالية انتي الدانة رفيجتي ماغيرج ؟؟ اذا انتي بذبحج لووول

مشكورة يالغالية وصج كلية العلوم ترا والله خوش كلية بس فيها شوائب تخرب عليها وايد :p

طموحة مملوحة يقول...
أزال المؤلف هذا التعليق.
طموحة مملوحة يقول...
أزال المؤلف هذا التعليق.
طموحة مملوحة يقول...
أزال المؤلف هذا التعليق.