2010-01-21

بريك سياسي ياكويت ...




أمس ..... كنت وياليتني لم أكن ، وضعت على نشرة الاخبار والأضواء كلها على مجلس الأمة ونجوم مجلس الأمة والقضايا ( الخطيرة ...... جدا )) التي يناقشها مجلس الأمة .


بصراحة أنا طبعي غريب ان غضبت او انزعجت فأضع كل همي بالطعام وساعتها لم أكن جائعة ولكن من نشرة الاخبار انهيت نصف الطعام الموجود .



انتهيت من نشرة الأخبار التي جلبت لي الصداع ، فدخلت المسنجر لأتحدث مع صديقتي أثير متابعة لمدونتي وأصبحت قريبة جدا من قلبي ( الله لا يغير علينا يارب ) تناولنا في أحاديثنا عن المواضيع ( الخطير ) التي يناقشها مجلس الأمة ، بصراحة كان من الاولى ان اجلس وادرس اختبار النهائي لمادة الجغرافية ولكني من الانزعاج أردت أن أريح اعصابي من السياسة المزعجة .



الكويت : سارة ؟؟


سارة : ياعيون سارة !!


الكويت : صج يقولون شعب الكويت اكثر شعب يتحلطم ؟؟


سارة : والله يقولون بس يالله على الاقل انذكرنا بشي :q


الكويت : شلون التعليم والتربية في الكويت ؟


سارة : والله انا مو خبيرة بمجال التعليم بس وايد من دكاترة كلية التربية يتحلطمون من تخريج دفعات ( غير مؤهلة ) ان تكون تحت مسؤولية التعليم في المدارس ، والتأكيد على تخريج دفعات فاشلة من الطلبة .


الكويت : زين والصحة ؟


سارة : لا الصحة عال العال افا عليج !! انتي روحي مستشفى العدان راح تلقين المختصر المفيد عن الصحة طال عمرج !!


الكويت : وليــــــه ،، زين والاعلام ؟؟


سارة : مادريتي أخيرا راح يستجوبون وزير الاعلام !! شخباري اعلام بالكويت .. اهو في اعلام ؟؟؟


الكويت : وبعدين عاد ؟؟ زين والجامعة ؟؟


سارة : والله ياكويت الجامعة خليني ساكتة ياما تكلمت بمدونتي ولاعت خشمي وانا اتكلم وماكو فايدة ... أقول لج شغلة ؟ هنالك العديد من الدكاترة الموجودين في جامعة الكويت غير معترف فيهم ومايبونهم يدرسون الطلبة مع انهم من افضل الدكاترة وتخرجوا على ايدهم عقول ذكية بس للأسف دايم حكم القوي يقتل الطموح .


الكويت : واعليا ، الله فوق الجميع ياسارة .


سارة : أكيد يالغالية بس لي متى واحنا على هالحال ؟؟


الكويت : للحين الواسطة تقتل الكفاءات ؟؟


سارة : حتى الكمبيوتر صار يعرف الواسطة بالكويت ، شكلنا بندرس مادة متخصصة بالواسطة وشلون كل واحد يضبط له واسطة


الكويت : زين والوحدة الوطنية عساها للحين موجودة ؟


سارة : والله ياكويت مادري شقول لج ، اقدر اقول للناس الوحدة الوطنية ومن وراهم اسوي مشاكل وفتن وهذي لعبتهم الحين ياكويت .


الكويت : حاولوا توقفونهم !!!!!


سارة : نحاول ؟؟ والله الشباب الكويتي فيه الخير بس للأسف وايد ناس تحاول تغزو عقولهم ، احنا الي فينا مكفينا من وين مانطقها عوية حطوا علينا سالفة الفتن والمجلس شغال على هالمواضيع الي مادري لي وين راح يوصلون ..







الكويت : ضيقتي خلقي ياسارة على كثر التجمعات الي موجودة وهم المشاكل تزيد ؟ وعلى كثر الاقلام الي تنبذ الطائفية هم ماكو فايدة ؟؟


سارة : لا وأبشرج صرنا نتطنز على بعض يالبدو انتو اساس البلا ويالحضر انتو الفساد ..


الكويت : مايصير هالحال لازم تتصلح الامور !!


سارة : الزمن قاعد يتغير والمفروض نتغير للأحسن والناس قاعدة تمشي وتخطط لباجر واحنا نعيش يومنا حاطين ايدنا على قلبنا خايفين ... وياليت خايفين من الي برا ... خايفين من نتايج التصرفات الي ( احنا ) نسويها وعلى بالنا كل شي نسويه صح .


الكويت : مايصير ضميتكم وماقصرت معاكم والناس كانت كلها تتكلم عنكم والكل يتمنى يعيش بالكويت ، بالاخير هذا يزاي ؟


سارة : ياكويت المشكلة ما نطالع نفسنا ، المشكلة ماشوف انا شنو سويت وشنو ماسويت ، اذا سويت غلط أصلح هالغلط لا .. احنا نشوف غيرنا ونحط العدسات على الغير ندور على عيوبهم ونتلذذ لمن ندور على العيوب ونعاير بعضنا فيها للاسف .


الكويت : اذا هذي اولها ينعرف تاليها، ماتخافون ؟؟؟


سارة : والله نخاف ياكويت ونخاف على عيالنا والاجيال الياية ، بس في ناس تخاف على نفسها بس ، وماهمها الغير لو شيصير .


الكويت : في ناس متفاءلة .؟؟؟؟


سارة : يليت هالشي انا بنفسي تفاؤلي قام يقل حيييل اكثر من أول مع الأسف بس لا تحاتييين بظل احبج وادافع عنج ياكويت حتى لو كنت منبوذة والكل ينبذ شخصيتي وفكري بظل ادافع عنج لآخر العمر .





ياليت نبطل نحشر أنفسنا بأمور تخص الدول الثانية ، وخل نركز على مشاكلنا أحسن كافي الي فينا ، وكافي كل ما ادش موقع عربي يكتبون الغزو مارباكم يالكويتيين ، الغزو ماعلمكم ، يبيلكم صدام ثاني يالكويتيين ..


أنقهر حيييل واقول اهم شكو فينا ؟ بس الحين اقول تكفون خل نشوف حالنا ومالنا شغل نتدخل بشؤون الناس الي حوالينا ...



ـــــــــــــــــــــــــــــــــــــــــــــــــــــــــــــــــــ








أتمنى من كل قلبي تكون هالصورة مفبركة .... أتمنى هالشي من كل قلبي



متفــــــــــــــــــــــائلين ؟؟

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،



مقــــــولــــــــــــة اليوم :



.



.




.




الموضة شيء بربري ، فهي تنتج إبداعا بلا هدف وتقليدا بلا فائدة .


جورج سانتايانا ..... كاتب وفيلسوف وشاعر أمريكي







12 comments:

sniper يقول...

:)

Enter-Q8 يقول...

بصراحة كان من الاولى ان اجلس وادرس اختبار النهائي لمادة الجغرافية

هذا انتي قلتيها ببداية بوستك

Engineer A يقول...

انا كان عندي ذرة تفاؤل ..

بس من بعد هالحوار والصورة العجيبة اللي شفتها ما ظنيت بقى شيء :(

sweetya يقول...

حوار من اروع مايكون

بس خل نتفائل ومازال اهل الديره فيهم الخير وهم في بعض نوابنا الخير والبركه


ويعطيج الف عافيه :)

علي إسماعيل الشطي يقول...

مقطع جميل في مسرحية حامي الديار يتحدث عن وضعنا الحالي قبل تقريبا 22 سنة

وهو قول النفيسي لسعد الفرج يوم قال الفرج عن ولده السلفي المتعصب و عن ولد النفيسي الجعفري المتعصب قال هذولا نواخذة المجتمع رد عليه النفيسي قال :

إذا هذولا نواخذة المجتمع إن شفت بر حسن هالشوارب

أعتقد بعد 22 سنة من هذه المسرحية ما أقول إلا صدقت يا خالد النفيسي


تحياتي

ابو عبدالملك يقول...

يابنت الناس اقول اطلبي وجبه جكن فليه من مطعم افراح الخليج واترسي بطنج ونامي ولادوخين راسج

طموحة مملوحة يقول...

جمعة مباركة عليكم جميعا

بوعبدالملك

لوووول والله عندنا مطعم هندي بفريجنا احلا ولا تخاف على بطني ما انساها لوول

اخوي علي

لازم اشوف هالمسرحية والله يخوفون :( يليت يكون كل واحد بحاله ويعيش بسلام يسوي لنفسه علشان يقابل ربه بعمله لنفسه مو اذيته للغير

جده غير يقول...

حوار جميل ونقاط مهمه

تسلمين ساره على هالمحادثه


ويجب محاربة الفساد الادارى لانه من اصول المشاكل اللى نشوف ونسمع وتطبيق قانون الثواب والعقاب لان فيه ناس ما عندهم التزام أدبى من يشوفون ما فيه عقوبه تمادوا ومثل مقال المثل المصرى

ناس تخاف ما تختشى


وتفضلى

http://ar.akinator.com/

<< مروا على اللى مريت عليه :)

الوتيــــــــــن يقول...

هالبوست من أقوى ماقريت بصراحة وبإسلوب غير ممل أبدا بما اني ماليش بالسياسة اوي

.. اول شي التعليم ومخرجاته عندنا كلماله وينزل بس الحين يالله لك الحمد صرنا نشوف دفعات من الابتدائي يايين فاهمين شوي .. ما ذكرت----> يالله لك الحمد .. والمسالة مسألة صقل وتقويم .. بمعنى المعلم لازم يتم اختباره ويتم بعدها تقوينه فتقييمه

الصحة ... ماراح اطلب أكصر من أنهم يلاقون لي ملفي لأن مراجعاتي متوقفه من شهر واضطريت اروح للخاص :(

والواسطة .. مالا داعي احجي لأن قلبي بينفتق منها

عزيزتي .. الصورة للأسف حقيقية لأنهم تافهين بالأساس .. وماكو موضوع مهم يتناقشون فيه .. وباعتقادي الخبه اللي كانوا مسوينها ايام الانتخاات والفبركه والثقافه والتفتح المصطنع كان بغرض الحصول على الجواز الأحمر ومميزات السلك الدبلوماسي

شي يحر والله العظيم

مساء الورد

Q8-HANDICAP يقول...

والله يا اختي انا حاشني احباط من بعد جلسة المعاقين تاريخ 21/01/2010 المداوله الثانيه ماتتصورين شكثر انحبطت لي درجة ثاني يوم ماشفت الاخبار ولا ابي اعرف اي شي عن الديره بس خذيت لي جمن يوم ورجعت بس ابرود وهاذي انا الحين بستار بكس باقي على الاخبار ربع ساعه ولا هامتني مثل قبل اشوفها ولا ماشوفها مو لازم عندي

بس يعطيج العافيه على حوارج مع لكويت كأنج رسمتي الصوره حقيقيه وواقع

طموحة مملوحة يقول...

مشكورين وايد على المشاركة في الموضوع ورايكم كله صح بصراحة الوضع اصبح سلبي مع الأسف الشديد :(

egypt-panorama.com يقول...

السلام عليكم
بلوج مميز فعلا ومواضيع قوية جدا وتتمتع بالجرأء الكافية لتحقيق ما تريد
شكرا لك ولى شرف التعليق فى هذا البلوج
وفقك الله الى الخير
http://www.egypt-panorama.com/