2010-02-06

ننافسكم يالبنات ;)





في قديم الزمان .... موقديم حيييل أكيد


كنت أشوف مواضيع يحطــــونها الشباب بالمنتديات ، بالمدونات .. مو شرط يكون هالشاب كويتي بس العربي بشكل عام .


كانوا ينتقدون فيه صور البنات الي تنعرض في كل مكان ، الي تصور ايدها


والي تصور خشمها والي تصور عيونها والي تصور شفايفها المهم انا ما انتقد هالشي بس بنتقد شغلة الحين لحظة ...


كانوا يضحكون على هالبنات ، يمكن في بنات يحبون يحطون الصور هذي تبرز الجهة الجميلة فيها وتبين للكل ان ترا انا مو جيكرة ولا


سحت .. والي تصور عيونها بالنقاب آل عيوني حلوة حييييل والله مكثر الفيديوات الي باليوتيوب الي فيها صور عيون البنات


كانوا الشباب يضحكون على هالبنات ، ويعتبرون هالبنات يحطون هالصور علشان يغرون الي جدامهم .


وعلشان يعجبون فيها الشباب .


هالسالفة قديمة وكلنا شايفين وايد مواضيع جذي شبعنا منهم .




بموضوعي راح أتكلم عن الشباب الي ماعندهم ثقة بنفسهم وتارسين نوادي الصحية غصب طيب تطلع عضلاته ، يمكن في بنات يحبون جسم الريال اكثر من اخلاقه وشكله بس احب اقول للرياييل ، ترا هالاعجاب مايستمر يعني جسم بدون عقل البنت شتبي فيه ؟


استغربت من الشباب الي يسوون نفس البنات الحين


يصور عضلاته ويصور نص ويهه وعضلات المعدة أهم شي :)




هل لهم نفس اهداف البنات؟؟









موقف


اشمئزيت من أحدهم كنت ضايفته بالفيس بوك كان يحط صور جذي .. بل يليت يعرضهم واهو ساكت غصب يخلي الناس تعلق على الصور .


جان اقول له : ليش كل صورك نفس الشي؟ يعني كلهم جبال المنظرة ومصور نفسك تعرض عضلاتك ؟


هو : شنو يعني مو عاجبج ؟؟؟


انا : مو سالفة مو عاجبني بس ليش ماتحط صور لك نستفيد منها رحلة سفرة شي الناس تستفيد منه ترا شفت صور شكثر نفس الحركة ونفس الوقفة بس الويه غير .


اهو ( بدلع ) : انتي وحدة ماتعرفين تجاملين وانا غلطان باخذ رايج ديليت ديليت


لا تكفة ببجي لا تسوي لي ديليت ( لوووووول )



اوكي صور بس لا تتدلعون نفس البنات اتمنى مايصيرون نفس هالشخص بصراحة


علشان جذي أقول للكل


الي يبي الناس تعجب فيه خل يخلي الناس تعجب بعقله وتفكيره اول ، بعد هالمرحلة الناس راح تشوف كل شي فيه حلو ، بس اذا قالت الناس مثلا فلان شوف شكله بس لا تسمع سوالفه ولا شكله كووووول واخلاقه بالحظيظ .






هذا رأيييييي :D


ابي راي الشباب بلييييز






هذا تقليييييد ولا شسالفتكم بالله ؟؟؟








ـــــــــــــ





مقولة اليــــــــــــــــــــوم :






يمكنك الذهاب الى مدى بعيد بابتسامة ، ويمكنك الذهاب الى مدى أبعد بكثير بابتسامة ومسدس .
آل كابوني ....رجل عصابات ايطالي أمريكي
لا يحوشك :q

41 comments:

عين بغزي يقول...

الرياضة حلوه تنمي الجسم و القرأه اجمل تفتح العقل :)

انا احب الرياضه بل امارسها بس رياضة كمال الاجسام مقززه خصوصا بعد دخول ماده السيلكون اليها تخيلي الحين الشباب يدقون سيلكون في العضله !!!
يعني الشاب قبل يقص علي نفسه بحبوب تنفخه او ابره تعرض اعضامه بس الحين سيليكون مصيبه هذه طلعت من اطار الرياضه الي اطار الجمال الجسماني ..

اما بخصوص الصورة هذه تعكس البيئه الي يطلع منها هالشخص ..!!

ebtsamh يقول...

يعني ما ادرى قايلة راي الشباب .. هل عادي آنا اعلق ..

اذا مو عادي احذفي تعليقي ..
واذا عادي عيل سمعي ..
هالاشكال انصب كل اهتمامها وتفكيرها وماديتها ع شكله الخارجي فقط ..

ونسى انه الاهم اهوا اخلاقة وتفكيره ومدى انتاجيته لدينه ومجتمعه ووطنه

يعني دائما اقول لازم الانسان يتبى قضيه بس ما يكون من الاطراف المتضررة فيها بل تكون انسانية اخلاقية تناقش حال المساكين اللي تارسين العالم ..

عشان بس يقدر يقول فدت غيري بدون انانيه ويبتعد عن السطحيه نهائيا ..
لكن هالشريحه قليله ..

وشريحه العضلات كل يوم تكبر اكثر واكثر ..

بانتظار ردود الشباب ع هالموضوع ..

ويعطيج العافيه ع الادراج ..

مـي يقول...

صادوه

^_^

يقولون : من عاب ابتلى

والعياب عند الباب!!

sweetya يقول...

اي والله صاير الوضع اوفر بالنسبه حق هالصور


يعني الناس مخابر مو مناظر كل واحد عباله لو طلعتله عضلات بيكون كول والكل يحبه ويعجب فيه بس مايدري هالشي ممكن يضره لأن اغلب الشباب مو بس سالفه رياضه قاعد ياخذ حبوب ملوت العضلات وهذا بالمستقبل ممكن تسبب له عقم بس ماهمهم اهم شي شكلهم الحال


ماقول الا الله يهديهم


وغير جذي صح صار تنافس بين الشباب منو جسمه احلى ومنو اكثر واحد تعجب فيه البنات للاسف



ويعطيج الف عافيه

سمو الأميرهـ ..ツ يقول...

امممممممم

أظن تفكير " بعض " جيل الشباب

سواءً كانوا بنات أو شباب

نفس الشي ..
المظهر أهم شي النسبة لهم ..

صدق الصور اللي مثل هاذي أنا ما أعتبرها حلوة

اشمئز منها ><

****

يعطيج العافيه ع البوست
:)

*Being One يقول...

صج هالشي وايد قام ينتشر الشباب كلهم نفس الصوورة بالفيس بوك
الظاهر بيثبتون نفسهم مو عارفين شلون و الباجي مع الخيل يا شقرا
و شكرررا

ابو عبدالملك يقول...

شفتي الشباب اللي بس مأذينه بعضلاته ويصورهم ويبي يبين للناس ان اهو قوي
ولاتقربون لي ويابنيه شوفي جسمي منسق وعضلات وشيل واضرب واطرح واجمع

ساليه سؤال:
بما انك قوي وعضلات اخدم عضلاتك بالدين وروح جاهد بفلسطين وانصر اخوانك افضل من عضلات بدون فعل والجهاد يبي امثالك رجل متعافي وعضلات مفتوله؟؟
راح يتوهق

والسبب
هو ان القوه مو بالجسم
بل القوه بالعقيده

فتلاقين الرجل المجسم قوي من الخارج لكن من الداخل فاضي
وبما ان فاضي يبي يلفت نظر الناس وبالاخص البنات علشان يظبطها
واذا قعد ويا الشباب انا ضبطت فلانه وفلانه

أهل شرق يقول...

ترى الي تشوفينه هالايام شيء عادي

هذي هبات تختفي مع ظهور اول موضة

جديدة ،، قبل يقلدون شارلستون

وبعدين جكسن فايف وبعدين زلف

وسكسوكة الشيخ جابر الله يرحمه وعقب

قصات الايمو والحين هابين بالعضلات

الصناعية !!

انا شخصياً افضل الانسان (ذكر او انثى ) المثقف حتى لو كان شكله قرد

طموحة مملوحة يقول...

عين بغزي

ماقلنا شي الرياضة حلوة بالعكس وكلامك صحيح انت انتبه على مشيتهم بعد ونظرته للناس لووول جن الناس حوله نمل واهو فيل لوووول نظرة العلو هذي ماشوفها الا بالي متفخين لووول

طموحة مملوحة يقول...

ebtsamh

احنا بعد شباب ترا للحين ماصرنا عيايز لووول يالغالية مو قصدي ان اهم بس الي يعلقون لج الحرية تعلقين بكيفج يالغالية

خوفج باجر يوقفون عند باب بيتنا بيذبحوني لووول

طموحة مملوحة يقول...

مي

شفتي شلون ؟ لووول يقول لج مايعيب الا المعيوب لووول

طموحة مملوحة يقول...

sweetya


لووول بغيت اح6 صور الحريم الي تافخين بعد مثل كمال الاجسام مضيعين مساكيين لووول

طموحة مملوحة يقول...

سمو الأميرهـ ..ツ


نظام اغراء بس الاغراء الي صار مايعرف مرأة ولا رجل قالوا سواسية فمشوها على هالشي بعد لووول

طموحة مملوحة يقول...

*Being One


انتي شوفي الي جذي الفرند الي عنده شنو ؟

99% منهم بنات :q

طموحة مملوحة يقول...

ابو عبدالملك


قلنا يتعلمون من صغرهم بس اضع اللوم على وزارة التربية لأن مقولة العقل السليم في الجسم السليم المفروض تنشرح عدل فهموها غل6 هالمساكين :)

طموحة مملوحة يقول...

أهل شرق


اي والله صدقت حتى انا يجذبني بصراحة الريال الي يقدس الكتاب والمثقف واحترمهم وايد

الوتيــــــــــن يقول...

تدرين عاد؟ طول ما آنا قادعه أقرا قاعده اتخيل واحد من اللي حاطه صوره بالبوست قاعد يقرا لووووووول شنو ردة فعله؟ حده بيختفي من الوجود

تصدقين يا شوشو؟ الشغلتين يغثون البنية والصبي مادري شالمغزى يعني!!! لاتبوق لا تخاف وبس :\ عالعموم الله يبرد جبدج نفس ما بردتي جبودنا فيهم

مسائج ورد

Jako يقول...

أول شي سامحيني على هالغيبة من زمان مادخلت مدونتج العامرة:)

وبالنسبة للصور.....عندي مليون تعليق على هالموضوع بس بالنهاية كل واحد حر بنفسه :)

_________

بعدين وينج مختفية عن الساحة (فيسبوك)؟؟؟؟

Seema* يقول...

أكتفي بقول الفرزدق:
"لا خير في طول الجسوم وعرضها إن لم تزن حسن الجسوم عقول".
:)

seven يقول...

و الله يا وخيــتي يا ساره

انا كوني معضل حيل حيل " إييه هيــن "

في فتره تهافت الناس للنوادي للعرض فيما بعد

قلت برووح بس مابي أبني عضله

المهم قال لي المدرب سو هالتمرين و هالتمرين و أكل مادري شنوو عشـان تبني عضله

قلت له و من قال لك إني أبي أبني عضل

" أنا أبي قوه كامنه " لووول

أهو طلعت علامة إستفهاام كبيــره فووق راسه

كان ممكن أنطق ذاك اليوم

المهم قال إنت أول أدمي يمر علي يقول أبي لياقه بدون عضلات " للعرض "

أنا إستغربت من كلمته

بعدين شفت هالنووع من الشباب إلي يصور و يحط صوره أو نص صوره يورينا عضلاتهم

طبعاً القصد واضح و سخيف

الحياة عند هالنوع عبــاره عن أجسـام بلا عقول

يعني مثل الفارس إلي يباهي بمقدرته و أهو ما يفتهم

في فلم أتذكر البطلة قالت للبطل كلمة عجبتني

قالت له لما كان يباهي بقوته و إستهزء فيــها "
Better a silly girl with a flower than a silly boy with a horse and a stick. "

هالكلامة في فلم " A Knight's Tale ( "


ما أدري بس حسيت إن لها مغزى بالموضوع لو أرفقهاا

كما أن قيل في الماضي " تكلم حتى أراك "

مو ورني عضلاتك

دمتي بخيــر

و أنا متابع بس بصمت :)

شاي الضحى يقول...

وع وع وعووووووووو

لوعتي جبدي ما احب اشوف واحد معضل

صج يلوعون جبدي والله يسدون نفسي

همهم الوحيد لفت الانتباه وكل واحد يصور عضلاته ويحطهم من زينهم؟!

عبالكم جذب بندوووخ ولا بنموت عليكم وعوووووو


صج صج صج اكررررررررهم

الرجال مخابر مو مناظر ياحظي عليكم

تفخ جسمه عباله صار ريال ومخه فاضي اهدافه محدوده جدا جدا جدا وتدور بموضوع واحد بس والكل عارفه

وهذا من صجه عضلات وحالته حاله ويتدلع؟!

لو يتفخ مخه بالمعلومات ويتثقف احسن من ان يتفخ جسمه ومخه قوطي

panadool يقول...

برأيى هذا أسمه نقص , اللى يصور عمره ويطالع روحه بالمنظره طول اليوم , طبعا تشوفهم بالمجمعات التجاريه مع فنايل البدى , أو يعرضون صورهم بالمنتديات وغيره, يحبون أحد يمدحهم ويعتبرونه أغراء لأن بعض البنات تحب المظاهر وخصوصا موضوع الجسم .

طبعا الموضوع مختلف بين عمليات التجميل للبنات , ورياضة كمال الاجسام عند الشباب , يعنى لكل موضوع له أسبابه ونتائجه والرابط بينهم ضعيف .

يبقى النقطه الاخيره وهى جسم بدون عقل .. أو بدون أخلاق بالضبط وأغلبهم من هذه الفئه بدون عقل أو أخلاق ولذلك بدأت تعليقى بكلمة النقص وأعنى ما أكتبه .


وشكرا على البوست

Engineer A يقول...

هههههه

والله مادري شأقول .. أضحك؟ أبجي؟ على المستوى اللي وصلنا له سواء شباب او بنات؟؟

يقولون "البركة بالشباب" وانا اشوف انهم اقطعوا "البركة" بكبرها!!

الله يصلحهم ويهديهم يارب ..


وسؤالج بمحلة : "شالسالفة؟؟" :)

يعطيج العافية

Lotus يقول...

الانسان بفطرته حيوان اجتماعي < مصطلح علمي مو تفهمونها شي ثاني انا ما اتشمت :)!

فـ الواحد يحب يكون فرد في الجماعة وبعضهم يفضل ان يترأسهم مو بس يكون فرد عادي ..

بالمدونات ولا بالمنتديات او حتى بالفيس بوك غايته بالنهاية نكون متفاعلين وتكون لنا علاقات اجتماعية على نطاق واسع يمكن هالشي ما حققه الفرد في واقعه فلجأ للنت أو يمكن لأنه اجتماعي زياده فيحب يكون له صداقات حتن لو ما يعرفهم معرفة تامه ..!

كل هالشي طبيعي بحكم فطرتنا البشرية بس البعض يفشل أو يلجأ للأمور اللي ما تتكلف منه وقت وجهد فتشوفين بعض البنات تصور جزء من ملامحها و الشباب يستعروض عضلاتهم ..

:

في المدونات يختص اصحابها بعرض اهتماماتهم مثلن في مجال الطبخ او اهتمامه في المجال السياسي او حتن الثقافي ومنها يكون شخص مرغوب فيه لأن اعطى شئ و ابدع فيه ..

انا اشوف أصحاب هاذي الصور غلطوا في التعبير عن شخصيتهم وغايتهم في ان يكونون مرغوبين في الجماعه ..

و اسفه عالطواله اللي جنها محاضره .. لول بس حبيت اعبر عن رايي

:)

طموحة مملوحة يقول...

الوتيــــــــــن

شوفي ساعات احنا البنات نحب نصور وهالشغلة عادية كل بنت تحب تصور الجانب الحلو فيها مومشكلة كل بنت ونيتها بس بعرف الريال ليش يصور بس جسمه ؟؟ ولا يصور وهو مجابل المنظرة علشان الفلاش ايي على ويهه ومايبين الا جسمه ؟ لوووول

خايف لا احد يفضحه مثلا ؟ :q

طموحة مملوحة يقول...

الوتيــــــــــن

شوفي ساعات احنا البنات نحب نصور وهالشغلة عادية كل بنت تحب تصور الجانب الحلو فيها مومشكلة كل بنت ونيتها بس بعرف الريال ليش يصور بس جسمه ؟؟ ولا يصور وهو مجابل المنظرة علشان الفلاش ايي على ويهه ومايبين الا جسمه ؟ لوووول

خايف لا احد يفضحه مثلا ؟ :q

طموحة مملوحة يقول...

Jako

معذور يالغالي

اهو صح حرية شخصية وكيفهم بس لا يقومون على البنات واهم يصورون بعد شدعوة :q

وانت الوحيد الي تدري ليش انا ماقمت اهتم للفيس بوك وايد مثل اول :)

طموحة مملوحة يقول...

Seema*


صح لسانه ولسانج يالغالية :)

طموحة مملوحة يقول...

seven


لوووول شوف شلون ربطت الأشياء ببعضها لوووول

انت لاحظ نظراتهم للناس يبون الناس كلهم تشوفهم وتنتبه لهم مساكييين والله شكثر اشوف بنات ( يسخسخون ) على هالشباب انا بس اشوف واحد جذي ما اعطيه اهتمام لأن دايم ببالهم احنا مرغوبين عند كل البنات واحنا واحنا

تابع بس مو بصمت سو لي ازعاج بلييز :q

طموحة مملوحة يقول...

شاي الضحى

لأن في بنات يدوخون ويموتون ويدشون عالم ثاني عالم وردي واحمر لوووووول

يبا قولي الحمدلله احنا مومثلهم لووول احنا نحب البسا6ة يحليلنا والله لوول

طموحة مملوحة يقول...

panadool


في شباب تشوفه رياضي يعني مهتم بجسمه هذا تمام تلقى حياته رياضة ومايحب المظاهر هذا تمام

بس اييلك الي عضل شوي ولقى بنت ع6ته غمزة قال بعد ؟ وراح تفخ بزود مادري شسالفة ام هذول صراحة

طموحة مملوحة يقول...

Engineer A


لا عاد في شباب فيهم خير

احنا وين رحنا ؟:q

طموحة مملوحة يقول...

Lotus


فديتج والله اخذي راحتج بالكلام يالغالية

شوفي انا اعترف لج انا بصراحة اح6 صوري بس مو القصد يعني نفسهم كنت اح6 صور المعارض الي اشارك فيها ووايد بنات يح6ون صورهم مع اهلهم ، اعتقد ان هذول مايح6ون صورهم كاملة خافون من الفضايح ونظرة المجتمع انا هم مالومهم وفي منهم الي تح6 صور جسمها علشان الشباب يعجبون فيها

اذكر مرة ح6ييت صورة عيوني شكثر ضافوني يغازلون على بالهم حا6تها ابي اصيد لوول مع اني والله ماكان قصدي هالشي

Hashimoto يقول...

لووول اختصر ردي بهالرسمة :

http://akabane-90.blogspot.com/2009/08/blog-post_23.html

==================


واي .. اعتقد نفس حالة البنات الي ذكرتيهم باول الموضوع

وشكرا !
P=

طموحة مملوحة يقول...

لووووووووول انا من ايام المعرض وانا حابة هالرسمة شكلي راح اشتريها منك هاشم :D

..pen seldom يقول...

صبـاح الخير ...

أمممم ...

أنا ما أدري .. ؟؟

الزمــن في حالة تغلَب ..؟

أم العقول في حالة تغلَب .. ؟؟

وإلا شنو صــاير .. ؟

يعنـي أحيانا إذا شفت الأمور العجيبه الغريبه اللي تصير حوالينا في الدنيا , تجيني حالة مو طبيعية ..

الله يهداهم بس ..بعضهم - قلت بعضهم -

يقضون ساعات وساعات عشان يبنون عضلة و " الهدف "

........... !

ويستصعبون ساعات لإعادة بناء عقولهم

وليصحَ قولي .. لإنارة عقولهم في ما يفيد دنياهم وآخرتهم ..

" بس شنقول "

زمـــــن .. يا كافي الشر ..


... أرق التحايا لكِ ..

:)

سلفي مجاهد يقول...

بسم الله الرحمن الرحيم

الحمد لله رب العالمين ، والصلاة والسلام على خير خلق الله محمد الأمين ، وعلى آله وأصحابه وأتباعه إلى يوم الدين ، أما بعد :

فإني رأيت الوصلة لهذا المقال في أحد المدونات التي أرتادها في هذه الأيام ، فشدني ودخلته فقرأته ، وياليتني لم أقرأه ..

ماذا عساي أن أقول إلا : تخنث الرجال ... !!!

وكل ذلك برأيي يرجع إلى أمور لم يفقهها إلا من أعطاه الله نعمة اتباع سنة رسول الله صلى الله عليه وسلم وأصحابه ، ولم يجهلها إلا من طمس الله على بصيرته أو منافق ختم الله على قلبه وسمعه وبصره ، قال تعالى { إن الذين كفروا سواء عليهم أأنذرتهم أم لم تنذرهم لا يؤمنون ، ختم الله على قلوبهم وعلى سمعهم وعلى أبصارهم غشاوة ولهم عذاب عظيم } ..

وهذه الأمور تتلخص كالآتي :

1) انتشار معالم الغرب الفاسدة القذرة في مجتمعاتنا الإسلامية ، فبيع الأفلام الغربية والترويج لها مع ما يعرض فيها من القُبل والمشاهد الجنسية ، وكذلك الموسيقى ، وكذلك انتشار المراقص والديسكو أو سميها ما شئتِ .
وهذا يرجع إلى الحكام الذين ولوا على المسلمين ، فبعد سقوط الدولة العثمانية قُسِّم العالم الإسلامي إلى دويلات وممالك تحت إشراف الغرب وسيطرته .
والشاهد من هذا : بعد الناس عن الدين بسبب الحلف الداخلي .

2) وجود المنافقين بيننا ، فهاهي المطالبات بإقصاء الدين والحرية في اختيار الديانة ، كلها لا تصدر إلا من منافقين أنتجهم الغرب وصدّرهم لنا ، وتناسوا قول الله العظيم { ومن يبتغ غير الإسلام ديناً فلن يقبل منه وهو في الآخرة من الخاسرين } .
والشاهد من هذا : بعد الناس عن الدين بسبب الحلف الخارجي .

3) قلة الجهود المبذولة في إرجاع الناس إلى دينهم وترك المحرمات واجتنابها ، فالتقصير أيضاً يأتي من الدعاة والمشائخ الذين قلة مداركهم وضاقت فحسبوا أن الدعوة إلى الله مع القدرة والإمكان ، ونسوا أو تناسوا وجوب التضحية في سبيل الدعوة ، وأن ثمار الدعوة المرجوة لا تأتي إلا بتضحيات وكفاح .

----------

أسأل الله أن يهدي المسلمين والمسلمات إلى السُّنة واتباعها ، ويجنب شبابنا وفتياتنا من الفتنة ورؤوسها .

لا أقول إلا : إلى الله المشتكى وعليه التكلان .

كتبه : سلفي مجاهد .

طموحة مملوحة يقول...

سلفي مجاهد

اشكرك اخي

طموحة مملوحة يقول...

..pen seldom

ماكفاهم الحليب بصراحة :) لوووول

سلفي مجاهد يقول...

بسم الله الرحمن الرحيم

من باب حب تبادل الخير بين الإخوة المسلمين وبذل النصيحة ، لدي مطلوب أخوي ليس إلا ، فأنا أدعوكِ لمشاهدة هذا الفيديو المميز على مدونتي :

http://salafimujahed1.blogspot.com/2010/01/blog-post_17.html

والله الموفق ..

سلفي مجاهد يقول...

عفواً .. الفيديو كان محذوف ... الفيديو الآن يعمل :

http://salafimujahed1.blogspot.com/2010/01/blog-post_17.html

أسأل الله أن يوفق الجميع لما يحبه ويرضاه ..

كتبه : سلفي مجاهد .