2010-02-08

ســـــوالف حريـــــم !!

في يوم من أيام هذه العطــلة الشبه سعيدة ، قالت لي شقيقتي الكبرى بأن الفتيات العزيزات بحاجة لنقاهة خارج البيت ومحد له خلق يوديهم :) ومادمت انا عاطـله عن العمل والدراسة فانا ملزومة اني اطــلعهم
هاليوم هذا كان غريب شوي وديتهم كذا مكان وماحسينا بالوقت أقعد انا بالكافيه اكتب مذكراتي او ارسم واهم يقعدون يسولفون سوالف غريبة شوي .,,,
الشخصيات الموجودة معاي ( فاطــمة ، مريم ، شهد ، منى ) أول ثنتين على وشك دخول سن المراهقة أعتقد مو متأكدة المهم اعمارهم 12 سنة
شهد 11 سنة ومنى 9 سنوات
مريم : تصدقين ياخالتي سارة أنا احب اطــلع معاج احسج تونسين .
سارة : خير خلصيينا بس طـلبي الي تبينه .
فاطـمة : اي والله صج عمتي كنا نسولف عنج انتي لج خلق لنا صج وايد تزفينا وعصبية حييل بس اذا مزاجج كان اوكي نحب نسمع سوالفج ونسولف معاج لأن تفهمينا .
سارة : انا ما افهمكم انا ابي افهمكم هذا أولا وثانيا أنا بعرف انتو شتبون لوول ؟
كملت قهوتي وقلت لهم قوموا علشان اوديكم مكان ثاني . ركبنا السيارة واهم ظلوا يسولفون يسولفون وراسي متصدعة حدي . حطــيت الاغاني وقعدت اسمع اهون من سوالفهم شوي .
لفيت ويهي ببطــــء ولا انصدم بالي مطـلعة من جنطـــتها بودر اساس و اديها على ويهها لووول والثانية ماسكة حمرا .
جان اشيل السماعة قلت : لحظة لحظة قلنا سارة وناسة وتحب تونسنا وفري كويت بس سالفة تستغفلونها هذي انا ماحبها .
مريم : خالتي شفيج ترا احنا كبار .
سارة : نعم ، اقول عيشي طــفولتج مالت عليج .
مريم : اشمعنى انتي ؟
سارة : لا تقارنين بين وحدة بعمري و طــــولي وبينج ... نطــــري لاحقة خلصينا مسحي .
فاطــــمة : هههههههه عيل ماشفتي فلانة الي معانا بالصف الي حافة حواجبها .!!!!
سارة : عفوا !!!!
فاطـــمة : اي والله حافة حواجبها وتروح الصالون تسوي سوالف الحريم .
سارة : خبلة تبين تصيرين خبلة مثلها ؟
مريم : خالتي والله في بنات عندنا يحفون ويحطــــون ماكياج كامل بالحفلات العادية .
من أيامنا والى اليوم والأمهات عندنا يبون بناتهم احسن من بنات الناس ، ( شي حلو ترا ) بس مو بالعقل ولا التفكيرولا الدراسة...... بالشكل ،وخاصة بنات المدرسات كانوا يغثوني دايم اهم قبل الكل واهم الي يرقصون بالمقدمة واهم الي ياخذون مكان البنات واهم الي يصفون أول شي .. لا تلوموني كنت نجرة مع بنات المدرسات من صغري لوول
المهم المدرسات استغفر الله مايعرفون يخلون بناتهم ياخذون درجاتهم بمجهودهم سوالف الواسطــــات ماتخلص ، على ايامي كانوا يفلون شعرهم ويحطــــون لهم كحلة وحمرة وبس ، اليوم الأمهات والمدرسات ينافسون بعض ببناتهم كل وحدة تكشخ بنتها على الآخر فأشوف الوان واشكال بنات يحطــــون ماكياج كامل عمرها ما يتجاوز ال10 سنوات .
الله يرحم ايام عجايفي وكنت ابجي عند امي اقول لها : بسوي تغيييير ابي عجفتين لوووول
الي حبيت اوصل له ان البنت الحين الي عمرها 10 سنوات اهتماماتها اهتمامات بنت ام 20 سنة
تذكرت بنت صغيرة عمرها 9 سنوات تشتغل مع امها في مشغل ، البنت تلف وتدور صوبي وتبي تسمع سوالفي مع البنات
قلت لها : مو عيب تتسمعين لسوالف الناس ؟
اهي : بعرف شتسولفون عنه !!
رديت عليها : عيب عليج هالكلام روحي يالله عند امج .
اهي : امي تعرفج تدرين ؟
انا : زين !!
اهي : مو انتي سارة بنت فلان الفلاني بيتكم قطــــعة الفلانية و .... و.... و...
انا : شهالكمبيوتر ؟ انتي شنو تقديرج بالمدرسة ؟
اهي : مولازم تعرفين .
بنت اختي تناديني وتيي صوب اذوني تقول لي : كلش مو شاطـــرة خالتي اصلا ما تداوم .
انا : عيل شلون حافظة كل هذا ؟؟؟
رديت للبنت قلت لها : روحي روحي ذلفي عن ويهي ياهل وياية تتحجى روحي قولي لأمج عيب تسولفين مع الحريم جدامي .
اهي : عادي اصلا امي تناديني علشان اسمع سوالف الحريم
قلت لها : روحي عيل لها الحين شوفي شتقول للحريم فكيني من ويهج .
اهي : ليش تحاجيني جذي ؟
انا : لأني ماعرفج ومادري شلون يبتي هالحجي هذا كله وعيب بنت بكبرج تنقل حجي وتتسمع لسوالف الحريم .
الي بعرفه الحريم يقولون التربية والتربية ومايعرفون يربون بناتهم ويخلونهم يعيشون كل مرحلة عمرية بدون مايخلون البنات يفكرون اكبر من سنهم .. الشي الي كنت اتمنى اني اكبر بسرعة علشانه هو ان امي ماتزفني وتقول لي نامي مبجر واسهر معاهم .
شرايكم بالي يشيلون حواجبهم وللحين ماكملوا ال11 سنة ؟؟
أحلا مقطـــــع :)







......
مقــــــولة اليوم






لا يبنـــي الثقة بالنفس واحترامها مثل الإنجـــــــاز

توماس كارليل ...... كاتب ومؤرخ إسكتلندي

36 comments:

panadool يقول...

اى والله فرق بين سوالف قبل والحين

موبس على موضوع حف الحوايب أو الشوارب , حتى على السفرات اللبس الطلعات وايد تصرفات تغيرت والله يستر من السنوات اليايه

Q8-HANDICAP يقول...

موضوعج هاذه حده حده حده مميز

وفعلا بنات هالجيل غريبين بشكل موطبيعي ترا حته الجيل الي اصغر مني يعني انا مواليد الثيمانيات وخواني الي اصغر مني مواليد التسعينات مع العلم مابيني وبينهم مسافره كبيره امبيه تصرفاتهم غير كلش غير

يعني وايد اشياء ماتعجبني

تخيلي بنت خالي اول مادشت الثنويه وهيا كله تحط ابويها مكياج وفل ميك اب لييييييش حرام والله حرام بعدج صغيره

وتخيلي حافه حواجبها من الثنويه واختي يوم شافتها تحن تحن امي خلتها اخر سنه بالثنويه تشيل

تخيلي لمن ساعات نبي نطلع حته لو الجمعيه لازم يحطون مكياج امبيه ان مومنصجكم

واختي نفس الشي ساعات اقولها ترا كلش ماله داعي تحطون مكياج وانتوا رايحين الجامعه اوكي حطوا بس قللوا من الفونديشن يقولون لي ترا احنا الي انحطه مايي ربع الي البنات ايسونه

ايحروني لمن يقارنون نفسهم بالعالم الخارجي

شرايج يا تخاريف لو اقولج عن نفسي والله يمكن تضحكين شرايج ان انا ماحفيت حواجبي من اول مادخلت الجامعه يعني شوي تيرعت لمن رحت 2 سنه ليش يوم شفت وحسيت ان شكلي شوي غلط

وشرايج ان المكياج ماحطه الا بالمناسبات الخاصه يعني شتغلت وليلحين ماحط مكياج ويحنون علي ايقولون لي على الاقل حطي فونديشن ومسكره وحمره بس اقولهم مابي

يعني بالدوام او زوارة اهل ماحط مع العلم ان الحمدلله البس وسوي شعري لكن مكياج مالي خلقه موماعرف بس احس ان هاذه مو ويهي الحقيقي الي لازم كل الناس تشوفه واحس اني مومرتاحه فيه

يعني الحين ابسط مثال لبلاك بيري امبيه صاير هوس الله وكيلج ولا اغراني ولا هزني ولا شريته مع العلم ادري ان لبلاك بيري فيه مواصفات ومميزات عاليه بس الناس تكرهج فيه وتعالي شوفي عند الكل الحريم لكبار والبنات الي من عمرنا واليهال

تخيلي بنت خالي مع اختي الي قلت لج عنهم الحين علشان راحوا الجامعه فيشوفون ان لبلاك بيري مايصير ان يستخدمونه اليهال فرديت عليهم قلت لهم مثل ما انتوا يوم كنتوا بالثنويه تلفون ومكياج وحف حواجب وانا كنت اشوف هالشي غلط انتوا الحين يايين تشوفون ان لبلاك بيري مايصير بيد لصغار اهمه يقصدون المتوسط والابتدائي كل سن يعيش دوره

شوفي تخاريف انا اييبها لج من الاخر اذا عشتي جيلج وجيل الي اكبر منج راح يشوفونج ان انتي قاعده تاخذين دور اكبر منج ونفس الشي معاج انتي تشوفين الي اصغر منج يعني ماراح انخلص

انا والله دايما اقول لو كل واحد يعيش على طبيعته جان والله الدنيا بخير

بس عاد انا اكشخ منج ماسويت عجايف كله كاريه (:

موضوعج وايد عجبني تسلم ايدج

why me يقول...

وييييييه على قولت المصريين


جيل بايز .. جيل عايز الحرء

اجتماعي يقول...

هدي أعصابج ..
إهي مو بس رادة على الحواجب ..

شوفي اليهالوو اللي اعمارهم ما تعدي 12 او 13 .. ويغازلون على البحر والمجمعات

لو رادة على المكياج والحواجب ..
جان تهون : )

ebtsamh يقول...

ممممم الله يرحم .. والغريبه مطلعه جنوني بخواتي .. بعض القنوات ممنوع بعض اللبس ممنوع بعض الاكل ممنوع بعض الكلام ممنوع ..

من عذرهم عيل راسهم كبران دام هذي سوالف الجيل ..

يالله السلامه بس ..

مشكوره ساره ع الطرح ..

مـي يقول...

ياليت يقلدون الكبار بالأشياء الزينة من سلوك وتعامل وفكر !! بس يقلدون بالمكياج كأقصى طموح لهم !
قبل امس بالزوار وحدة من البنات عمرها 11 تقول امنيتي لما اكبر احط مكياج واركب سيارة كشف واروح السوق !!
بالله هذا طموح !

غير معرف يقول...

بصراحه صادقه في كل كلمه
مستعجلين هالصغار على شو ما أدري

بصراحه انا ضد هالشيء وضد الام اللي تشجع على هالشيء
واتوقع بعض الامهات عندهم فكرة انها ماتحرم بنتها تقول خلي البنت تهتم بانوثتها وتستمتع فيه عشان بكره لا تصير بويه

على فكره مدونتك ابدااااع مثل صاحبتها

اختك هاجر

الوتيــــــــــن يقول...

هههههههههه خوش مقطع .. علشان جذي لازم تقعدي كويس

عزيزتي تخارف طموحة .. الكلام اللي قلتيه صحيح مليون بالامية .. والدليل اني من ادش الصف اعرف بنت المدرسة من غيرها .. البعض مو الكل

مسألة حف الحواجب خبرج عتييييييييج .. من كنت بالفيحا ميداني وتيني بنوته عندي متفوقه تب تتشيل عني كتبي .. ولا أقول لها .. سارونه ليش حافة يمه؟ ولا تقول : هاذي الهندية الخايسه قرمتلي حواجبي ضعفتهم ولا ماكنت ابيهم جذي ..!!!

قتلها امج تدري؟

ضحكت بويهي ضحكه حسستني اني من العصر الحجري وماسكه بيدي عصاة انسان اول تعرفينها؟

قالت امي موديتني معاها

فا قلت في بالي : إذا كان رب البيت ..."

لا تقارنينا فيهم ياخيتي .. بنات الحين والله تنبط جبدي لمن اتيني الوحده ومسويتلي عمرها حليمة بولند الحلوه .. تناديني ابلااااااااه .. اقولها انعدلي لا اعدلج

ترد : ابلاااااه اشفييييييج عادييي

واي لوعه مياعتهم المصطنعه

اذكر ايام اول اقول لأمي يمه زهقت من العجفة .. تروح تسويلي عجفتين يعني مغيرة .. واسكت طبعا لا تسويهم اربع اعجف

اللي بوصلة عزيزتي . انج ذكرتي موضوع مهم جدا جدا جدا .. ان الواسطه لو تدخلت ولو بشكل بسيييييييط .. راح تخلف وراها دمار كبير.. وكافي إن البنت تتشرب مبدأ الواسطة من صغرها وتعرف انها من خلالها تقدر تسوي و اهي مرتاحه اللي محد يقدر يسويه بمجهوده وتعبه والتزامه بالقوانين

كان طموحي إني اصير ناظرة .. لكن ماصارلي سنتين بالتدريس واتمنه اليوم قبل باجر إني أطلع .. لان الإيد الوحده عمرها ما تصفق إلا على الويه .. يعني التعب والإخلاص راح يُقابل بصفعة مهينة

وزين تسوين فيهم .. غيرتي اللي تقدرين عليه واخذتي أجر وغرستي قيمة ولو بالقوة .. بارك الله فيج :)

Engineer A يقول...

جيل "الله يستر عليه" والشرهه مو عليهم والله على امهاتهم!!

الله يعينا ويقدرنا على ان نربي عيالنا عدل يارب ..

ويعطيج الف عافية :)

اقصوصه يقول...

اممم

في ناس وايد

هذا هو مفهوم التطور عندهم

انهم يسون اشياء قبل اوانها

بعذر ان الحياه تطورت

ولىسف هو هذا مفهوم التطور عندهم:)

حياتي هدف مو عبث يقول...

احنا مساكين سارة

ذيك المرة شفت بنات صغار يتمشون واشكالهم غريبة سواء لبس ولا تصرفات
سرحت فيهم من كثر اللي شفته

الله يستر عليهم وعلينا

حَافِـيَةُ الَقَدمَيّـنْ ولِبَاسِي المَطـرْ يقول...

اذا على سالفة الحف عادي إذا كانت بآخر سنه من الثنويه او ثالث سنه
مو شغله عيب ان البنيه تحف
لأن مردها حق هالشغله
وفي ناس يستغنون عن هالشي
بس المصاخه تكمن وين ؟
باللي بالمتوسط ومسوين روحهم كلش

رورو الشخبوطه يقول...

الشره مو عليهم ع امهاتهم ..

للمجتمع تاثير بس الاهل تاثيرهم اكبر..

ومشكوره..

شاي الضحى يقول...

الكل يقول بهالزمن ماكو براءه

انا اشوف السبب من الأمهات الي ربوهم على جذي

وهالامهات نفسهم تربوا على البراءه بس للأسف ما علموها عيالهم

كل ام تشوف بنتها كبيره وتعاملها معاملة الكبار واهيا توها نونو

وما اوقفت بس على المكياج على اشياء اكثر من المكياج

الـسـنـبـلـة يقول...

ثقافة الإعلام و المسلسلات و الأفلام التي رسخت صورة المرأة بشكلها و جسمها مو بعقلها و تفكيرها

الله يهدي الكل

Made n Q8 يقول...

الغلط من الامهات تشوفينها على بو ان تبي تسوي نفسها ام عصريه ادخل بنتها بالكبيره والصغيره اتوديها معاها الزوارات واتقعدها بوسط الحريم وانتي عارفه الحريم لي فجوا حلوجهم ! و هم روحه الصالون مالها داعي تقعد تشوف الي ما ينشاف وجم مره اشوف امهات يدخلون بناتهم صوب الملابس الداخليه والبنات مبحلقين عيونهم وطبعا ماننسى دور الاعلام والتلفزيون..

والترصص باللبس والحركات البايخه والمكياج الاوفر خلي على صوب.. والله يوم كنا بعمرهم كنه كمخه ماندري وين الله قاطنا لي حطينا الزبده قمنا نتخشش نخاف لا يجكونا !!

غير معرف يقول...

ممكن اسألك سؤال خارج الموضوع؟؟

اناعندي موهبة الكتابه واريد اكون محرره مثلج في بعض المجلات ؟؟شلون ؟؟يعني انتي طرشتيلهم طلبج ولا كيف طريقتج اذا ممكن

اذا ما تريدين تجاوبين على راحتك

ومشكووره

Makintosh يقول...

المشكله الحين محد يعيش على عمره .. اهيا مسأله قناعه من البنت نفسها
انا مواليد 86 يعني لحقت على سوالف الحف بالثانويه والمكياج
لكن ما كنت اسوي ولا شي مثلهم .. كنت احس بعدي صغيره
حتى الجنطة ما شلتها الا لما رحت الجامعه

الحين المراهقه والموظفه نفس الشكل حسبالهم وناسه

طموحة مملوحة يقول...

panadool


اصلا حتى اول الحريم لي سولفوا يوخرونا عن سوالفهم علشان لا نسمع الحين عادي لوول

طموحة مملوحة يقول...

Q8-HANDICAP


تسلمين يالغالية

حب البنات من صغرهم للماكياج واللبس شي ‏فطري بس كنا على كثر مانحب هالشي محرومين منه ونتشوق نكبر علشان نح‏ط بس الحين كل شي يبونه موجود اول بالعروس يالله حمرة خفيفة وكحيلة الحين ماكياج كامل وفشلة الي ما ويهها فاضي لوول

طموحة مملوحة يقول...

why me


لووول الحرء مرة وحدة ؟ لوووول يالعنيفة

طموحة مملوحة يقول...

اجتماعي

اي صايعين يحليلهم لووول

السؤال اهو :

متى راح يملون ؟ لووووول في مراهقة متأخرة الحين مراهقة مبكرة جدا لووول

طموحة مملوحة يقول...

ebtsamh

انتي مالاحظتي ليش اغلب البنات الصغار الحين لسانهم يوصل لأخر الديرة ؟ تعلموا يقوون شوكتهم لووول

طموحة مملوحة يقول...

مي


لوووول مسكينة والله ماكو من كلامها ولا شي علمي لووول

طموحة مملوحة يقول...

هجور

بعد عمري انتي والله على بالي هاجر اختي اهي الي ردت قلت العادة تستهزئ بمدونتي لووول

مشكورة يالغالية :)

طموحة مملوحة يقول...

الوتين

الحمدلله اني مو مدرسة ولا جان فقدت نفسي لوووول

مصيبة هاليهال والله لو عيالي ادوس على راسهم لوول

طموحة مملوحة يقول...

Engineer A


لا نعلم شيئا عن الاجيال القادمة لذا الحمدلله لي هني وبس باجر ماندري شراح يسوون لووول

طموحة مملوحة يقول...

اقصوصه


اي سوالف احر رفيجاتي لوول

طموحة مملوحة يقول...

حياتي هدف مو عبث

امس كنت طالعة مع رفيجتي وقعدنا نسولف عن طفولتنا فقالت لي اول مانكشخ الا بالعيد ونحس بالعيد صج الحين البنات كل وقت يكشخون وكلشي يبونه موجود علشان جذي عندهم العيد مثل اي يوم عادي ماكو شي يتغير

طموحة مملوحة يقول...

حَافِـيَةُ الَقَدمَيّـنْ ولِبَاسِي المَطـرْ

بصراحة أنا أول مرة حفيت حواجبي بسنة ثانية ثانوي لأن حواجبي كانت عفسة بصراحة ولا أمي تقول لي خلي الي بالنص وشيليهم لمن تتزوجين بس كانت كارثة فصرت اشيله لووول

طموحة مملوحة يقول...

رورو الشخبوطه


صح كلامج رورو

طموحة مملوحة يقول...

شاي الضحى
موبس الامهات لمن البنت تشوف الي معاها جذي تصير تقلدها فتلقى الام صعوبة انها تسيطر على بنتها للأسف

طموحة مملوحة يقول...

السنبلة


ولا تنسين القدوة الاعلامية لوول

طموحة مملوحة يقول...

Made n Q8



لوووول يسوون جذي علشان تصير بنتها شخصيتها قوية الحمدلله والشكر

طموحة مملوحة يقول...

غير معرف

افا عليج اساعدج ونص ايميلي موجود بالبروفايل ان شاء الله راح اساعدج بالي تبينه يالغالية واكلم لج الي اعرفهم يساعدونج لأني حاليا موخرة عن الصحافة لظروف الدراسة

طموحة مملوحة يقول...

Makintosh


انا كنت اتمنى اكبر علشان اشوف تعامل الناس معاي على اني كبيرة لأني لمن كنت صغيرة واقعد اتفلسف محد يسمع لي لوووول