2010-02-15

مذكرات مخرفة شوي ..!!!!

مادري ليش اليوم متفاءلة جدا


صباح المدارس وازعاج الاذاعة المدرسية بالمدرسة الي يمنا



احب اسمع النشيد الوطني والقرآن



واتذكر لمن كنت اشارك باذاعة المدرسة وكنت اروح الاذاعة علشان انام هناك لمن اكون نعسانة حدي ..


مدرسات الاذاعة للحين اذكرهم واذكر شلون اكون مشتطة حدي أبي أقدم بالاذاعة المدرسية ، وكنت اتمنى اصير مذيعة حزتها


كانت تجربة حلوة ، أقعد أفكر بكلمات حق المقدمة بدل المقدمة الي (تعودن) عليها الطالبات ، كنت فاشلة بالتمثيل مرة وحدة بس خلوني امثل وخذيت دور الخدامة علشان شعري طويل سوولي عجفة وقصوا علي روحي خمي وانتي ساكتة لوول


أتذكر لمن كنت اغني اغاني وطنية و ( حماة العرين ) لووول كل مدرسات الموسيقى لو شافوني الحين بيعرفوني :q



رحت مدرسة اختي علشان اسوي تغطية لندوة عندهم سبق ونشرتها بمدونتي ، وشفت مدرسات كانوا يدرسوني من أيام المتوسط وحدة من المدرسات انصدمت ( سارة البطة ؟؟ امبي صرتي رشيقة ماشاء الله ) ، بصراحة لا رشيقة ولا شي بس الطول هيبة وقاص على الناس ، وانا مبتسمة واهي تحاجيني جان يعتفس ويهي لمن قالت ( كنتي متسلطة وأنانية ... وتبين انتي بس الي تجاوبين بالصف ) أنا شوي وابجي قعدت افكر امبي ليش كنت جذي ؟؟ لا ومابي احد يجاوب واذا جاوبوا ادور على اجابة ثانية علشان اقولها حتى لو مو صحيحة

وكانوا مدرسات العلوم كل ما يسوون تجربة اقول انا مسويتها في البيت بيصير جذي وجذي ... يزفوني وايد !!


جان زين ظليت أم قليب للجامعة الحين بس ابي انام ومالي خلق ادرس متى اتخرج بس ..


الي تدرس بمدرسة انصحها تستمتع بالمرحلة هذي لأنها احلا مرحلة بصراحة وانا قزرتها حدي بالمدرسة بكل النشاطات كنت اشارك ومجلس الطالبات كنت ما اتعب نفسي ارسم للبنات رسمات كركتيرية واعلقهم على الطوف وافوز ، ولا مرة دشيت غصب وحطيت ورقة وحدة بس ما اذكر تفاصيلها بس اذكر اني قلت اني دشيت غصب مو بكيفي والي يبي يصوت اهلا وسهلا وماعندي وقت اسوي حملة اعلامية اكتفي بهالورقة والانتخابات افعال مو بس ورق ونقطه بعدين ، و كنت مريحة اعصابي لمن فزت تضايقت بصراحة :)


أذكر وحدة من البنات يايتني : تكفين سارة توسطي لي بيفصلوني تكفين سارة تكفين !!

دشيت انا حدي عايشة الدور جني عضو مجلس أمة ، سولفت مع الاخصائية ونقعت البنت برا ، وضحكت وخلصت جان اقول للخصائية ماعليه علشان خاطري والاخصائية قاعدة تضحك واحسها بنفسها تقول : مو جنه عطيناج ويه سارة ؟؟!!!

راحت البنت وهي مستانسة وتسولف للبنات حسيت اني هيبة




وكل ماشوف مدرسة برا اخزها وتخزني جن بنتكافخ بعدين اروح لها ابلة فلانة ؟؟؟ انا شطولي واهي قزمة شكلنا يفشل صراحة ..


ولا الفشيلة اذا مدرسة من اهلي كانت تدرسني وللحين اسميها أبلة :q


الشغلة الأساسية الي تخليني ما اصير أبلة إني ما أبي وحدة تييني شكبرها تقول لي انا درست عندج ابتدائي ، راح احس اني احفورة تصارع للبقاء حية .



حتى الموجهات الله يذكرهم بالخير يذكروني ، ويسألون عني ذاك اليوم لمن قالوا لي حسيت ببجي لهالدرجة يحبوني ؟؟




الشي الوحيد الي حبيته من الروضة للحين اهو المايكروفون ، ما اخاف منه كلش واحبه حييييل بشكل رهيب




ولو اني مالي خلق ادرس بس مشتاقة للجامعة لاعت جبدي من الاجازة بصراحة


فرفشة ومذكرات فرفوشيت ادري مالها هدف بس مزاج الصباح العليل :)



شوفوا رسمتي اليديدة بمجلة سوالف العدد اليديد وابي تعليقاتكم لو سمحتوا :)


واقروا لقاء ملكة جمال العراق ردودها راكزة وحلوة وعجبتني بصراحة مو خبلة وتتصنع الخفة غصب :)
أحب أوجه رسالة الى قناة MBC3
أقول فيها : يا تحطون الرسوم كاملة يا ما تعرضون شي كلش ،@@ يعني بعرف الباباي مافيه لا بوس ولا سكس شكو يحذفون مقاطع من كيفهم ؟؟ مالكم خلق ترا احنا لنا خلق نشوف ، حلايا البابايات الي تحطونها اشوف كارتون نت وورك احسن ، غثوني ولا ايي الباباي الي حافظة كل الكلام الي فيه اهم يتكلمون وانا اتكلم انا اكمل كلامي وانصدم الباباي خلص اقول لحظة في بعد مقاطع شكثر حاذفينها ، شدعوة يعني شدعوة !!!! رجاء لا تحذفون شي ولا حولوها قناة ثانية عيل شلون تبون الأطفال يتابعون واهم ساكتين ومو مسويين ازعاج لأهلهم مثلي ؟ :q



والى مقولة اليوم الي حبيتها بصراحة





لا تثق فيمن لم يجلب معه كتاب



دانيال هاندلر ....... مؤلف أمريكي

22 comments:

Q8-HANDICAP يقول...

واااااااااااااااي

اتعرفين جم سنه رجعتيني يمكن 7 سنوات

امبيه هذاك اليوم انا رايحه امشي بالممشى ولا لقيت وحده من مدرساتي ماحبها ولا اكرها المهم سلمت علي وحالتها حاله من ضمن الكلام قالت لي ها تذكرينه ولا بعد ناسيتنا بيني وبين نفسي عرفتها اكيد بس ناسيه اسمها امبيييييه فشله فقلت لها لا افا عليج ابله شلون ماعرفج لووووووووول

بس صج صج مشتهيه اجوف ابلاتي الي احبهم

بس ولا مرا فكرت اني اروح مدرستي مع العلم مدرستي اهيه كانت بيتي الثاني تخيلي من اولى ابتدائي لي رابعه ثنوي يعني عمر مو شويه

بس احيي فيج ثقتج بنفسج الكبيره مشالله وحبج للمايك

على الاقل عارفه شنو اهيه هوايتج لكن الي مثلي عقب هالعمر تخيلي عمري 24 وتوني اكتشف اخر سنتين اني اميل للسياسه وطلعت احبها حته لو ضيق الخلق معنه مجال دراستي وشغلي بعيد عن هالشي

why me يقول...

لول

والله كنتي شيطانه


بس عجبني دور الخدامه لوول

وانا بعد كنت احدى طالبات الاذاعه برستيج
;p

خُـنْـزُبْ يقول...

وييييه خليتينا نتذكر ايام الشطانه
و حنا صغار بالمدرسه ، الحين فرحتنا
بشطانة عيالنا صج ماهي مثل ايامنا
قبل بس فيها روح الحيويه و الحركه
اللي تخلي هالدنيا فيها جمال
تسلمين يا جميله عالموضوع .
تحياتي .

ebtsamh يقول...

والله يا استاذه ساره انتي بأحلى مراحل
حياتج مو بالمدرسة ..الجامعة غيرررررررر
جد كانت أحلى ايام حياتي اللي
اندفنت مع الوظيفة :(
أحب أضيف شغله يمكن انتي ما لاحظتي بس
آنا بسوي ورشة كامله عن قصة رسومات mbc3
آنا انسانة تربويه وتفرق معاي فيها وايد سلوكيات غلط قصه البوس والبوي فريند حتى النظرات هذي لما تغرس في عقل الطفل من سن صغيره تسببله تبلد وتعويد يعني مع الفجة الكبيرة والتساهل اللي صار بالتربية تسبب دمار
آنا شخصيا مانعة هالقناة من سنين , زين الله يبشرج بالخير لما قلتيلي قطوا
أن يأتي الوعي متاخرا خيرا من ان لا يأتي مطلقا ..

استمتعيي ..

بنت الشاميه يقول...

اياااام الدراسه كلهاااا ما تتعوض
مقارنه بالحياة العمليه والعائليه

احلى سنين العمر...ياريتها ترجع
بس انا عندي اياااام الجامعه امتع مل المراحل......كانت اياااام
لو اخير باي ايام ترد
اتمنى اياااام الدراسه بالجامعه
لوووووول

بس انت صج كنت انانيه ومتسلطه
؟؟؟؟

ههههههههههه
الله يهداها هالابله.....ليش ما قالت
انج كنت شاطره ومتفوقه ووميزه
يااااا الله يا محاسن الالفاااااظ

يعطيج العافيه .....بوست غير
مشكوووووره

طموحة مملوحة يقول...

ابتسامة


تكفين حكاية لعبة فيها شي موزين ؟ @@

شايليين نص الباباي


كل التعليقات راح ارد عليها وحدة وحدة بقعد اسولف واخذ راحتي بس خل تنترس الصفحة وبرب باخذ لي شور لووول

Seema* يقول...

يحليلج كنتي نزغة!
تدرين شنو أسوأ من ان الناس تتذكر الشخص بعد كل هالسنين؟ اهم ما يتذكرونه بالمره.
:)

الزين يقول...

:))

يا حليلج يا طموحه

كنتي Geek

سوري لا تزعلين
بس انا كلش مو صوبج
انا كنت شاقه الأرض وطالعه
شاطره بس شيطاااانه

واستدعاءات ولي الأمر ابد
تهففف
رايحه رادة
وجم مره اهلي نقلوني
بس عدت على خير

صباح الذكريات الجميله

شاي الضحى يقول...

دامج احسن من اعضاء المجلس عيل تعالي توسطيلي احسن من نطرة الديوان هههههههههههههه

احلى مرحله كانت المتوسط كنه شياطين ومطلعين قرون للابلات

وايد اصادف الابلات الي ما احبهم واسوي روحي ما شفتهم لووووول

بس في ابلة درستني باولى روضه تعرف امي مره سلمت عليها جان تقولها وين بنتج الي طقتني لووووووووووول لاني كنت كافختها بالجوتي يحليلها ليلحين ما نست

دور الخدامه سويته بالجامعه بس متطور وفي حوار مو نفس دورج هههههههههههه

Made n Q8 يقول...

لوول

انتي زين عطووج دور الخدامه يعني ويهج بين عيل انا الي لبسوني دائره ماادري مثلث واااي كان خيسه وحر اهي اهي

طموحة مملوحة يقول...

Q8-HANDICAP



لووووول صدقيني مع الايام راح تكتشفين ان عندج مواهب كانت دفينة لووول

اي ساعات اشوف مدرسة كان لي معاها موقف مع ان هالشي قديم وعادي بس مادري ليش احس للحين حاقدة لوول

طموحة مملوحة يقول...

why me


كشخة بنات الاذاعة لوووول

لا ماكنت شيتونة بس كنت هبلة شوي لوول

طموحة مملوحة يقول...

خُـنْـزُبْ


الله يستر لووول ذكريات حلوة والله

طموحة مملوحة يقول...

ebtsamh


الجامعة وناسة والله بس ادري ان ايام الجامعة مع الي قبلنا أحلا لأن كل سنة والجامعة تصير بايخة والله

طموحة مملوحة يقول...

بنت الشاميه

والله ماكنت حاسة بنفسي صراحة لووول لمن حاولت اتذكر ايامي حتى بايام الابتدائي كنت بس ابي انا الي اغني لووول مينونة

طموحة مملوحة يقول...

Seema*


لووول اي والله

طموحة مملوحة يقول...

الزين

لووووول انا كنت هادية بأيام الدراسة بس كنت خبلة الحين صرت ام
الش6انة لووول

حدي كنت شا6رة والله :( حسافة ماصرت الحين geek نفس اول لووول

طموحة مملوحة يقول...

شاي الضحى


أيام الروضة كنت حدي مليقة وكل الصبيان والبنات بصفي يكرهوني لوول حتى لمن غبت كسروا لعبتي لووول

طموحة مملوحة يقول...

Made n Q8


لوووول ماتحسين ان الابلات لعبوا بحسبتنا ؟ لووول

رورو الشخبوطه يقول...

وااي اكره المدرسه ويبطون جبدي الابلات ..

من جذي مادشيت تربيه..

وبالثانويه كنت مثل حالتج اطول من الابلات ويع شعور خايس خخخ..

مشكوره..

طموحة مملوحة يقول...

رورو


لوووول احس كلامج من قلب لوووول

جده غير يقول...

تخاريف حلوه ومملوحه :)



والمقوله تؤخذ بالاعتبار


ودى اعلق على موضوع على الدقباسى بس طويل وما لى خلق الحين اقرا اللى كاتبه

لكن اذا جا مجال قريت ورديت عليه

بس اى صح قبل انسى


الدكتور محفوظ ابوج الغالى باى مكان واذا عنده تليفون دزيه امر اسلم عليه واقوله ترا ساااره تسلم عليك وتذكرك بالخير وتدعيلك


والحين اشوف النوم ينادينى له حاجه فينى ;)


ودمتى بالف خير