2010-09-04

زوارة إبليس !!!



رسالة الى الفنانيين اللذين لا يستحقون كلمة (( القدير )) قبل اسمه .

سعاد عبدالله وحياة الفهد وجميع الفنانيين الكبار

أعتقد أن زمانكم الجميل كان قديما واليوم ليس يومكم ، لا تدمروا فنكم الراقي القديم بمسلسلات هابطة كالتي نراها كل يوم .


اعتقد ان السنوات الماضية مع هذه السنة كانت البداية لطرق باب رمضان حتى يعرضوا فيه مستقبلا مسلسلات (سكس) علني دون اللجوء الى الايحاءات وتوصيل المعلومة بطريقة غير مباشرة ,

اعتقد ان مجتمعنا يحمل رسائل كثيرة لازالت في طي النسيان هي افضل من عرض واقع لبيت واحد في الكويت يعيش أسوأ حالاته من خيانة ، مشاكل نفسية ، مشاكل عاطفية، مشاكل مادية وغيرها ...

و أوجه رسالة خاصة لكل من يعتقد ان البيت الكويتي هو البيت الذي يعرض في التلفاز ... لا طبعا
لايملك كل الكويتيين هذه النفوس الرديئة التي تعرض ، ولا يملك الكويتيين جميعهم افخم السيارات وأغلا الساعات وكأن الحياة في الكويت كلها مظاهر ... لا طبعا

لا يعيش كل الكويتيين هذه الحياة المترفة المبالغ فيها في المسلسلات ...

نساء الكويت لسن مغفلات كما يعرض في التلفاز

هنالك العديدمن الرجال في الكويت من يقدر ويحترم العلاقة الزوجية ولا يخون زوجته . . .

لا أشفق الا على حال الاعلام في الكويت ، واشفق على قنوات تعرض تارة برنامج ديني وتارة برنامج ايحاءات جنسية فلماذا التناقض ؟؟

انا جريء يا رمضان

سامحني يا رمضان

انا جريء يا رمضان

سامحني يا رمضان

مايخالف امصخها يا رمضان

استغفر الله واتوب اليه يا رمضان


كفاكم مسلسلات غبية واعتقد ان الدولة بحاجة لمرافق جديدة للسياحة يجب الاهتمام بها ، اعلم اني دخلت في موضوع أخر ولكني قابلت كاتبة بريطانية خارج الكويت وكنا نتحدث عن الاماكن السياحية فأعطتني رقمها والايميل الخاص بها وقالت لي بأن أرسل لها رسالة اكتب لها فيه عن الاماكن السياحية في الكويت .. واين يذهب الاطفال في الكويت ؟؟ وما الذي يحتاجون اليه الاطفال في الكويت ؟ بصراحة اشعر بالحرج حتى اليوم لم ارسل لها شيئا لأننا لا نملك في الكويت سوى المجمعات التجارية


عيد ...... في المووول

رمضان..... في المووول

العيد الوطني ..... في الموووول

زهقانيين .... في المووول

عطلة .... في الموووول


ماذا نملك في الكويت ؟؟؟ المركز العلمي ؟؟؟ غيره !!!!! الافينيوز .؟؟؟؟ غيره !!!!!!
ماذا نملك .. أبراج الكويت ؟؟؟ قديمة ...

أين العقول المنتجة في الكويت ؟؟؟ لا أرى التطور فأين التطور ؟؟ وأين الافكار ؟؟

ماذا سأقول لها ؟؟ تريد نشر كتاب عن أطفال الكويت والاماكن التي يذهب اليها الاطفال في الكويت ..!!!!!

احراج .......... أعلم ذلك :)

ــــــــــــــــــــــــــــــــــــــــــــــــــــــــ



مقـــــــولة اليــــــــوم :






يبدا الغضب بالحماقة وينتهي بالندم .....> صح حد أمه صح


فيثاغورث ..... فيلسوف ورياضي اغريقي




60 comments:

Seema* يقول...

خسارة أن ينهي عملاقة حياتهم الفنية بخيبة كبيرة أمام الجماهير.

الطفل.. ولا أنا أعرف الإجابة عن سؤالك!

أهل شرق يقول...

كلامج صح حد أمه صح

طموحة مملوحة يقول...

seema


منو يعرف الاجابة اذا انتي ماتعرفيين ؟ خلاص عصبت .. لووووول

حالنا صعب .. اصعب من الخيانة بصراحة لوول

طموحة مملوحة يقول...

أهل شرق


لووووول هذي كلمتي الي دايم اقولها اذا ايدت شغلة لووول

آهات وطن يقول...

رساله ياليت تصل الى هؤلاء الفنانين شوهوا صورتنافن بلا رساله لايستحق التقدير

حسين مكي المتروك يقول...

للأسف، المسلسل على الرغم من الإخراج الجميل والتصوير المميز، إلا أنّه عابه التكرار الكبير في اللقطات وطريقة العرض المتكررة، وهذا أعطى للمشاهدين نظرة سيئة عن الأحداث، والذي -زاد الطين بلّه- هوَ كم الخيانات والسوء في هذا المسلسل كبيرة جداً،

على الرغم من أنّ المسلسل مُتابع، إلا أنّه سيء جداً ولا يرقى للعديد من المسلسلات الهادفة، فإلى الآن لم أجد هدفاً سوى تفشّي الرذيلة في المُجتمع، قد تكون هناك ردّة فعل عكسية تبحث عنها الكاتبة إلا أنّ العرض لم يسعفها أبداً!.

كويــتي لايــعه كبــده يقول...

زوارة اسنسير
انتي تشرهين على المنصور الممثل في "ذئاب لا تأكل لحوم البشر" في الثمانينات وسعدية عبودي كردية الأصل أم مجرد عراقية لا أعلم؟


السياحة الكويتية وأماكن للأطفال؟

دبي

7osen يقول...

انا اشوف مسلسل زوارة خميس من انجح المسلسلات ... الأخراج رائع .. القصة متقنة وجريئة .. الحوار أجمل مافي المسلسل .. هبة حمادة ابدعت في كتابته ...

وبالنسبة للبيت الكويتي طبعا مو جذي .. لكن هالامور موجودة اكيد ودور المسلسلات انها تبين عيوب المجتمع ومشاكله .. يعني لو كان المسلسل عرض عائلة متفاهمة تعيش بحب وسعادة ورضا .. وين القصة هنية وين العقدة وين المشكلة ..

الفن بكل جنسياته يعرض مشاكل المجتمع وأمراضه ..

أعتقد من الظلم إنك تقولين عن هالمسلسل بالذات المميز والرائع بصدق .. إنه زوراة إبليس .. واعوذ بالله من ابليس ..

تحياتي

le Koweit يقول...

ارسليلها قوليلنا عندنا المدينة الترفيهية :)

Katkoota xD يقول...

المسلسل حلو و ناجح و الدليل نسبه متابعينه وايد

اتوقع الهدف منه كان عرض مختلف الظواهر السلبيه

و المشكلات الاجتماعية في اطار عائله واحده

بدلاً من اظهار عائلات مختلفة ...

و عن الطفل ..

ممم .. اهيا مو تبي تكتب عن الطفل الكويتي

عيل قوليلها اسامي المجمعات .. الشاليهات

المدينه الترفيهيه .. الشعب .. قهوه شعبيه مثلاً

عادي .. كل شي يصير .. لا تنسين البحر xD

reemas يقول...

كلامج يبرد القلب فيهم
و انتي تكلمتي بلسانا كلنا

عاضـه يقول...

سيج بالخير

آآآآه يا قلبي
ليش الحره يا طموحه

عراب الدستور يقول...

مسلسلاتنا عبارة عن لحم ابيض

بدلا من استيراد اللحم الاحمر حتى نراه على موائدنا

الاعلام يقدم لنا لحم ابيض رخيص على شاشات قنواتنا الفاضلة


في لقطة لا يمكن انساها و بحكم اني اعلامي انا متأكد انه ماله داعي و يمكن التغاضي عنه

و هو مشهد الرجل العاجز مع زوجته

و يمكن استبداله بمشهد اخر عن تهرب الرجل من الزوجة بدلا من هذا الايحاء الفاشل

ميمة السبيت يقول...

** حرااام المسلسل حده حلو و قوي الكل يشوووفه يعور القلب و على فكرة كل الحالات الموجودة فيه صارت بالواقع

- سعاد عبدالله و محمد المنصور كانوا و مازالوا و راح يظلوون بالقمة

سمو الأميرهـ ..ツ يقول...

مرحبا طموحة ...

سبق وعلقت في مدونة الأخ سعد المحطب

انه فكرتي عن المجتمع الكويتي قبل لا أدخل عالم التدوين ،كانت مقتصرة على ما آراه في المسلسلات ، وهالنظره تغيرت منذ تعمقت في التدوين والمدونات الكويتية ..
فاحمد الله أن أرشدني إلى هذا الشي ..قبل أن أظلم مجتمع طيب مثل مجتمعكم

====
لا زلت أدخل في نقاشات حادة مع بعض من من حولي ، اللي تكون نظرتهم مقتصرة على المجتمعات العربية من خلال ما يشاهدونه في المسلسلاات والتلفزيون
فيعممون الخطأ على المجتمع بأسره
===
و خلال الفترة الأخيره ظهرت مسلسلات إماراتيه شهوت مجتمعنا الإماراتي أيضاً واظهره مغايراً تماماً للواقع ،
===

يعطيج العافيه طمووحه :)

المُهاجر يقول...

1. بالنسبة لي، منذ 20 عاما لم أر "عمالقة الفن" الذين عرفتهم صغيرا في الثمانينات، من خلال "خالتي قماشة، الغرباء، مدينة الرياح، باي باي لندن، فرسان المناخ، حامي الديار"، والقائمة تطول. لذا، لم يفاجئني مستوى مسلسلات هذ العام فقد تعودنا على هبوط الفن... كما تعودنا على التراجع في كل شيء آخر في وطني!

2. سؤالها مُحرج جدا! ذكرني بسؤال لدكتورة لإحدى مواد تخصصي قبل أعوام، حين قالت: "ماذا لديكم غير النفط؟ ما هي الصناعات التي تشتهر بها الكويت؟" فكان جوابي: أأأأأ...!

تحيتي،
المُهاجر

ابو عبدالملك يقول...

أنتي ظلمتي الكويت
شلون مافي أماكن سياحيه
ليش وين راحت المناظر الخلابه بالصليبيه والمنتجعات السياحيه بتيماء ووين راح أستاد جابر اللي يطل على منطقة الحساوي التي حولتها الكويت الى مدينه سياحيه للتزلج على الجليد
أعتقد أنج ظلمتي الدوله

أما بخصوص المسلسلات
أحد المرات وجدة نايف الراشد
سلمت عليه قالي الليبراليين يكرهوني لأني أحبكم بالمطاوعه وأطلعكم بمسلسلاتي

لكن ماتمشي علي الأمور هذي أحتفلت فيها ريحت جبدي

ابو عبدالملك يقول...

والله على مااقول شهيد

غير معرف يقول...

http://www.darmuseum.org.kw/EnDaiChildren.cms

و غيرها كثير

نجــــري يقول...

ليست المشكلة بالقصة والايحاءات الجنسية,الخطا في ان هذي المسلسلات تخاطب شريحة معينة بالمجتمع ويتناسى الي عقول الكتاب ان هذة المسلسلات يشاهدها الصغير والكبير العاقل والجاهل,انا براي هذة القصص حقيقة واعلم ناس من الواقع,لكن اعيب علي هالمسلسلات الاسلوب والطريقة,ويعطيج الف عافية

مـي يقول...

أوافقج الراي في كل اللي كتبتيه..

العجيب ان فنانين كبار وافقوا على التمثيل !! في المقابل انهم يفترض عندهم القدرة على التمييز في الأعمال اللي تستحق يمثلون فيها ..

لكن الله المستعان ..

الجودي يقول...

قولي لها إن الكويت دولة ذو طبيعة مناخيه خاصه و لهذا السبب ما نقدر نودي الأطفال يلعبون إلا في الأماكن المغلقة و هذا بسبب حرارة الجو و الغبار و و بس وين الأماكن المغلقه

مالج إلا المول و في طفل المستقبل أذكر قبل عيال خواتي يروحون له

يعني حاولت اساعد

الحكمه حلوة وايد
و الزوارة مثل ما قلتي يعيبها أغلاط قويه ماكان لازم و زخم بالأحداث يعني كان ممكن تدور القصه حول الأب و واحد من عياله لكن العايله كلها مضروبه وايد بصراحه و غير المشاهد إلي مالها داعي و حياة الفهد مسلسلها حاله حال زوارة خميس اللقطات إلي صادف و شفتها تقث بصراحه و ممله وايد كئيبة ...

جنون عـبقري يقول...

لقد كثرت أختي في الله المسلسلات الهابطة على مستوى الوطن العربي ككل وليس فقط على مستوى الكويت أو الخليج فقد أصبحت كغثاء البحر يملأه الزبد.

شكرا لك على مرورك الكريم وإطراءك تحياتي لك ودمتي بخير.

السُـلطانة يقول...

السلام عليكم ورحمة الله وبركاته ..

لقد أصبح أختي في الله الذوق العام منحدر جدا بشكل كبير منذ ظهور العولمة .. والله المستعان .. جزاك الله خير الجزاء على غيرتك.

Amwaj يقول...

إي والله زوارة إبليس
والمصيبة حتى الصغار يتابعونه
وللأمانة آنا كنت أتابع بداية الحلقات بس ما وصلت لي نص الحلقات إلا وحطيت عليه X
لأنه مسلسل فاسد بمعنى الكلمة

مشاكس يقول...

مقال جميل

تقبلي مروري

مجنون .....!!! يقول...

زوارة خميس او ليلة عيد بالتأكيد لا تمثل المجتمع الكويتي ..

ولاكن ياغالين ...

الإعلام المسمى هابط ....!!!!!!

ليس كزوارة خميس وليلة عيد مع ملاحظاتي على صياغة القصه !!!!

ولكن الأعلام الحقيقي هو من يستطيع ان يظهر سلبيات المجتمع ويخرجها للسطح..


فالإعلام الكويتي الأقوى دراميا خليجيا..

لا يصاحبه تطور بالتربيه والفكر والشئون ...

الدرما الكويتيه تجاوزت المجتمع بالكثير الكثير ...

لاكن عجز باقي الأقطاب عن التطور وحل المشاكل هو مايجعلنا نرها بشكل هابط..

الوتيــــــــــن يقول...

نفس ما ذكرتي .. راح زمن الفن الجميل

الناس تكبر تعقل وربعنا يكبرون يستخفون

وبعدين هاذي مسلسلاتنا ماتطلع من دائرة الطق والهواش .. والكويتين كلهم بيوتهم فيها قماش مقطط عالارض من الفخامه وتماثيل يونانيه

يختي مادري احيانا نتفرج عليهم " والله دائما" للفضول .. احيانا حالنا حال الاجانب .. نطالع باستغراب شنو هاذا؟ صج جذي؟

حابين يعرضون مشكله موجوده يخربونها مره وحده

عيدج مبارك عادي انساي انساي .. اهما يتعبون طول السنه علشان يلهونا برمضان .. جنود ابليس

الله يرحم

Ahmed Al-salami يقول...

بداية (عيدج مبارك وكل عام وانتي بخير) اختي سارة..
ثانيا هدي اعصابج ولا تعورين راسج.. وسوي مثلي.. ما اشوف التلفزيون ولا ادري عنه من فتره طويلة.. اشوف بعض البرامج واللقطات العابرة من هنا ومن هناك إذا سنحت لي الظروف والوقت لذلك..
أما ما يخص مشكلةالابتذال الفني الحاصل في الوقت الراهن فيعود اسبابه إلى تواضع مستوى كُتّاب المسلسلات وجريهم خلف الاضواء والمظاهر الخداعة والكذابة للاستفادة من الناحية المالية فقط.

بخصوص الفنانيين الجهابذه إن عدنا إلى ماضيهم سنجد لهم العديد من المسلسلات المليئه بالإثارة والمجون.. وبعضهم أدى أدوار (إباحية)وهي معروفة لدى كبار السن ومن كان يتابعهم في ذلك الوقت.!

لن اطيل عليكِ في الحديث لكن ما أتمناه فعلا من الجميع هو عدم التفاعل مع (المسلسلات) التافهة والالتفات قليلاً إلى ما يفيدهم بعيداً عن السخافة الفنية.. :)

غير معرف يقول...

لأ اخالفج الراي ...

شفيني داشه بقوه ؟؟ لوول

ولهانه على تخاريفج بما اني قاطعه عن التدوين من سنه والحين يايه اشووف و لقيت نفسي بمدونتج ..

Engineera <<< me

بالعكس انا اهني الفنانه القديره سعاد عبدالله على هالمسلسل ..
كل مجتمع فيه السلبيات والايجابيات .. فيه الابيض والاسود ..
الابيض ابيض واضح مو محتاج احد يبرزه .. والاسود بعد واضح
الخوف من الرمادي .. الي اهو اسود صابغ نفسه اسود .. هذا الي طرحته سعاد عبدالله بالمسلسل .. نقدر ننكر ان هذي المشاكل موجوده بالمجتمع ؟؟ لأ
مو بس مجتمعنا اكثر المجتمعات ..
الفنان يوصل رساله .. مو رسالته ضحك وبس .. الكوميديا بالنسبه لي مو فن
اهي حاولت تكشف الرمادي الي تارس مجتمعنا .. انا معاج مو كل عوايل الكويت جذي .. ومستحيل تجتمع كل هالسلبيات بعايله وحده ..بس ما ننكر انها موجوده .. والله يعطيها العافيه انها طلعت بعض العينات من الرمادي

تقبلي مروري :*

طموحة مملوحة يقول...

آهات وطن

رسالة موراضية توصل ضيعها ساعي البريد :)

طموحة مملوحة يقول...

حسين مكي المتروك



التصوير حتى لو كان حلو اهو نفسه وبنفس الاسلوب تصوير المسلسلات القديمة والي متكرر فعلا ان دايم بالاخير نتنفض وتحس وتنتقم على اخر الحلقات شدعوة عليها يعني حفظنا شراح يصير اصلا :)

مشكور وايد اخوي حسين على التعليق المميز والمرور

طموحة مملوحة يقول...

كويــتي لايــعه كبــده

لووووول والله ردك ضحكني يا اسمك ايه لووول

طموحة مملوحة يقول...

حسون

اي حوار صل على النبي احس اني قاعدة اطالع مسلسل سالي ... وايد خيالي بصراحة اتخيل ببيتنا جذي يتحجون والله امصخرهم لووول

طموحة مملوحة يقول...

e Koweit


تخيل ترد علي (( حدج قديييييييييييمة )) لووووول

طموحة مملوحة يقول...

Katkoota xD


نسبة متابعينه وايد من كثر ما اهو خيالي والناس تتكلم عنه .. اتوقع السنة الياية يعرضون مسلسل وحدة تحب اخوها وتحمل منه وتالي تنظلم بهالمجتمع واخوها يقطها ، بتقولين لي هالقصة موجودة وسمعناها اقول لج صح بس مو معناه ان هذا اهو واقعنا :)

طموحة مملوحة يقول...

Katkoota xD


نسبة متابعينه وايد من كثر ما اهو خيالي والناس تتكلم عنه .. اتوقع السنة الياية يعرضون مسلسل وحدة تحب اخوها وتحمل منه وتالي تنظلم بهالمجتمع واخوها يقطها ، بتقولين لي هالقصة موجودة وسمعناها اقول لج صح بس مو معناه ان هذا اهو واقعنا :)

طموحة مملوحة يقول...

reemas


عسى الله يبردنا من نار جهنم يارب

طموحة مملوحة يقول...

عاضة


شدعوة مسلسل يحرنا؟؟ لوووول

طموحة مملوحة يقول...

عراب الدستور

مصخروه بالبلاك بيري اذا وصلت لك الصورة لوووول

اخوي احس ان هالمسلسل يثبت كلام اخوانا العرب الي حييييييييييييييييييييييل (يحبون الكويت ) لمن يقولون عن رياييل الكويت ......... !!!!!!!

طموحة مملوحة يقول...

ميمة السبيت


اي قوي صلي على النبي فلم هندي قاع نطالع @@


اوكي صارت مع بيت بيتييين مو واقع مرة وحدة

طموحة مملوحة يقول...

سمو الأميرهـ ..ツ


فديتج والله وفديت اهل الامارات

اي صح في مسلسلات خليجية الحين قاعدة تخطو خطا مسلسلاتنا الفاشلة يمكن على بالهم جذي يجذب اكثر نسبة مشاهدين ما يدرون ان اغلب المشاهدين يهالووو يتعلمون ويتربون بهالشهر الفضيل من المسلسلات الحليجية

طموحة مملوحة يقول...

المهاجر



أأأأأأأأأ .... لا ونافخين الريش بعد

ونوزع ال20 و10 على الهنود والفلبن مثل موزة وتفاحة لووول

طموحة مملوحة يقول...

بوعبدالملك


لوووول ضحكني كلامك والله اي والله صاج الصليبية خوش منطقة بصراحة جدا سياحية فعلا انا ظلمتهم :(

وعلى نايف الراشد خل يستريح هذا انسان يدور اين هم الاطراف ويراضيهم يعني عادي يروح حق ليبرالي يقول له ترا السلف يكرهوني لاني حطيت باول حلقة من شر النفوس وحدة رايحة شقة مع واحد ولبسها طوووووط وشوهت صورة بنات الديرة ان كلهم يخونون ونقصت من حق المرأة ... لا يقعد يهايط وايد المؤلف وبطل المسلسل والمخرج والمنتج كله اهو .... لوووول

طموحة مملوحة يقول...

غير معرف


عجبني الموضوع بس وين الكثير ؟

طموحة مملوحة يقول...

نجري

هذا مو واقع :(

هذي حالات شاذة بالمجتمع يعني الواقع لمن تشوفه بكل بيت هني نقول واقع مو كذا بيت ومر عليكم خلاص صارت كل البيوت جذي .. بعدين اعرف وايد ناس ماشاء الله عندهم فلوس بس بخلاء حيييل مو مثل هذول شدعوة جن مو شايفين خير يقطون الفلوس بكل مكان @@

طموحة مملوحة يقول...

مـي

الفلوس يابعد خشمي الفلوس ... يعني يقبلون اي دور وبالطقاق بالمجتمع بكبره تأثر ما تأثر بلعنته المهم الفلوس .. :)

طموحة مملوحة يقول...

الجودي

كلامج فيه من الصحة على سالفة اليهال لازم نحط عيال الكويت في مكوك فضائي ونحذفهم باحد الكواكب يتعبون من اللعب بعدين نردهم ... الله .... وناسة بعدين يصير هدووووء من زمان ما ذقت الهدوووء :(

وعلى سالفة زوارة خميس اي صح .. شدعووة عليهم الكل يخون والرياييييل موشايفين خير لي شافو المرأة فكروا بشيسموونه والحريم كلش كلهم محد فيهم غلط وولا وحدة قصرت بحق ريلها شدعوة عليها ..

قلنا عاد الرجل الشرقي والمرأة ومظلومة بس مو بهالطريقة يعني لي مصخت محد يذوقها @@

طموحة مملوحة يقول...

جنون عـبقري



صدقت اخوي عبقري @@

كلامك صحيح اغلب مسلسلات العربية صارت جذي .. كله شخلع بحلق

طموحة مملوحة يقول...

السُـلطانة


تسلمين اختي السلطانة على المرور والتعليق في الموضوع اتمنى ماتكون الزيارة الاخيرة يارب :)

طموحة مملوحة يقول...

Amwaj


انا ضحكتني سالفة الدوانية ... وشدعوة لمن الياهل قال بسوي نفس ابوي .. لمن صارت اللقطة قلت الحين بينصدم يعني بنقول وااااااو لوووول مقتبس من الولد الي يقول لأبوه بقطك بدار العجزة مثل ما سويت فجدي ... ملاقة يعني

طموحة مملوحة يقول...

مشاكس



اشكرك واتمنى مايكون المرور الاخير :)

طموحة مملوحة يقول...

مجنون


كلامك صحيح يعني هالكتاب لو يشجعون الناس على القراءة ويعرضون المشاكل بكتاب مع الحلول يبعدونا عن الحجي الزايد ويسترون على مجتمعنا لووول استغفر الله واتوب اليه جيكت اغلب الممثلات مو كويتيات ويمثلون البنت الكويتية هذا الي يقهرني بصراحة @@

طموحة مملوحة يقول...

الوتين

ايامج سعيدة يابعد خشمي انتي

والله في بيوت فيهم يهال وايد وازعاج وضحك وضغاط نفس بيتنا

في بيت هادي ومانشوف الا جم واحد طالع منه مرة بالسنة نفس البيت الي جدامنا لوووول


الي صج صج المسلسل الي يبيله تقطينه بالزبالة البيت المسكون ويييييييييييييييييييييييييييع من قلب شهالانحطاط التمثيلي ؟ يبا خلاص صكروا الاعلام الكويتي بالشمع الاحمر مانبيهم ويييع

طموحة مملوحة يقول...

Ahmed Al-salami


ايامك سعيدة اخوي احمد

والله مو متابعة احتجت اشوف جم حلقة علشان اسوي رسومات كركتيرية وبصراحة غثوني ماحب احد يعرض شي ما يدش الراس @@

لوووووول والمشكلة يقولون واقع واقعهم هذا مو واقع الكويت ... شهالمصايب الي ماتخلص من هالمسلسلات ؟

طموحة مملوحة يقول...

Engineera


انجنيييروووو @@

شلونج ؟؟ الحمدلله على السلامة حتى انا ولهت عليج يالمليقة :q

اي تهنينها من صجج ؟؟ تقول لريلها كنت حاطة اختي هني ... والله قاع اقول بيني وبين نفسي فتحي الزرار خل اشوف بالضيط وييين ؟؟!!! شهالخبال لا يبا عمرج شفتي احد يتحجى بهالطريقة ... اذا القصص واقع على قولتهم خل يتحجون بحجينا الكويتي الواقعي البعيد عن الخيالات والسجع @@
اين كنا ؟

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

طموحة مملوحة يقول...

يزاج الله خير عزيزتي ام الخلود

عقيل يقول...

أيد وجهة نظرج بشكل كبير عن مسلسل زوارة خميس

و بنفس الوقت : مهما تكون هذي الكـويت ديرتي و افديها في دمي لكن للأسف دولتنا ليست سياحيه ولا في شي يشد الأجانب غير شمسنا الحارفه نسميها (نار جهنم) و شباب هل أيام مثل ما كلتي كل شغلهم في المول

طموحة مملوحة يقول...

عقيييل



كلامك سليم 100% نورت مدونتي بردك