2010-10-25

رســــــالة الى وزارة التربية ...!!!!





السلام عليكم ورحمة الله وبركاته ...

وزارة تربية الكويت ... او وزارة التربية في دولة الكويت

ببدي رسالتي بمواقف مرت علي وعلى ملايين الطلبة عبر السنين العمرية في مدارس الكويت و ( جامعتها ) ، أتذكر لمن كنا نركض على المقصف في الفرصة ونروح نشتري لنا بربع دينار صمونة وعصير يبقى لنا (50 ) فلس فكانوا يقولون : ماكو خمسين هاج حلاوة .

وساعات ماكو 100 فلس بعد فناخذ حلاوتين ، كنا نقول عادي كلها 50 فلس ، بس الحسبة مو جذي 50 فلس x مليون طالب في جميع مدارس الكويت جم تساوي ؟؟

وفي كل سنة تزداد المصاريف كان مصروفنا ربع دينار .. تالي تطور الى نص ... تالي دينار .. والحين دينارين ، هذا غير الطلبات الي ماتخلص من المدرسين والمدرسات المخلصيين والمخلصات .


ليش الطالب الكويتي خواف ؟؟؟

مثال من مادة الرياضيات : تفاحة واحدة قيمتها 100 فلس ، اشترى احمد 12 تفاحة فكم دفع ؟
الطالب : دينارين !!

الاجابة خاطئة ولكنها في الكويت صحيحة ... أقول لكم شلون ؟

كان ينضحك علينا بالمدارس باسعار الوجبات وكنا ننباق من قبل الادارات ماكو حسيب ولا رقيب ، وشكاوي المدرسات والوكيلات الي يسولفون بجمعات الحريم تشهد :) ...

اذكر لمن كانوا يقولون لنا : الوزارة ماتوفر لنا كور للمدرسة كل وحدة تشتري كرة ( حقها ) ولمن نشتري ياخذونها ويحطونها بالسلة الكبيرة علشان الكل يلعب فيها ( تنفش .. تتقطع .... قلعتج بفلوسج احنا شكو ؟؟ ) ...


واليوم وانا قاعدة بالجامعة وقاع اسولف مع نفسي ، شنو فايدة الاتحاد ؟؟؟ شنو فايدة الجمعيات والروابط ؟؟ يقصون علينا الطالب الجامعي و( سنكر ) بالجامعة يبيعونه بربع دينار ، قطعة الورق العنب الوحدة ب100 فلس ( لووول ) ، وحدة طلبت وجبة من الكافتيريا طلع الحساب دينارين باجر نفس الطلب 3دنانير ونص ؟؟؟ ليش بالله ؟؟

اين الحسيب ؟؟؟ اين الرقيييب ؟؟ عيل شلون ننجح بمادة الرياضيات اذا ندرس شي ما يتطبق على ارض الواقع ... او بالاصح ارض الكــــويت ؟؟

ماكو احد يتكلم باسم طلبة الجامعة لأن الاتحاد والروابط غافلة عن هالامور او مالها شغل بالاصح ..في ادارة التغذية بصراحة مادري شنو مهمتها ... كل الي اعرفه واحد ايي يقول للكافتيريا ها جم حصلتوا اليوم ؟؟؟

هذا بكوووووم والماكينات بكوووم ثاني ... ماكينة الماي تاكل الفلوس وماتعطينا ماي ، ماكينة البيبسي نحط دايت يطلع لنا سفن ( شر البلية ما يضحك ) ماكينة الفلوس متطورة نظام (touch ) مسكينة مامنها فايدة .. ماكينة القهوة نحط فلوس يطيح القلاص برا والقهوة تنزل من ورا الماكينة والحالة كسيفة بس بالاخير تقول لنا الماكينة ( عما عينك ارد لك فلوسك ) شنو حتى الماكينات تلعب على مخنا ؟؟

دولة خير ولله الحمد بس ترا نخاف على فلوسنا ونبي نصرفها بالعدال لو سمحتوا .... انا أطالب بوجود رقابة صارمة على الكافتيريات الي بالجامعة وبالمدارس كذلك ، ورقابة دكتاتورية ماكو واسطات ولا ( طاحت الميانة ) ..
أتمنى أخذ الموضوع بكل جدية ... اذا الوزارة ماتراعي ظروف الاسرة الكويتية ترا في اسر مكونة من عشرات الطلبة حسبوا بنزين وباصات ومصرف الطلبة ومصرف الدفاتر والكتب طول العام جم يعني ؟؟؟؟ احنا كويتيين حالنا حال البقية مو على راسنا ريشة ولا كل بيت فيه بنك .. واعانتنا الجامعية مامنها بركة بصراحة من المصاريف الي تتكدس علينا فرحموا طالب العلم .




ــــــــــــــــــــــــــــــــــــــــــــــــ


رسالة الى عمادة كلية العلوم :


شكرا الف شكر على حل مشكلة الازدحام داخل مبنى 3خ وكان الحل بسييييط وغير مكلف ، شالوا الكراسي .......... فقط

الف شكر ومنها للاعلى لحد ما يطلعون بقية القزيزة الي اييون الكلية
حق القز بس








ــــــــــــــــــــــــــــــــــــــــــــــــــ

مقولة اليـــــــــوم








أسوأ الناس حالا من لا يثق بأحد لسوء ظنه، ولا يثق به أحد لسوء أثره


الامام علي بن ابي طالب ( رضي الله عنه ) ... صحابي وخليفة



ــــــــــــــــــــــــــــ



12 comments:

BenBaz يقول...

حقج :P .. مقال حلوة بس اعتقد ان حال التعليم في الكويت لم يصل الى مرحلة البؤس في مصر مثلا حيث ان الاولاد لم يعودو يذهبون الى المدارس اصلا واكتفوا بالدروس الخصوصيه ..

Q8-Borgy يقول...

هههههههههههه

اول شي صح السانج وان شالله يارب صج يوصل صوتج

ثاني شي والله ماقلتي الا الصج والله ذكرتيني ابأيام المدارس انا اكبر منج والحين موظفه بس صج كل الي قلتيه مطبق علي 100%

شلون؟ اقولج شلون بيدي ربع وبيد الي يمي ربع وكلنا ربع تعرفين احنا عيال الثيمانينات حدنا ربع دينار المهم تخيلي اشتري مثلا عصير مع بطاط راحوا 200 فلس انزين بقت 50 فلس هاتوها لالا ماعندنا اخذيلج شي بـ50 شلون يعني بلا باقيتها حق شي ثاني والله لو كل طالبه رجعتولها فلوسها صح جان صارت عندكم خمسينات بس لف والدوران الي انتوا عايشينه ماله سالفه

هاذه غير الجمعية الي يفتحونها ييبوا 1KD واخر السنه نعطيكم 2KD لووووووووووول والله الي اعرفه ان الجمعيه تدور كل شهر حق المبلغ يتهنى فيه شخص بلا شلون فهموني كل الطلبه تاخذ لفلوس دبل !!! هاذه معناته والله والعالم يشترون بضاعه فيهم وعقب يعطونه من نصيبها

يلا لو بتشوفين التربيه ماراح تخلصين قلبج بيعورج

Seema* يقول...

المشكلة وعرفناها
طيب والحل عند منو؟
عند الأفراد نفسهم :)
محد يقدر ياخذ منج شي إلا إذا انتِ سمحتيله.

نون النساء يقول...

وايد من اهلنا يشترون اكل عيالهم من الجمعية ( اقصد الإبتدائي والمتوسطه)
لان المقصف يبيع بسعر الدبل.


شيء ينباع بخمسين بالجمعيه وبمقصف المدرسه يبيعونه بمئة فلس او مئة وخمسين..

عاد صج اسم على مسمى ( مـــقصــف)
من القصف اللي طايحله :)

ابو عبدالملك يقول...

الأبتدائي يقال والقائل ثقه بأن بعد شهر او بنصف شهر 11 راح يخلونه شغل وجبات مقدمه من المدرسه يعني مثل الروضه


تمنيت لو تكلمتي عن (المجاري كرمكم الله) أقصد التجاري
ماادري شلون أوصف لج الكافتيريا لكن أقرب توصيف هو المطعم الهندي اللي بجمعية الرقه اللي جنب فرع القهوه والنظارات هذا أفضل وأنظف من كافتيريا التجاري

ذكرتيني أيام المدرسه كان ناظر المدرسه يقول للطلبه كل واحد يقط خمس دنانير علشان نصبغ الصف

وبخصوص الرقابه الدوله بكبرها يبيلها رقابه
ملايين تسرق والأمر عادي
وأنتي تبين رقابه على مقصف مدرسه أو كافتيريا بأحدى الكليات
تعوذي من أبليس

وبخصوص أخذ الأمر بجديه فهذا شي مؤكد
فأنا اتوقع أن الوزيره إذا ماأتصلت عليج راح ترسل لج إيميل تتعذر منج وتقول لج سامحينه وتنفذ طلباتج


وعلى طاري القزيزه
حلهم سهل
فرض لبس معيين للكليه
أو على الأقل منع التعري
أو وضع مباحث اداب
او شباب مطاوعه
يلسبون كل شخص يتحرش ببنت امام الطلبه بعدها ماراح يقرب صوب المنطقه اللي فيها الكليه اللي تلسب فيها
ممكن بالبدايه راح تصير مشاكل لكن خلال شهر شهرين راح ينتشر الخبر بين الشباب وراح ينسون القز بالكليات
مع العلم أن الخيار الاول والثاني لا نتائج منهم
وعسا ان تكرهوا شيئاً وهو خير لكم
والله المستعان

ابو عبدالملك يقول...

والله المستعان

دستورنا سورنا يقول...

الناس مشغوله بالانتخابات مو فاضيه لمتابعه متطلبات الطلبة

الحمدلله ما درست بجامعه الكويت

حياتي هدف مو عبث يقول...

أنا ملاحظة بو عبدالملك
متغيّر أسلوبة
صاير أليف :0

هاهاها اتصدقين مره بالابتدائي
قالت لي الأبلة اخذي حلاو ماعندي 50
قلت لا ابي فلوسي كنت مخططة اشتري برد
بالهدة،ووقفت ما تحركت قالت بالفرصة ال2 تعالي،رحت مالقيتها لقيت وحدة 2 قلت لها
انا شريت بنص وباقي لي ربع
وعطتني ربع ههههههههه (:
عزمت رفيجاتي
وبعدين كل يوم وحدة اتسويها
طبعا كنت في مدرسة بمنطقة بعيدة واايد
وانا كنت ذربة عندهم وكانوا يصدقوني
بس الحين لالالالالالالالالا
الله يسامحني;(

ابو عبدالملك يقول...

حياتي هدف مو عبث

الشراسه والحماس موجود لحد الأن
صحيح أن في أنخفاض بالشراسه والارهاب وهذا شي طبيعي


ولكن اللي أراه بأن المدونين اخذوا مبدأ السلم
فأعفينا عنهم الا البعض

طموحة مملوحة يقول...

بوعبدالملك


ههههههههه حسستني ان احنا تحت رحمتك بس .... والله انا اشوف اني وقت ما ابيك تتنرفز اعرف شلون والوقت الي اخليك تطخ فيه هم اعرف شلون فلا تقول مبدأ السلم واعفينا وين قاعدين محكمة ؟؟ وبعدين الي اييون من برا الديرة حق الكلية مو علشان البنات ولو ان في وايد علشان بنات بس علشان الانتخابات الي ماخذينا منها لا حق ولا باطل :)

ابو عبدالملك يقول...

طموحه

أنا لا أتنرفز
لكن اغضب اذا رأيت حرمات الله تنتهك وهذي أحد صفات الرسول صلى الله عليه وسلم فقد كان الرسول يغضب عندما يرى حرمات الله تنتهك وهذا شي جميل وبل يؤجر صاحبه
بعكس من يغضب اذا قالوا نريد أن نطبق أحد أوامر الله مثل قانون منع الاختلاط

فغضبي هو أني رأيت حرمات الله تنتهك لا لأن بنت كتبة موضوع بمدونه يعلق عليها النصف الاول علمانيين وليبراليين مرتدين والنصف الثاني رافضه مجوس

وبما أنج تحت رحمة الله فأتمنى ان تنساقين لأوامر الله اللي انتي تحت رحمته
وأن اقوالج تكون مطابقه لأفعالج لا شعارات ترفع

Princess Sara يقول...

الحال مُحزِن!
كرهتوني بالجامعة قل لأ أطبهآ!

قههر أنه أحنا من أغنى الدول
و هذي حال جامعتنا و حتى مدارسنآ؟

مشكووورة