2010-10-30

مدونــــة تزهّــــق !!






بدت الاختبارات وبدت تخاريفي ... واليوم راح اكتب عن مدونة باطة جبدي واهدي الموضوع للمدون بوراشد
هالمدونة من المدونات الشبه قديمة يعني صار لها جم سنة ( بس ) ...
تتحلطم وايد وماعندها غير التحلطم والهذرة الزايدة .... ابي اوصل لنتيجة من تحلطمها ماوصلت للحين :)
يكثر في هالمدونة النجرة والهواش .. اعداءها ( وايدووون ) ويفضون حرتهم فيها بهالمدونة :q
تدعي انها طموحة وللحين ماتخرجت من الجامعة >>>> الخلل من منو ياترى ؟؟
ترسم كركتير ورسوماتها مليقة حدها ماعندها سالفة بصراحة ..
نسوي نفسها فيلسوفة وما عندها سالفة بصراحة ..
كله تناجر الطلبة الي معاها بالكلاس وتعارض اراء الدكاترة ... ( فتحوا صفحة التعليقات مالتي بذكر لكم مثال على سالفة الدكاترة )
تفكر وايد وايد وايد وايد وايد وتتعقد وماتطلع بنتيجة واذا طلعت بنتيجة تسوي عرس
على قولة احد الغير معرفين ( مع الخيل يا شقرة ماتدري وين الله حاطها ) ... مسكينة
مدونتها كل يوم مغيرتها ومحد معبر مدونتها الثانية :q
كل يوم لها راي مالها راي معين ...
مدونة مادري ليش انحطت بصراحة ...!!!!!!!
احب انتقد نفسي بصراحة احس براحة كبيرة :)
الكلام هذا نابع من الخوف من الاختبارات الي هلت علينا ..
كنت ناوية اكتب موضوع عن الانتخابات الجامعية بس قلت جم مرة تكتبين وتعيدين وتزييدين ماله داعي التكرار هذا
كلامي عيل القراء شراح يقولون ..؟!!!
.
.
.
.
.
.
تتذكرون @@؟؟؟؟ مادري شلون طرا على بالي هالمسلسل وتذكرت الحلقة الاخيرة تحسفت يومها اني تابعته :q










ــــــــــــــــــــــــــ
مقـــــولة اليوم :





لا يمكن لأحد التمتع بالحرية دون أن يرتعش
إميل سيوران ..... فيلسوف روماني

15 comments:

طموحة مملوحة يقول...

أحد الدكاترة الله يسامحه يارب كله يقص علينا ويقول : انا احب الي يناقشوني ويقولون اراءهم لان ساعات نكون غلطانين وانتو تصححون لنا المعلومة .

المصيبة لمن نناقشة يستهزئ بعقلية الطلبة ويقول انتو ما تفهموش ، حتى بمرة احتديت معاه ويقول : خلاص خلاص أنا آسف . وطبعا من القهر شلون دكتور يقول شي ويسوي شي ثاني ؟
المهم قال لنا شغلة وقال فكروا معاي طبعا و( اكيد ) محد يقول الصح الا اهو ... فقلت له دكتور وممكن يكون هالشي بفعل الشغلة الفلانية ( قاع اناقشة بموضوع علمي ) جان يقول كلامك صحيح 100% ولعلمكوا محدش عرف المعلومة دي غيري انا من بين كل الدكاترة ... ( لوووول ) والمعلومة قديمة وماخذينها من سنة الطفحة ومليانة الكتب ... ليش المهايط الزايد ليش ؟

ebtsamh يقول...

الاختبارات تسوي اكثر من جذي ..

أهم شيء أنتي مرتاحه الحين :)

غير معرف يقول...

ههههههههههههههههههههههههههههه

أضحك الله ثناياج :))

ما شالله عليج يا سارة ذاكرتج حديد ما نسيتي هالموقف (( على قولة احد الغير معرفين .... مع الخيل يا شقرة ما تدري وين الله حاطها )) إللي صارلج معاي أكثر من أربعة شهور طافت مع إن هالموقف عليه تحامل منج علي :((

اببببببب

هذي وإنتي ما تعرفيني لو إنج تعرفيني وتواجهيني شخصيا شبتسوين فيني !!

بتقطعيني شقف وتخليني عشرة تكة أو بتفرميني وتخليني حشو داخل العرايس :((

أستر يا ستااااار أستر

أولا / الصراحة يا طموحة إنتي ظلمتيني بشطر أنا ماذكرته واهو أساسا مضاف إليه منج أنا ما قلته ( ما تدري وين الله حاطها ) بس المسامح كريم :)

ثانيا / أنا يوم ذكرت هالمثال ( مع الخيل يا شقرة ) أساسا أهو مثال مع فارق التشبيه ما كنت أقصد إني أجرحج أو أسيئ لج وإن كنت مختلف وياج بالرأي بس إختلاف بالرأي لا يفسد في الود قضية :)

ثالثا / صدقيني والله وبالله إني من المتابعين لمدونتج الفعالة والمستمرة بس عن كثب وإللي تطرح مقالات متنوعة وجيدة ومفيدة وفيها تسلسل منطقي تتوصل إلى نتيجة يستفيد منها القارئ ( وإن إختلفت في بعض منها ) في شتى المجالات وإهي أساسا أحسن من بعض المدونات إللي ما عندها إلا الوسوسة والنفسية والعقد ( أنا درست في الخارج وتعرفت على فلان وعلان وصار لرفيجتي موقف مع هذا وذاك ) وكله حجي فاضي خزعبلات لا فكرة ولا توصل إلى نتيجة !!!


رابعا / يا خيتي إنتي حبوبة لمتابعينج في هالمدونة محترمة ولبقة في ردودج لهم ويكفي رصيد التعليقات في مقالاتج اللي تطرحينها في هالمدونة وإنتي مو مثل غيرج إللي يكتب مقالاته يتصور في نفسه إنه أسلوبه جاذب للقراء وأهو أساسا طارد !!!


وأخيرا

بخصوص بعض التعليقات في مدونتج وإللي تحمل إسم ( غير معرف ) وإهي أساسا تحاول إنها تسيئ لج أو تجرحج

ما أقولج يا خيتي إلا حلات الواحد ينام مظلوم ولا ينام ظالم :)



تحياتي لج



ويحفظج الرحمن يا خيتي :))

الوحده الوطنيــــه يقول...

لوووووول
سويرة الليل

هذا لاهو نقد الذات و لا جلد الذات
اعتقد هالشي يسمونه تبذح يلد الذات
هههههه

عاد تصدقين طموحه اني قلت حق بورشود
ترا طموحه راح بالها بعيد
جان يقول مو الهقوه بساره تفتكر اني اسولف عنها
بو راشد عين السيح

دمتي يا اختي بود و محبه
و اتمنى لج التوفيق و النجاح
بالجامعه و ما بعدها .

t7l6m.com يقول...

مولاي سهل عليهم
هونيها وتهون إن شالله
الله يوفقج بإمتحاناتج ويكافيج شر الأسئله الصعبه والدكاتره البايخين

Seema* يقول...

تدرين خلصت الفقرة وأنا أقول من تقصد؟ أكيد وحدة ما أعرفها بس يحليلها ترسم كركتير مثلج..لول بعدين شسمه :\
اسم الله عليج ;*
الله يسمح دربج :)

طموحة مملوحة يقول...

صباح المساء ... توني قاعدة من النوم خوش امتحان علي باجر :p


ابتسامة :

بصراحة توني قاعدة وحدي مخترعة .. فطبيعي نفسيتي اوكي لووول

طموحة مملوحة يقول...

غير معرف


لووووووول يعطيك العافية بس اعتقد انت من النوع السليم مو القصد اقول هالكلام علشان تقول لي العكس لا والله .. ترا مو بس انت الي قلت لي هالجملة فعادي مو مشكلة احب اقرا الانتقادات لان الي انكبت لي بطريقة مو حلوة وطبعا وايد غير معروفين يكتبون سب واعرفهم :q اعرف الي يكتب بسبب موضوع ماعجبه والي يكتب لان بينه وبيني شي والمصيبة اعرفه حتى لو ماكتب اسمه فشي حلو بصراحة لووووول

لا ياخوي انا ما ازعل من احد بالعكلس يشرفني وجود الغير معروفين وفي وحدة منهم من السعودية اسمها ود فديتها كل ماشوف الغير معرفين واهي بينهم استانس والله .. :)

وجودكم وايد يفرحني .. الله يعطيك الصحة والعافية يارب

طموحة مملوحة يقول...

الوحدة الوطنية

بصراحة انا قريت موضوعه بغيت ابجي قلت ليش انا موخاشة حقد ولا ( ضغينة ) لووول بس الحمدلله طلعت عن مدونة ثانية ولست انا ... بسحطيت الموضوع لانه مسوي حملة هجوم على المدونات الكويتية فانا اسوي مثله واخر موضوع له عجيب بصراحة

طموحة مملوحة يقول...

t7l6m.com ...

آميين يارب يكافي الجميع شر الامتحانات الصعبة يارب

طموحة مملوحة يقول...

Seema* ...


لووووول هذا وانا قايلة بشخل نفسي زيادة بس اكيد راح يعرفوني من اول شي طلعتي مو عارفتني ... لوووول

غير معرف يقول...

لا ياخوي انا ما ازعل من احد بالعكلس يشرفني وجود الغير معروفين وفي وحدة منهم من السعودية اسمها ود فديتها كل ماشوف الغير معرفين واهي بينهم استانس والله .. :)



<<<<<<<<<<<<<<< حلااتج والله
انا حاطه كومنت عشان هالشي ههههه
ولا موضووعج خرطي
بس اتفق معاج على سالفه التحلللللللطم
;pp
ومدونه الكاركتير
كاسره خاطري :(

تصدقين ماقد قريت التعليقات الا اذا رديت وناطره ردج
بس مادري شلقفني هالمره ههههه

SHOOSH يقول...

:)

طموحة مملوحة يقول...

غير معرف


لووووول وربي مافهمت ولا نقطة من كلامج قاعدة احاول اركب بس كلامج مبهم شوي لووووووول

:p
حياج الله

غير معرف يقول...

لوووول مالت
انا ود
وانتي يايبه سيرتي بالتعليقاات

فاقولج اني صدفه قريت التعليق
بس

;p


وموفقه بالامتحاناات =)