2010-11-01

حدث في جامعة الكويت ..!!!





الي يقرا عنوان موضوعي بيقول : شحدث بعد ؟ انتو في شي ماحدث بالجامعة ؟!!
يقول لك الطالب الجامعي الكويتي علشان يتلقى العلم يدرس في السراديب في مباني قديمة ، ويدرس في جبرات عليها ارقام ( C ,D ,A,F ) ... الخ
قبل جم يوم قعدت افكر اذا التحقت بأي جامعة برا اكمل فيها ماجستير ودورت في الانترنت ، وبشوف شنو المواد الي راح يعادلونها لي والي لأ ..... فلقيت جامعة الكويت تحتل المركز ما بعد ال2500 بالعالم ماذكر الرقم جم بس سواد ويه بصراحة ومو بس لنا الحمدلله لكل الدول العربية وهالشي معروف محد يثق بالعقول العربية .
بجامعة الكويت من اول سنة دشيتها لحد الحين وانا ادور على الزلات علشان اتكلم عنها ، اليوم وبعد ازدياد عدد طلبة الجامعة لأول مرة وبشكل رهيب ما دفع الجامعة للبحث في سوابق الطالب الجامعي ومحاسبته على الغياب والتأخير حتى ( تطفشه ) ويقل العدد وتقل المشاكل .
لكي تصبح طالب جامعي بحق وحقيقة عليك بالتالي :
* اذا كانت محاضرتك الساعة 8 صباحا فتعال الى الجامعة الساعة 5 ، أو أجر لك ملحق في بيوت الخالدية او العديلية او كيفان .
* يجب أن ( تتنقع ) أمام باب المحاضرة كي لا يسبقك الاخرون ويأخذون الكراسي ولا يتركوا لك المجال كي تعبر عن رغبتك في الجلوس بكل حرية >>>> عجبتني .
* يجب أن تكون طالب ( نذل ) الطيب ما يمشي بجامعة الكويت ، اولا وآخرا مصلحتك فوق كل شي حارب علشانها :q من صجي ما اتغشمر على فكرة
* لا تشارك في الانتخابات الجامعية كلها ( ضراط ) وآسفة على الكلمة ، انت تقدر توفر لك جم دينار على النوت واخذ نوتات القوائم ، اسمع قرقتهم واضحك عليهم اذا عندك وقت فراغ ، جمع من الاقلام الي يوزعونها والكاكاو الي يوزعونه وقت الفوز ، يعني باختصار صكوا على مهرجانات هلا فبراير >>>> شخباري ؟؟!!
* ( درعم ) ولا تحترم الطابور اخذ شغلك ومشي حالك يعني الي بالديرة ما احترموا الطريج تيي انت تحترم الطابور الي تلقى فيه الف وحدة واقفة وكركركركركر وضحك وسوالف وتضييع وقت ؟؟ لا يبا درعم واخذ شغلك وتوكل على الله .
* إيــــاك ثــــم إيـــاك والدراسة أمام زملائك ....!!!!!! العين حق !! بس عين الكويتيين أحق !!! :q
علمتني جامعة الكويت أن أكون صداقات مصلحة .... من بعد ما كنت اعطي وابذل جهدي واوزع جهدي صرت اخذ جهود الاخرين .... لأن بصراحة موكفو الواحد يسوي خدمة تالي لمن تحتاجهم يقولون لك : والله ماعندي !! أو : تصدق حتى أنا ما حضرت ولا محاضرة وماعندي نوت . وطبعا مهايط !!
الحيييين عاد بقول لكم شنو الي حدث !!! D:
تعمدت اقول الحدث آخر شي من بعد هالمقدمة الفصيحة الي فوق .
سلمكم الله ماخذين شعبة كالكلس وعدد الطالبات عندنا 65 طالبة ، قالوا لنا محاضرة التتوريال في السرداب ، أنا بس اسمع كلمة سرداب اييني اشمئزاز ، دشيت بعد المحاضرة بدقيقة واحدة فقط ، ولا القاعة فيها فقط 25 كرسي ، وطابور برا بنات يتحلطمون ، رحت يبت لي كرسي من برا وحطيته يم طاولة الاستاذ ولا وحدة ورا : استاذ ماشوف منها طويلة !! طبعا أنا لايعة جبدي يعني طويلة خلقة ولا قزمة وحاطة رقية براسها !!!
انا حطيت الكرسي على الباب وقلت ياويل الي يتحجى الحين ... طبعا بالكلاس الاستاذ كان يشرح وانا واقفة افكر شنو الموقع المناسب الي اختاره (( يعني مصخرة باختصار )) ، قعدت وفرشت الدفاتر ولا بنات برا واحنا استاذ وين نقعد ؟؟
يعني بالله شهالمبنى الي قاصين علينا فيه ومسوينه مبنى جامعي ؟؟؟ اتذكر بسنة 2001 كان عندي بحث وكنت توني اولى ثانوي ورحت هالمبنى الي اهو ((11 خ )) وانصدمت من المبنى وكل شوي اقول للمدرسة : أبلة متى ندش الجامعة ؟؟؟ تقول : شفيج هذي الجامعة . قلت لها : لالا الجامعة الصجية متى ندشها ؟؟ طبعا هني على بالي ان هالمباني مقدمات بس وراح القى مباني قوية مثيرة جدا >>>> فلــــم !!!
لا صج على بالي اسكت جامعة الكويت كشخة من يسمع اسمها اووووووووووف
من بعد هالموقف صرت قبل كل محاضرة اقحص علشان لا يسبقوني البنات ولا نحجز اماكن حق ربعنا بعد شتبون ؟؟
اتوقع حتى لمن اتخرج واخلص بقعد اداحر بجامعة الكويت :q
صدق او لا تصدق :
في كفتيريا الهندسة
صحن صغير به عدة قطه لحم بدينار ، وصحن صغير سلطة بدينار . شهالبووووووووووق هذا ؟؟؟ المفروض احنا نبوقكم مو انتو تبوقونا :q



ــــــــــــــــــــــــــــــــــــــــــــ
مقــــــــولة اليوم :




مــــــــــاكو مقولة انتو حطوا بالتعليقات :)

11 comments:

غير معرف يقول...

تخرجت بمعدل جيد جدا من كلية العلوم اى انا طالب عادي لاعبقرينو ولا دريس
التحقت باحدى اكبر الجامعات الغربية للماجستير وحصلت عليه بدون مشاكل دراسية والقبول كان سهل. حصلت على ثاني اعلى درجة باحدى المواد وانا طالب عادي لادريس ولاعبقرينو
جامعتنا مستواها جيد جدا والكتب المختارة للتدريس بالغالب حديثة وممتازة مشكلتها الوحيدة بالمناهج ان لجانب العملي قليل.
ومشكلتها الثانية السلبية بين الطلبة والاساتذة.
جبراتنا حديثة ومكيفة روحي مباني اكسفورد وكامبرج قديمة وعلى بو تاريخية شوي وتطيح وهم مستانسين فيها.
تفائلي

Seema* يقول...

LOOOOL
ولله الحمد.. سحبت الكالكلس الأسبوع اللي طاف!

بالله هذي حالة!

Shaikha يقول...

اي والله السرداب الدراسه فيه ظيم!
وكلش مو مال يحطونه حق تيتوريال.
فوق 60 بنيه بشعبه أصغر من غرفة سايقنا < مبالغة شوي! p;

لول بس جد، حجم الكلاس ما يستحمل عدد الطالبات خصوصاً لو كانت مادة مثل حسبان!

بس الجبرات انا ما اشوف فيهم مشاكل، بالعكس وايد اهوّن عندي.

~~~

وهم حمامات مبني 11 !
صراحه شي ما ينوصف، أول كورس لي بالخالدية لاعت جبدي من الأرف الي شفته.

وقتها صج قلت الله يعز الشويخ.

مبدعه يقول...

مدري شقول بس فيه اشياء مشتركه بين جامعتكم وجامعتنا بالرياض

مثل البوق في الكافتيريا هذا عيني عينك

بس على 2011 بينقلونا لمدينه جامعيه جديده

اشوفها وارجع اعلق

وترى جامعتكم فيها ميزات اهمها في نظري ان اذا ما عندك محاضره تقدرين تطلعين للبيت عكس عندنا تتنقعين الى نهاية الدوام

طموحة مملوحة يقول...

غير معرف

والله شجعتني بصراحة لأن ودي اطور من مجالي برا الكويت .. وعلى سالفة الجامعة الحمدلله يارب بس خل نكون واقعيين ديرتنا تحب الهبات والمظاهر والميزانية الي تنصرف على الجامعة تبني قصور مو كليات بالله ليش مقصرين فيها ؟

طموحة مملوحة يقول...

Seema*

عاد الامتحان كان حلو طافج :q

طموحة مملوحة يقول...

Shaikha

اي جبرات من صجج مكيفة عادي حتى الخيام تتكيف مو صعب بس جبراتنا عسى ما تمشين يطلع صوت من الارضية جن ديناصور مطلع ريح :q
شهالاحراج هذا ؟ لوووول وثانيا حمامات 11 خ انا ساعات اقعد اقرا كل شي مكتوب على البيبان سوالف وكلام قذر كالعادة و دعايات كريمات تبييض الجسم والله اقول على بالي الي بالمدارس متخلفيين طلعوا في وايد متخلفات بالجامعة ...

قاع اقول لرفيجاتي عن مباني كلية العلوم (مبنى 1 ) مستوصف الكلية ، مبنى 11 خ مخزن الكلية ، مبنى الدكتورة فايزة القصر الي ما يدشه الا الدكاترة والشخصيات المهمة ، مبنى 3خ مكان القز في الكلية ، شبقى بعد ؟؟؟؟ شهالمباني العاهات @@؟؟

طموحة مملوحة يقول...

مبدعة

يمكن لأن نظام الدراسة عندنا مقررات مو ثابت علشان جذي نطلع لمن تخلص المحاضرة ....

وعلى الكليات احنا عندنا الشدادية مادري غيروا اسمها والله مادري الطالب الجامعي عندنا يصبر عليها مثل ما يصبر المسلم يوم الحساب عشان يدش الجنة ويرتاح فاحنا وعدونا فيها وللحين ماندري متى يدشون الجنة ... قصدي الشدادية

Engineer A يقول...

على فكرة

هاللوية والاحداث راح تستمر لي الأجيال القادمة واذا الله عطانا عمر راح أذكرج! :)

انقردت ودخلت جامعة الكويت .. بس مع الأسف ما قدرت أكمل فيها مو لأني "قفل" والا لأني "مو كفو" بس لأني ما قدرت ازاحم ولا اداحر وما عرفت اخترق الصفوف واسكب الطوابير واصير نذلة .. والاهم من هذا كله ما قدرت أأجر ملحق بالخالدية!

والحمدلله خيرة اللي فارجت هالجامعة "اللي تفشل بصراحة" ولا كأنا في دولة نفطية .. دول فقيرة بشرق آسيا جامعاتها تتفوق على جامعتنا المسكينة وتصفطها يمين!

بره يوصل عدد الطلبة والطالبات بالسيكشن الى 300 طالب وطالبة ويمكن أكثر!! متصورين؟ ومافي ازمة كراسي ولا ازمة مصافط ولا شي من هذا اللي قاعدين نشوفه بالديرة واللي لازم ويجب وحالاً وفوراً يتم تدخل سريع وتصرف حازم علشان تتغير الأوضاع للأفضل والا ...!!

كان الله في عونكم

و

good luck in ur studies

:)

Jako يقول...

بخصوص موضوع النوت تنبهت عليه متأخر للأسف آخر كورس! أغلب الي كنت أعطيهم لو أصادفهم الحين يسوون روحهم مو شايفين الي جدامهم!.....مثل ما قلتي مصلحة لكن صفيت حسابي آخر كورس :)


وحياتج أشكره اقول مابي انا ما اعطي حق احد!

اي ومرة واحد اخذ نوتي جان ألقاه ثاني يوم منزله بالتصوير وعليه إهداء للطلبة من قائمته!!! @@! بوق اشكره!

Hashimoto يقول...

مقولة اليوم :
" الحمدلله اني خلصت مواد العلوم "
P=

-----

شلونج شخبارج ؟