2010-12-26

لما تموتين تعالي نكشف عليج!!


إنتبــــــه
الموضوع يحتوي الكثير من الكلمات والمعاني التحلطمية فاذا كنت تعاني من الضغط والعصبية ننصح بعدم قراءته ، ولا ينصح للأطفال بقراءته حتى لا يصابوا بالاحباط الشديد ...
عزيزي الشعب الكويتي : مع بالغ الحزن والأسى أحب أن أقول لكم ..... أنتو صح و1000 صح ... ويليت احد يسمعكم يليت ..!!!
اذكر في مسرحية أم علي طبت انتصار الشراح فديتها بوزارة الصحة ، بس وزارات الكويت كل ما انتقدتهم كل مازادت الانحدارية عندهم ... يقولون ( ما بني على باطل فهو باطل ) يعني لمن تلقى دكاترة ردايا فهذا من رداة الوزارة بعد .
لمن يسوون قوانين خربوطية في ديرة ماتتعدى مساحتها 20.000 كم2 ، تلقى بكل محافظة مستشفى طايح حظه ومستوصفات بكل قطعة مستوصف وقطعة 4 ماتروح مستوصف قطعة 1 لأن الناس الي بقطعة 4 مخلوقين من نور والي بقطعة 1 مخلوقين من نار (( استغفر الله )) حتى بهالسوالف تفرقة :q
سلمكم الله اليوم حسيت بتعب شديد ، وقلت اروح مستوصف الخالدية لأني طالبة علم وأقدر العلم الي آخذه من جامعتي المرموقة وأقدر محاضراتي وأحرص على حضورها ، علشان جذي كان باجي ساعة على محاضرتي ومايمديني اطق طريج لي منطقتنا علشان اروح اعالج فقلت اروح لمستوصف الخالدية اسرع لأني حاسة بخنقة شديدة .
رحت المستوصف وحاطة ببالي لي قالوا شي مومشكلة ادفع دينار خمسة مو مشكلة ، الخوات طبعا كل وحدة تلفون على ماخلصت تلفونها جان تقول لي استأذني من الدكتورة (( لووووووول )) آخر عمرنا نستأذن للعلاج ، دشيت على الدكتورة طايحتله سوالف مع واحد حاجيتها جان تقول سوري انتي مافيج شي يمكن من الخوف من الامتحان @@ . خوش دكتورة فهمت هالشي من نظرة عيني سبحان الله ، حاولت اكلمها الاخت زعلانة لأني قطعت محاثتها وقالت تتعالجين بمنطقتكم ، احنا ما نعالج الا الحالات الخطرة >>> الاخت ما تتغشمر ER مو مستوصق الخالدية .
يعني لو فرضنا الدكتورة وافقت ، جان الوضع مشى عادي ، تتوقعون لو نائب أو نائبة او منصب دشوا المستوصف تتوقعون يردونهم ؟؟
يعني يا دكاترة الكويت ، على شنو شايفيين حالكم ؟؟؟ أول ناس تبي زيادة رواتب انتو ويليت تعالجون بذمة وضمير، أكثر ناس ودها تقعد بالبيت انتو ... ويليت تداومون نفس الاوادم ، أكثر ناس تتفلسف انتو ويليت تتفلسفون صح ..
يعني الحين لمن يقولون دكاترة الكويت الي برا كفاءة وممتازين هذا لأن الي برا خذوا الزين وقطوا علينا الي مايفتهمون ...
والله اني لمن اروح مستوصف اتضايق اذا كويتي عالجني ، لأن فلسفة على الفاضي ويحطون الف مرض فيني ومايكون فيني الا كحة بس هههه .... بصراحة ماكو على الدكاترة العراقيين هالشغلة بس الي حبيتها فيهم ، يعني الصح الوحيد الي حطته الوزارة وادري هالشغلة مومقصودة بس ضبطت ان حطوا أطباء عراقيين لحد الآن ، احترام في التعامل ، الكشف الدقيق بدون تفلسف زايد ، ما يتأفف أو يمشي الي جدامه شط شط يالله خل اكمل سوالفي ، يحترم المواعيد ويحترم المريض الي جدامه .
انا بعرف يعني كل واحد خذا شهادة وطلع فاهم يتفسلف على الاوادم ؟؟ مادري ياي من العصر الحديث يشتغل في العصر الجاهلي يعني ؟
لمن طلعت من المستوصف دعيت دعوة وأدري حوبتي ماراح تضيع ، قلت عساها هالدكتورة تطيح بسالفة مثلي ومحد يمشيها وتتذكرني حزتها اعتقد الي يعرفوني عدل و ذاقوا حوبتي راح يأكدون هالشي لأن هالدكتورة حطيتها ببالي ومو زين احط احد ببالي ..!!!
طاح حظها من وزارة طاح حظهم من دكاترة ، والي يضحك اليوم اطالع اعلانات مسابقة وقريت ( الصحة الالكترونية ) قعدت اضحك قلت خل الصحة بشكل عام تمشي عدل علشان يقولون صحة الكترونية وايد مصدقين الحمدلله والشكر .
بسكم تفلسف بسكم ... الناس تكبر بتواضعها وانتي تطيحون من عين الناس بكبركم الفاضي ....
يمكن الصحة بشكل عام بكل مكان مو شي بس الصحة بالكويت ........ فلــــــم حده
تدرون شلون ؟؟ الحمدلله اني شارية كتاب الاعشاب الطبية اروح العطار اشتري لي ولا منة هالدكاترة ..
ثاني شي يا مستوصفنا العزيز .... صار لك فترة مسكر ولمن رديت من يديد، اوكي حلو شكلك بس ليش اسود ؟؟ ليـــــــش ؟؟؟@@
في احلا من التحلطم ؟؟؟؟؟؟ الي مو عاجبه لا يقرا :)
ــــــــــــــــــــــــــــــــــــــــــــــ
مقولة اليـــــــــوم :


مايهمني اكثر من الماضي هو المستقبل ، حيث اني انوي العيش فيه . >>>>>> ومات القائل بعد هالمقولة مباشرة
... لوووول اتغشمر
ألبرت أينشتاين ....... عالم فيزياء نظرية ألماني

13 comments:

Alikingkw يقول...

ما تشوفين شر انشاء الله
واسمحي لي اتفلسف :) ...اكو فاكهة اسمها املة حجمها كبر الليمونة الخضرة وطعمها حامض ومر لكن الحبة الوحدة تحتوي نسبة فيتامين سي تعادل النسبة الموجودة في عشر برتقالات..والابحاث ما تخلص عليها وفوايدها ما تنعد ممتازة للجهاز الهضمي وزينة حق السكر والضغط والكولسترول.

تحصلينها في مركز سلطان سوق شرق وفي مجمع لولو وفي سيتي سنتر.

أما بخصوص الدكاترة ...كثير منهم خشمهم يطول ويرتفع مع مرور الزمن ويأثر على عملهم وتعاملهم مع الناس لانهم باختصار متخلفين.

جربي الأملة وماتشوفين شر

طموحة مملوحة يقول...

اي جنها ليمونة عرفتها مرة عطاني اياها الدكتور حامض حلو صح ؟؟ بس حامضة اكثر اذكر لاعت جبدي من طعمها بس دام هذي فوايدها لازم اروح ابلعها كاملة بعد ههههه

يعطيك العافية على النصيحة الطيبة فدتني وفدت غيري اخوي حياك الله بكل وقت

رورو الشخبوطه يقول...

اول شي سلامتج ماتشوفين شر يارب..

او يمكن شفتيه اليوم وان شاءالله ماتشوفينه مره 2..

في دكاتره ابداع مره دشيت ع دكتور ياكل حب لا وبمزاج كنت بخمط منه واجابله :\

ومرات تحاجينهم وجنه تكلمين الطوفه لا فحص ولا عمات عين ! بس يبيج تفارجين ..

قطع ..

بس استغربت من سالفه استئذني من الدكتوره حلو بعد خل ابوس راسها ..

مبين من الموقف انه المستوصف مو زحمه يعني في مجال و بعد بحالات معينه مثلنا اللي نشتغل بمناطق بعيده عن بيوتنا عادي ندش اقرب مستوصف للدوام خو كلهم تبع جهة وحده ويمديني بعيد الشر اودع قبل لا اوصل المستوصف خخ لا وذا وصلت منطقتنا افضل صراحه اريح بيتنا ع اني اروح للطبيب !!

والحالات الطارئه تروح المستشفى العاده مو المستوصف العادي !

بعض الدكاتره يبيلهم دوره في كيفية مخاطبة المريض ..

Bo-Faris يقول...

يعني يا تمشوني ولا اذمكم
ما يصير كل واحد يدش اي مكان يبي في اي وقت يبي
لازم تتنظم العملية
ودامج تمشين وتتكلمي وتبتسمين
ف تقدرين تصبرين وتروحين مستوصف منطقتكم
ومثل ما قالتلج الدكتورة لو حالة طوارئ جان دخلتج

عثماني يقول...

بداية

سلامات و ما تشوفين شر اخيتي

:)

وللامانه ما الومج على هالتحلطم

كل شي بهالديرة تقريبا صار بالنازل

حتى المعاملات الانسانية

كوكتيل يقول...

السلام عليكم :)

ماتشوفين شر عزيزتي :)

صدقتي وما قلتيه قليل في حقهم والله

تدشين لهم سليمة يطلعون فيك بلاوي الدنيا :(


وسبحان الله مالهم خلق في كل وقت ونفسية اللهم ياكافي وشوفة نفس على شنو عاد ياليت يفهمون

كل شيء يقولون لج بندول جنه سحر مو دواء للراس :(

بسني قرقة :)

يعطيك العافية :)

Alikingkw يقول...

لا طعمها حامض مر! بس الغريب ان بعد ما تاكلينها شربي ماي راح تحسين بطعم حلو.

وديري بالج لا تاكلينها مثل عنبة لأن فيها طعامة طعمها رهيب من المرورة...اكليها مثل تفاحة

الله يعافيج والله يحييج البيت بيتي :)

طموحة مملوحة يقول...

بوفارس


والله الي خلا مستوصف الفحيحيل و مستشفى مبارك ومستشفى الصباح واسعد الحمد يعالجوني بدون شروط يخلي مستوصف الخالدية يعالجوني ، واهم الي طاحوا بلسانهم كانت تقدر الكاتبة من الاول تقول هالشي مو تقول استأذني من الدكتورة اول .... يعني في مجال سواء الموقف مر علي ولا على غيري فانا انسانة ذمامة واذم الجهات الي تتعنطز على افا المواطنين يمكن انت ماتعرفني بس الي يتابعون مدونتي يعرفون لمن اكتب موضوع شنو اقصد فيه ولشنو ابي اوصل ...

فرضنا وحدة راحت تزور ناس وارتفع عندها الضغط مثلا مجبورةتروح مستوصف منطقة هالناس يا ترا بيقولون لا ردي لمنطقتج ؟؟؟ خبال بصراحة والوزارة ترقع ما تعدل ..

طموحة مملوحة يقول...

رورو


صحيح هذا الي ابي اوضحه ان في مجال ... وليش ينهان المواطن ويستأذن علشان يتعالج ؟؟ والله مالوم الي يقطون فلوسهم على العلاج ... يعالج مرفوع الراس دافع فلوس ولا مذلة المجاني .. @@

طموحة مملوحة يقول...

عثماني


للأسف الشديد هذا الي قاع يصير منو يذكر كويت اول الي من خيرها ربي حافظها الحين الطمع والكره والحقد خلا النفوس تصير شينة وغضب ربي بكل مكان لا حول ولا قوة الا بالله الله يحفظ ديرتنا ويردها مثل اول واحسن يارب

طموحة مملوحة يقول...

كوكتيل


فديتج ياقلبي هذي وحدة من رفيجاتي امها كانت تعبانة وراحت تبي تاخذ لها ابرة حق مرض بسيط عطوها ابرة غلط دخلوها بغيبوبة وتوفت قبل فترة الله يرحمها وتبين احد يحاسب ؟؟ واهم ساكتين هذول مال ترفعون عليهم قضاياو ياخذون حقهم وزود بعد

طموحة مملوحة يقول...

اخوي علي

انا طرشت امي ماعرفتها راح اروح انا ادورها :) الانفلونزا قاع تزيد وايد والله يستر من هالمرض :q

ام فهودي يقول...

سلامات حبيبتي وماتشوفين شر

والمفروض اللي بالاستقبال يدخلونج عادي انا اعرف بنات معاي بالمستوصف قاعدين يمشون اللي ايون من بره المنطقه لان يدرون ان اهما داشين موتسليه ويعانون من مرض بس هالدكتوره بطت جبدي شنو هالاسلوب صج استهتار