2011-01-04

لقاء الاحبة



تذكرون هالموضوع ؟؟







وذكرت اسم صديقة لي كنت ارسلها رسايل بو ظرف وطابع <<<< الحين يقولون شخباري هذي


المهم كنا نتراسل هالحجي سنة 2000 وبعدين انقطعت الاخبار بس البنت لازالت ببالي لأن الناس الطيبة الي مرت بحياتي مستحيل أنساها


أذكرها دايم بخير ودايم خواتي يسألوني عنها وأقول لهم والله انقطعت اخبارها بصراحة


ياني تعليق من غير معرف على بروفايل بالفيس بوك وكان يحمل نفس الاسم


فارسلت هالرسالة :


(( السلام عليكم ورحمة الله شلونج اخت فائقة ؟؟؟ اتمنى تكونين بخير وبصحة وسلامة يارباكيد ماعرفتيني بس انا اعرفج وكنت كاتبة بمدونتي عنج ووحدة من متابعيني وصلني لبروفايلج هني .. وسعدت كثيرا اني لقيتج لاني موناسيتج بصراحة كنت اتراسل معاج بالبريد تعرفت عليج من مجلة ماجد وكنا نتراسل اذا تعرفيني سارة من الكويت وكانت رسايلنا من 10 سنوات بس للحين ذاكرتج ومانسيتج ورسايلج للحين عندي :) اتمنى تكونين عرفتيني لأني بجد فرحانة حيييل اني التقيت ببروفايلج وحبيت اسلم عليج ))


وكان الرد :



(( مااااااااااااااااااااااااااااااااااااشاء الله هلا والله بخير الحمد لله شخبارش ؟اذكرش اشلون ما اذكرش والرسايل عندي كلها ووووينج الحين ووين وصلتي ويش علوووومشالتكنولوجيا وماتسوي ردت رجعتنا لبعض ))



جد جد جد جد مستانسة وايد واحس خانقتني العبرة اذكر ايام مجلة ماجد واول رسالة وشلون كنت اروح المكتبة اشتري طوابع واكتب لها وخطي يخرع واسلوبي يضحك نص فصيح على عامي ... وشلون كنت انطر الرد واستانس لي رديت من المدرسة واشوف امي تنادي تقول لي تعالي ياتج رسالة ، طبعا غير فائقة كانت لي صداقات كثيرة من تونس والمغرب ومصر والاردن وغيرها وغيرها بس فائقة كانت الوحيدة الي لمن تييني رسالة منها كنت افرح وايد يمكن لأنها خليجية ماني عارفة بصراحة .


والحين راح تقرا هالموضوع وتشوف شكثر انا مستانسة لاني حصلتها ولقيتها سبحان الله .



لها مني كل تقدير وتحية


ولغير معرف كل الشكر والتقدير



ولكل الاصدقاء الي دعوا ان ربي يجمعنا ونلتقي سبحان الله الدنيا صغيرة .... ترا فيني بجية ما اتغشمر والله .





ــــــــــــــــــــــــــــــــ


مقولة اليوم :













أكبر درجات إثبات المرء لِذَاتِه تحدث عندما ينسى المرء ذاته



أندريه جيد ..... كاتب فرنسي




7 comments:

طموحة مملوحة يقول...

ادري بدلياتي وايد طوفوا :q

مالي خلق اعدل بصراحة :q

bride ghost يقول...

ماشاااااااااااء الله
والله جمعة حلوة
بسطتيني والله
الله يخليكم لبعض....
مافي أحلى من الصدف الحلوة يلي تصير من دون ميعاد ......يعني سبحن الله البنت طلع عندها نت ومواكبة التكنلوجيا والحمد لله إنك إجتمعتي فيها من بعد طول غياب 10 سنين
أكيد فرحة وشعور مميز ....
لها مني سلامي .....
تقبلي مروري اختي....
ويصبحك ربي بلخير ...

..pen seldom يقول...

ياااه

صحيح ان الدنيا صغيرة ، والتكنلوجيا تقرب البعيد

:)

والله مافي اجمل من انك تجددين العهد القديم والصداقات القديمة

وصلني شعورك وبقوة

وان شاء الله ماتنقطعون مره ثانية
وتلتقون يوماً ما ..

تحياتي لفائقة ؛)

ولكِ بالطبع ..

الحــــر يقول...

صج لي قالوا الدنيا صغيره اخيتي
والله لا يفرق بينج ومن تحبين
تحياتي
:)

ألـوان التفاؤل ~ يقول...

شعور حلووووووووو :")
أول ماقريت العنوان وبدابة المقدمة حسيت انها صداقة من مجلة ماجد p=

انا نفس الحالة !
كانت عندي صديقات من مجلة ماجد
وانقطعنا .. وكنت نفس شعورج كلما وصلتني رسـآلة ..

جددتي فيني الأمل اني أحصلهم مرة ثانية !
سبحان الله دنيـآ صغيرة ،
والتكنولوجيا تقرب كل بعيد =)


يعطيج العآفية ،

طموحة مملوحة يقول...

يعطيكم الف عافية :)

Seema* يقول...

سعيدة لأجلكم :")