2011-02-06

ديربالك في صرصور بقهوتك !!





في عام 2003 وعندما كنت ادرس ( باجتهاد شديد ) في معهد التمريض -الشويخ- ( القديم ) كنت اروح اشتري قهوة من ماكينة القهوة الي منتشرة بكل مكان في الجامعات في الشركات في كل مكان ...



فلمن كنت اروح آخذ قهوة من الماكينة كانوا اييوني الطالبات الممرضات يقولون لي لا تاخذيين من هالمكينة فيها حشرات ، قلت عادي مومشكلة ، جان تقول وحدة : ومو اي حشرة صراصير !!! وايد بنات لقوا صراصير بقلاصاتهم !!



خذيت نفس عميييق وقعدت أفكر ، اوكي انا ذقت طعم الصرصور مرة وكان مقرف جدا ، وتخيلت حالي اشرب القهوة والصرصور دش بمعدتي وقعد يحوس ويلعب ويدش يفتر شوي بقلبي وبعدين يروح يلعب بالشعب الهوائية الي برأتي ويوصل لي اظافري واشوف راسه داخل اظافري وياكل من الاكل الي آكله وبالاخير يطلع من خشمي .... !!!


فكرت وايــــــــــــد بعدين قلت : عادي ... خذيت قهوة وشربتها وقلت اشاعات طاااااااااااااف



هالسنة بالجامعة يت لي صديقتي الصدوقة تضحك تقول لي ان زميلنا ابراهيم طلّع صرصور من حلجه عقب ما شرب القهوة مالت الماكينة .



أنا عيوني صارت ( @@ ) شـــــنو ؟؟ وقعدوا يضحكون ، قلت يعني الكلام الي سمعته صحيح !!


بعرف الصراصير ماتروح ماكينة البيبسي الماي إلا هالماكينة يعني علشان القهوة نفس لونهم مثلا ؟؟



قعدت افكر وايد شلون شلون ؟؟ تدرون آخر شي شسويت ؟؟


لأني انسانة معقولة لازم افكر بالمعقول !!! وحرام اشرب قهوة كل يوم بدينارين وشي والقهوة عادية تتسوى في البيت ، قمت اييب معاي حليب كي دي دي او اي حليب ثاني ( مابي اسوي لهم دعاية ما يستاهلون ) المهم حليب والقهوة ( 2 في 1 ) الي بالجيس والمق مالي واروح الكفتيريا يحرون لي الحليب ، احطه مع القهوة واسكر المق واشربه متى ما ابي يعني دفعت 300 فلس بدل الدينارين وشي شرايكم ؟؟




بعدين شوفوا لنا حل مع ماكينة الصراصير !!!!






16 comments:

Katkoota xD يقول...

وييييييييع

قاعده اتخيل و زهيوي طالع من حلجه يييييع

مو من صجهم خو اللي يعبي المكينه او شي خل ينظفها

او يشوفون حل ان ليش موجوديين هذول

بعدين صج يعني القهوه نفس لونهم لو غير جان تترقع ان تقطينه

مو ان يدش بحلج الاوادم و يتوهقون

و احلى حل من احلى طموحة

وحيد في المنزل يقول...

اي مكينه هذي ؟ ليش ما صورتيها لنا ؟
انا ما اروح الجامعه و لا راح امر عليها
بس ابي اعرف اي نوع عشان اي مكينه من نفس النوع ماخذ منها
لاني عادة من اشوف مكينة قهوه انقض عليها

شكرا
:)

TwixXa يقول...

looooooooooooooooooooooooooooool
you are very funny my prnd :p ican't wait to cu :***

روعـــــــة الحيـــــــاة يقول...

الي سويته عين العقل
بس تعالي دينارين جم يطلعون بالإماراتي

شككتيني بمعلوماتي الكويتية ؟؟!!!!

انززين تقدرون ترفعون قضية و أنا بدافع عنكم^^

عندي حجة بيي الكويت

Bint ilKuwait يقول...

LOOOOOOOOOOOOOOOOOOOOL Waaaaaaaaaaaaaai3!!!!!!!!! a9laaaan shlon edishoooooon!!:S

Seema* يقول...

والله سالفة يعني الواحد يحاتي شنو وإلا شنو؟
بس زين تسوين!

غير معرف يقول...

اشوووووووى ماقد تهورت وشربت منهم

ولا بتهور بعد اللي قريته @@

بالجامعه نااادرا ماشتري منهم .. الا الاشياء اللي تكون مسكره بس


متى ذقتي طعم الصرصور ؟؟؟؟؟؟ ههههههه

وزيين تسويين
ولو تحطيين القهوه من البيت بالمق زيين بعد
وبالعافيه خخ


wed

whahd1 يقول...

ما ادري ليش تذكرن ها السالفه

مرا باحد المخيمات وانا كنت بالمخيم بروحي والربع بييون بعد شوي ومعاهم ظيوف
كانت مهمتي ارتب واعدل واشب الفحم واسوي الجاي وانظف القلاصات مالت الجاي
وسويت كل شي ورتبت كلشي وطلبت من واحد بعد ما يوو الربع ان اييب الطاسه الي فيها قلاصات الموجوده على الطاوله داخل المطبخ
ياب الاستكانات وصبيت للربع وللضيوف وصبيت حق نفسي ولان انا ما احب اشرب جاي حار اخرت شرب الجاي وخليته مصبوب وفجاه لمحت واحد من القلاصات بيد واحد من الربع هاذا القلاص مو من القلاصات النظيفه هاذا بطاسه ثانيه انا حاذفها ورا التانكي لان في جلب شرب ماي من الطاسه عاد قلت حق الي ياب الطاسه فلان من وين يبت الاستكانات والطاسه قالي لقيتهم ورا التانكي قتله اوكي اوف شكله جايي برد واشيل القلاصات واييب القلاصات النظيفه وبعد ما الظيوف راحوا مسكت الي ياب القلاصات ثتله انا قلت لك ييب الطاسه من المطبخ شموديك ورا التانكي قال ان كان يبي الحمام وقلت له السالفه ولي اليوم واهو يقولي الله يسامحك ليش قلتلي
ولان احنا نشرب من المكينه قهوه بقولج الله يسامحج ليش قلتيلنا

طموحة مملوحة يقول...

Katkoota xD


لووووووول حتى انا كان ودي اكون موجودة واشوف المشهد لوووول

لا ماله شغل التنظيف اول الهندي لمن كان ايي يعبي الماكينة كنت ايي اطل واساعده لوووول الماكينة دايخة حدها

بس كل مكينة نفس البرادة من ورا فيها فتحات مالت المروحة فيدش منها الصرصور او الميكروبات وشكله الصرصور سهران ماله خلق قال اشرب قهوة وياهم لوووول او تلقينه اندعس داخل القلاصات لوووول فكري وتخيلي انتي عاد لووول

طموحة مملوحة يقول...

وحيد في المنزل

ماكينة نستله الي فيها جاي بالزعفران وموكاكابتشينو وكابتشينو وقهوة سادة وحليب وانت تحط اكسترا سكر او شوي وقيمة القلاص ربع دينار لوووول

طموحة مملوحة يقول...

توكستي

انتي اونس لووووول بعد شوي بمرج علشان اخذج بس خل انظف غرفتي اول كلها الوان لووول

طموحة مملوحة يقول...

روعة الحياة

لوووووول لا يغرج ترا بالكويت يرفعون قضايا محد يعطينا ويه تالي لووول والله ودي اربح من ورا هالحركة لووول وعلى ايدج

والله اذكر اول بمجلة ماجد لمن كانوا يرسلون لي 10 دراهم كنت اصرفهم 3 دنانير لووووول فاكيد اقل من 10 دراهم

طموحة مملوحة يقول...

بنت الكويت

من فتحات التهوية الي ورا

لوووول اتذكر بنات كانوا قاعدين يم الماكينة كل ماواحد يا خذا قهوة يطالعونه ويضحكون بعدين يأشرون لي على الفتحات ويقولون وييييييع

عاد انا اطالعهم اقول عادي عادي مومشكلة لوووول

طموحة مملوحة يقول...

سيما اي والله يحاتي شنو ولا شنو انا حتى بوكي احاتيه الحيين لووووول صايرة بخيلة شوي بس والله طعم قهوة الي اسويها احلا يمكن لاني انا اسويها واحب نفسي فاشوف كل شي اسويه حلو لوووووول

طموحة مملوحة يقول...

ودووووووو


كنت بحط صور بس قلت كافي هناك لووووول

ذكرت الموقف ببوست قديم حييل بسنة 2008 كان بالغلط اقول لج مرة ثانية افا عليج بس مو هني لوول

طموحة مملوحة يقول...

واحد


لوووول سوالف المخيم ماتخلص قاع تخيلك يحليلك تنظف وتعدل وترتب مرتك راح تستانس عليك لوووول

الله يسامحني ويسامح الجميع يارب :(