2011-02-16

وزارة التربية : لي متى أنتي كسلانة ؟؟؟





بسم الله الرحمن الرحيم
مدونتي المسكينة زهقت واهي تكتب بوزارة التربية بالكويت ماكو فايدة بصراحة .
عـــدّوا معاي اوكي ؟؟
عندنا عطلة رأس السنة ، وبداية السنة الهجرية ، المولد النبوي ، عاشوراء ، العيد الوطني ، عيد التحرير ، عيد الفطر اسبوع ، عيد الاضحى اسبوع ... نسيت شي ؟؟
هذي العطل بصوب غير المرضيات الي تنوخذ !!!!
من كنت بالروضة والمشكلة ازلية لحد اليوم ، حب الغياب وتهاون الوزارة على المدرسين والطلبة ..!!!
ولاشك بأن يكون التعليم في الكويت ضعيف جدا مخلفا طلبة همهم التخرج والوظيفة والمخ .... (( فاضي )) ...
اليوم يفترض ان يكون دوام دراسي ولكن الي شفته وسمعته ان المدرسات كودوا الطالبات بصوب من دون دراسة لحد ما خلص اليوم الدراسي بدون اي استفادة تذكر ..!!!
حتى بالروضة عجز المدرسات كالعادة عن الجلوس مع الطلبة ..





بعرف شغلة وحدة ، المدرسين ليش دشوا التربية دام مالهم خلق يدرْسون ؟؟
ليش صاروا مدرسين ؟؟ معاش ؟؟ اجازات ؟؟ هذي هدية بس لازم يدفع ثمنها ، الي اهو التعب والتدريس ..
الطالب يمشي على حظه في التدريس ولاني كنت طالبة في تلك المراحل ، فإن طاح الطالب بيد مدرس مجتهد و صاحب ضمير حب الدراسة واجتهد وان لقى مدرس ماله خلق ولا مدرسة داشة كرشتها شكبرها حامل مالها خلق أو مدرسة لايعة جبدها يالله تدرس سريع سريع وباي عز الله الطالب بيروح فيها ..
اعتب على الاهل كذلك الي يشجعون الطلبة انهم ما يداومون ، وبالتالي راح يأثر كل هذا على المخ والمخيخ لدى الطالب .
مو شطارة بس لأني انسانة عملية ونشيطة كنت احب اداوم واتضايق من العطل لليوم ، واعتقد منور صديقتي نفس الحال
اذكر في المرحلة الثانوية في ثانوية هدية ومديرة الدرسة الله يذكرها بالخير الأستاذة لولوة السعيد كانت دايم تقول لنا داوموا وما اذكر شنو المناسبة بس اغلبية الطلبة غابوا وطبعا حضرت مع مجموعة طالبات ، بعد جم يوم كرمتنا لأننا حضرنا وبصراحة استانست وايد لأن في ناس تقدّر العلم . .
التعويد على البطالة
لاشك أن هذي الامور اهي الي خلت الموظف فيما بعد مايداوم وياخذ معاشه بالكامل . موحرام ؟؟
أتمنى من وزارة التربية ان تصبح ( رجـــــــل ) ورجل بمعنى الكلمة وتنزل عقوبات للمدرسين والطلبة واعتقد المدرسين سهلة عقوبتهم خصم من المعاش :) ، لأنهم يشجعون الطلبة على الغياب وعدم الحضور .
ــــــــــــــــــــــــ


مقولة اليوم :



لا يمكن ان يكون هناك ارادة مع التخلف
محمد أنورالسادات ..... رئيس مصري سابقا

14 comments:

طموحة مملوحة يقول...

ينفع يطبقون البيروقراطية بالتربية ؟

..pen seldom يقول...

أي والله كلامك عين العقل ،، عندنا وعندكم خير ..

وكل اللي قلتيه صوب ، وإذا قامو يغيرون في المناهج كل سنه صوب ثاني

والطلاب والاهل طايحين فيها من تجاربهم المنهجية ..!!

الله يعين يارب ..

Hanan يقول...

والله صاجة وأتمنى يكون عقاب للطلاب اللي يغيبون بيوم عطل! مثلا يدبلون غياب العطل ب 3 غيابات جذي أحسن.



بس صدمتيني لحظة... أنتِ خريجة أي دفعة؟
جني أعرفج :)

نمووول يقول...

وزارة التربية متخبطة
والتدريس مهنة يجب ان لا يدخلها الا الذي يعشقها فالتدريس ليس وظيفة فقط وهاذي احدى مشاكل المدرسين عندنا واحد ما لقا مكان راح التربية ,,

وترى المدرسين دوامهم متعب ومجهد جداً الي جرب يعرف
والوزارة لاعبه فيهم كل يوم تغيير باليوم الدراسي وكل يوم تغير بنظام المدارس

برأيي المشكلة لها اكثر من جانب

شكراً

FIGHTER يقول...

freepalestine4ever.blogspot.com

Katkoota xD يقول...

بالعكس مدرستنا مطبقة عقوبات عالطلبة

بس مو ان يدبلون الغياب لانه ما منه فايده

بس ان الدرس ينشرح و يعتبر مشروح للي غاب

حتى لو مافي ولا طالبة مداومه يعتبر الدرس مشروح

و اللي تداوم يكرمونهم بالطابور

و هذا الشي مو بس بمدرستنا مطبقينه

عندي رفيجات بمدارس ثانية مسوين لهم نفس الشي

بس يتم العتب على مديرة المدرسة مو الوزاره

طموحة مملوحة يقول...

بين سلدوم

شمعنى التربية عندنا جذي ؟؟ وبالدول المتطورة العلم عندهم في ازدهار وتطور ؟؟؟

طموحة مملوحة يقول...

حنونة

انا هالكورس اتخرج دفعة 2005

لووووول انتي اي كلية ؟

طموحة مملوحة يقول...

نموووول

اذا بننطر عشاق التربية يدشون بتلقاهم ينعدون بالاصابع

بس ويع والله جد كنت انغث لمن اشوف المدرسة داشة حامل ومالها خلق لنا وتزف وتهاوش واحنا مثل العبيد نتلقى المعلومة بدون مناقشة

طموحة مملوحة يقول...

FIGHTER


ان شاء الله راح ازور المدونة

طموحة مملوحة يقول...

كتكوتة

هالحجي اشوفه بالجامعة لوووول والمدرسة ملزمة الحين انها ماتشرح الدرس اذا نص الصف موحاضر والله مشكلتهم ماحضروا يتحملون ويدرسون ببيتهم احسن من الكسل ..

وتتوقعين الواسطة ماتدش بسالفة العقوبات ؟؟ :)

Hanan يقول...

أنا أدرس بالآداب :)
بس تخرجت من نفس مدرستج سنة 2008 :)
توقعت من دفعتي حسافة
أيام والله

krkor يقول...

ودي اييبون مدرسين اجانب بدال العرب راح يكون التعليم مختلف ومناهجنا تطور اكثر وتصير عمليه اكثر من ما هي نظريه

Katkoota xD يقول...

لا افا عليج ما تدش

ماكو واسطات اذا بنت الوكيله

حالها حالنا تنزف حتى من امها اي واسطه بتكون موجوده

الواسطات عندنا بس بالمدح عند الابلات اذا يبون شي خخخ

يعني يمدحون طالبه عشان مسابقه او شي عشان يبون مركز و من هالحجي

انتوا زين نص الصف .. احنا اذا طالبة وحده حاضره تدرسها

تكره عمرها و ليش انها داومت

و اذا محد مداوم يعتبر الدرس مشروح

الحين اللي داوم يوم الاربعاء اللي طاف دوام كامل

كرموهم بالطابور و بودونهم رحله خخخ