2011-07-19

تخاريف محبطة ومتفائلة !!











السلام عليكم ورحمة الله وبركاته ..









أتقدم بالشكر الجزيل ( لطوفة ) غرفتي لأنها تعطيني افكار كثيرة خاصة اذا كنت ابي اعيش بو بروحي وافكر أكثر فكل ما طالعتها عطتني افكار كثيرة ، وعلشان خاطرها راح اخلي البوست هذا برعايتها .









قعدت الصبح قبل جم يوم بطلت التلفزيون ، وشفت قناة الكويت ( الأثرية ) تعرض برنامج لهلا فبراير شخباري @@










المهم ، وكانوا يعرضون ( الفلاعيات ) اقصد الفعاليات الي تفشل ، وكل الفعاليات بل اغلبها بالمجمعات وحياتنا كلها صارت سوق :( . سيدة غيرت القناة وحطيت على فلم هندي يريح الاعصاب أكثر بصراحة .
فكرت ليش ما أقدم لديرتي أفكار وطبعا سارة 1 تتكلم وسارة 2 ترد عليها هذول السارتيين عايشين داخلي وطبعا كل شخص عنده اثنين يكلمونه ويتناقش معاهم بينهم وبين بعضهم واحد يعطيه فكرة والثاني يعارضه فخل نشوف التخاريف الي كونوها لي هالسارتيين من خلال البوست هذا ، في أشياء موجودة بالبوست واقعية واغلب الدول سوتها محافظة على بيئاتها البرية والبحرية والجوية ومحافظة على سلامة مواطنيها ، والي نفتقر لهالشي .

سارة 2: تصدقون عسى ماقلت لاحد انا من الكويت قال :





oooooooooh you drink oil every day !!!


لوعوا جبدي حاسدينا على شي انا اهل الديرة موحاسييين فيه لا حول ولاقوة الا بالله .



سارة 1: شوفي لو برميل واحد من نفطنا يروح برا يخلي منطقة الصليبية جنة وشوفي عاد افكارهم وابداعاتهم وتخطيطهم وشغلهم الي مايوقف ماعندهم مجلس أمة ولا عضو يصرخ ولا عضو سني ولا عضو شيعي ولا تفرقة الشغل شغل مافيها كلام ..!!!!

سارة 2: في ناس للحين ماتعرف الكويت بس لمن تشوف الثروة الي داخل الديرة يحطون ببالهم ان بيوت المواطنين مصنوعة من ذهب .
سارة 1: زين ليش ما نقدم اقتراحات خيالية وواقعية علشان يمكن ( يمــــــــــــــــــكن ) نفيد ديرتنا ولو بالغلط مافيها شي .

سارة 2 : حلفي بس !!! الي احسن منج تحجوا ولاعت جبودهم ولا احد عطاهم ويه تبين الحين يسمعون لج ؟؟ انا مو معاج .

سارة 1 : زين خل نعطي الافكار حق سارة التنفيذية ونشوف راح توافق ولا لا .



سارة 1 : شوفوا بالنسبة لمعاشات الموظفين أنا أشوف ان مصخوها وايد كل همهم الزيادات وكل شوي طالعين لنا يبون زيادة 100 دينار 50 دينار مايحمدون ربهم على النعمة الي عندهم ، ويليت يفيد معاهم ، نفس سالفة كادر المدرسيين الي يشوف خريجي المدارس يحس احفاد آينشتاين طالعة من مدارس الكويت ، مدرسيين مالهم خلق وبس يتحلطمون ، واغلب الي شجعوهم رياييل أولا لأن اغلب الرياييل الحين يتزوجون مدرسات علشان معاشاتهم ، ثانيا النواب بالي يصوتون لهالمشروع لازم يساحلون الحريم علشان يصوتون لهم بعدين ، فالسالفة مثل المرقوق بالضبط بس الفرق ان المرقوق طعمه لذيذ .



سارة 2 : ذبحتينا مرقوق ومرقوق انا أشوف العكس ، من حقهم يزيدون معاشاتهم التجار نهبونا بلعوا فلوسنا حسبي الله عليهم ، بالله ماتقولين لي ليش ادفع حق شركة انترنت شهر كامل 27 دينار وخدمتهم خايسة ، ادق على الموظف اقول له الانترنت بطيء يقول والله مكان بيتكم الانترنت فيه ضعيف زين والله ماقدر اغير مكان بيتنا شسوي اخوي ؟؟ زين اختي طلعي برا الحوش خل نشوف يمكن أحسن @@ ( سالفة صجية ترا ) ان شالله ما اشيل قشي وانام بالحوش علشان الانترنت سريع ، التجار مايخافون الله بشعب الكويت ياكلون بفلوسهم اكل من حقهم يطالبون بالزيادة .








سارة 1 : تتوقعين الزيادة راح تحل المشكلة ؟؟؟ ياسارة التجار ما يصدقون تصير الزيادة والله يفرحون اكثر من المواطنين ويزيدون اسعارهم اكثر ، بس الشرهه مو عليهم الشرهة على الي ساكت عنهم وعاجبه الوضع ، خل يخلون المعاشات نفس ما اهي او اذا قللوها غصبن على التجار ينزلون اسعارهم لمن يشوفون المواطنين متحكمين بفلوسهم .





سارة 1 : الا اقول شخبار قرية الثلج ؟؟



سارة 2 : اي قرية الثلج فشلتينا !!! ماكو الا صالة التزلج ماكو غيرها لا تقولين جذي جدام الناس والله يضحكون عليج .

سارة 1 : شسوي والله على بالي في جذي بالكويت ، ليش مايسوون قرية ثلج عندنا ؟؟ ونحس بالبراد في شهر يونيو ويوليو واغسطس وبدل ما العالم تسافر تدور البراد نقعد بالديرة بهالقرية حتى برمضان نقعد هناك نتفطر ونصوم هناك وحتى لو نعيش مو مشكلة .@@


سارة 2 : مسكينة حدج ومالومج بس الباب مسدود (( الميزانية ماتكفي )) .


سارة 1: كل هالنفط وماكو ميزانية ؟؟




سارة 1 : زين عندي فكرة ثانية ! ليش مانشتري جبل من اي ديرة فيها جبال وايد ونحط لنا جبل يم الابراج ، وواحد عالبحر ، وواحد بالفحيحيل .



سارة 2 : شمعنى الفحيحيل ؟؟



سارة 1: لاني احبها ونشيل السوقة الي مالها داعي ونحط مكانها هالجبل ونزين الجبال بالخضرا والورود شغل عدل والتجار والناس الي يهايطون وايد بالديرة كل واحد فيهم يدفع دم قلبه علشان يحط بيته على قمة الجبل :q



سارة 2: بس خل نكون واقعيين احنا شعب مانخلس شي بحاله النفاورة الصغيرة تعالي شوفيها بع شهر مليانة قواطي بيبسي ووصاخة ومحد يوجه عياله على التصرفات الخطأ والصح تتذكرين لمن قعدنا نحش بالولد الي قاعد يوصخ النافورة الي بكويت ماجيك ( شخباري ) وراحت سارة التنفيذية وزفته .. !! زين ماكفختها ام الولد !!



سارة 1: بعد شتسوي امه شكبرها كبر الدرام ماتعرف تعلم ولدها الصح من الغلط !! يعني مانشتري جبل ؟؟



سارة 2 : لالا خلي الجبال لاهلها احنا شعب مدمر غير معمر .!!













سارة 1 : أقولج !! دام الكويتيين يروحون لبحر وايد وبعز اليف علشان يبردون على نفسهم شوي ليش مانسوي مشاريع ترويحية حق الناس بالشاطئ ؟؟؟











سارة 2 : نبيع خمر بالشاطئ يعني ؟؟











سارة 1: شكو @@ !!!












سارة 2 : شدراني عنج تقولين ترويحية !!











سارة 1 : ياماما ترويحية غير وروحية غير !! ليش مانييب فنانيين وتشكيليين على الشاطئ اييون يسوون اشكال غريبة بالرمل والناس تقعد تطالعهم وتستانس وتصير مسابقات ومشاركات من الناس .











سارة 2 : بس الشمس راح تشويهم D:











سارة 1:انا ماقلت يروحون حزة الظهر ، ثاني شي ماكو شي اسمه مظلات ؟؟ شمسيات ؟؟ شجر يحطونهم يظللون على الناس !!











سارة 2 : ممممم فكرة عادية اهي بس تتوقعين راح يستانسون الناس فيها ؟؟











سارة 1 : والله الي خلا الناس تناقز وناسة علشان ( فوووووم ) يخليهم يستانسون على اشكال من رمل ، بس الله يستر لا اليهال يشوتون فيهم ويخربونهم .... اتوقع يسوونها عادي




سارة 1 : بما ان ديرتنا من احر المناطق بالعالم كله ، وبما ان المطر نادر ما يهل علينا ليش ما نلجأ للمطر الصناعي ؟؟

سارة 2 : لا والله !!

سارة 1 : صج والله سمعي لا تقولين ميزانية احنا ديرتنا صغيرة ماتحتاج ميزانية كبيرة علشانها ، بعدين فكري المطر راح
يسقي الزرع دام في ناس تييب لها زرع وتنساه بعد جم يوم يموت من العطش ، والمطر راح يثبت التربة ويقلل من التصحر والغبار الي كل فترة وفترة هال علينا ، غير جذي الناس راح تستاني عليه واليهال ، ويخفف من حرارة الجو .

سارة 2 : بس طبعا مو نفس المطر الرباني ..!!!؟؟

سارة 1 : أكيد بس فكري فيها ديرتنا وايد حارة والمطر الي يهل علينا شو بس له اثر ايجابي لازم نساعد الجو دامنا قاعدين نضره بهالدخان والتلوث الي حاصل ليش مانفكر بشي يفيد ديرتنا ؟







سارة 1 : ليش مانسوي غابات بمنطقة من مناطق الكويت وتكون غابات فيها شجر وايد هالشي راح يخفف من حرارة الجو والتلوث ونشم هوا منعش ونظيف .








سارة 2 : اولا جونا مايساعد وراح يذبح الشجر مشروعج فاشل !!









سارة 1 : ليش فاشل ؟؟ الفاشل الي مايجرب !!









سارة 2 : تبيني والله ادفع فلوس ووقت علشان نشوف اذا هالمشروع فاشل ولا لا ؟؟









سارة 1 : ليش مافكرتي ان في ناس تدرس نبات موجودة بالديرة ؟؟ الي خلاهم يسوون حديقة كاملة من تربة كانت متلوثة بالنفط يخليههم يسوون غابة بالديرة ، يدرسون الظروف المناسبة لهالمشروع والمكان المناسب لها وحتى لو على موضوع الشمس مومشكلة يغطونها تصير مثل المحمية النباتية بس بشكل اكبر تشكل بالنهاية غابة كبيرة حلوة تفيد بيئتنا وتحسسنا ان بيئتنا فيها شي اخضر مو كله صحرا @@ ..









سارة 2 : سارة انتي مسكينة على بالج عايشة باليايبان ولا ديرة متحضرة ، في ناس قدمت مشاريع احسن من مشاريعج محد عطاهم ويه لان حكومتنا حكومة تدير الكويت من انولدت للحين كل ماقالوا لنا مظاهر السياحة بالكويت نقول ابراح الكويت ونسكت ، علماء وباحثيين من برا اييون يعرضون لديرتج خطط تعميرية كلها تقابل بالرفض بحجة ، الميزانية كبيرة ، اذا ماحطينا هالميزانية على ديرتنا بنحطها لمنو بالله ؟









سارة 1 : قرائي الاعزاء اذا شفتوا موضوع تحلطم بدونتي ولا زف وخناف ترا كله من سارة 2 سلبية جدا هالبنت :( وتحسسني بالاحباط دايما . زين يمكن ديرة من الديار الي برا تتصرف وتسوي لنا مشروع واحد بلاش حقنا !!









سارة 2 : لا حلفي والله ، فاضيين لج الديار الي برا خلصينا يا ام التخاريف قاعدة تقرقين من اليوم شعندج !!




سارة 1 : ليش مانحط نافورة نفس الي بجدة ؟؟ عرضوا هالشي متخصصين من اليابان حق ماي الجون بالكويت وقالوا انه الحل المثالي لتنقية الماي ومنع الملوثات وتقليب الماي لان لا تنسين الحرارة عالية ببحر الكويت .

سارة 2 : زين وشنو ردوا عليهم الكويتيين ؟؟

سارة 1 : قالوا يبيلها ميزانية !!

سارة 2 : الحمدلله جاوبتي على نفسج علشان لا تقولين انا سلبية !!

سارة 1: زين ليش ؟؟ النافورة راح تكون منظرها حلو للناس ومنها تساعد مياه الكويت وتمنع التلوث .

سارة 2 : يا سارة يا خشم الفارة تبيني اذبحج ؟؟
انتي ليش موراضية تستوعبين ؟؟ عطي الحكومة مشروع مميت يموت الحياه البشرية والحيوانية والنباتية بالديرة يحطون ايدهم بيدج ويقولون توكلي على الله ، بالله احنا ويه نووي ؟؟؟ المشاكل الفتفوتة موقادرين نحلها بنتحكم بننوي ؟؟؟ ان فجرناه ترا راح نفجره على انفسنا ، أمور وقضايا تافهة بالبلد محنا قادرين نحلها والله احنا مو قد النووي ومشاكله ، مافكرتوا بماي الخليج شراح يصير فيه ؟؟ مافكرتوا بالحيوانيات الي عايشة بالبحر شذنبها ؟؟ مافكرتوا بالجو بالبر ، باهل الكويت شراح يصير فيهم ؟؟؟ نبي مشاريع تنموية ديرتنا صغيرة ، اذا ام الهيمان مجاري عفست اهلها النووي شراح يسوي فينا ؟؟؟ فكروا عدل ، لا تحلون مشكلة بمشكلة شهالتعقيييييد هذا ؟؟ @@يعني كشخة عندنا نووي؟؟؟ هذا
انتحار مو تنمية .








سارة 1 : : عندنا المدينة الترفيهية ، والشعب ومرح لاند وووو .... بس ؟؟؟

سارة 2 :هذول الكشخة والمشهورين لدى ( الكويتيين ) !!

سارة 1 : اي كشخة صلي على النبي الكويتي لي سافر برا وشاف الملاهي هناك يقعد يلعب هناك لليوم الثاني .

سارة 2 : لا تلومينه ذابحيننا بالمدرينة الترفيهية والشعب ومكالنهم غلط ولا فيهم العاب تونس نفس الخلق ،ماعليه يدفع فلوس حق وناسته برا مو مشكلة .

سارة 1: زين ليش مايسوون مدينة ملاهي كبيرة بالكويت وراقية ومتطورة اكثر ؟؟

سارة 2 : اولا احنا ماعندنا ناس تلعب بالملاهي ، واليهال يالله بعد جم سنة بيصير ريال شكبره عيب يلعب وين قاعدين ؟؟ بعدين نسيتي ان احنا ديرتنا احلا مافيها المجمعات والقعدة والقز ؟؟؟ خلاص ماله داعي مدينة ملاهي .

سارة 1 : يعني الحين اقنعتيني ؟؟

سارة 2 : بالله شسوي لج ديرة ماتعرف تخطط خليها تمشي على عماها وبنشوف شبيصير بعد مايروح النفط ، او بمعنى اصح ايي بديل النفط ، او بمعنى اصح لمنأحد يحاول ياخذ الكويت منا الله لا يقوله :) تالي بنصفق لحكومتنا الي ذبحتنا.






سارة 1 : نرجع لموضوع الجو ، ليش مانسوي اكبر شمسية بالعالم ؟؟








سارة 2 : لا والله !! احنا نسوي اكبر صمونة بالعالم ، اكبر جدر مجبوس بالعالم ، اكبر بيتزا بالعالم ، شي ينوكل يعني !!











سارة 1 : ياربي !!! ياربي !! الاكل بيروح والله بيروح ، لو سوينا هالشمسية الناس راح تستانس والكل راح يتكلم عن هالموضوع واييون اهل الديرة يقعدةت تحت الشمسية شغل عدل ، قهاوي ومقاهي ، وقواري والوضع تمام تلقين الناس بعز الظهرية قاعدين تحت المظلة مستانسين منعنشيين عالآخر .











سارة 2 : فكرة حلوة بس الميزانية @@ الميزانية مابقى منها الا ربع دينار انتي راح تفقريننا يابنية ، قعدي ببيتج احسن ولا طقي لج تذكرة وروحي برا الديرة اذا موعاجبتج يالله !!:q











سارة 1 : انتي من صجج !!؟؟؟ ( @@ ) !!!؟؟؟











سارة 2 : لا قاعدة اقلد النواب والي يطلعون يقولون برا الكويت يالله طلعوا برا !! شعور حلو وانا اطرد على كيف كيفي !!










سارة 1 : دراسات كثيرة تؤكد ان الشعاب المرجانية بالكويت راح يبقى على عمرها شوي وتروح ونقول لها باي باي احا مو كفو مناظر طبيعية ربانية .
سارة 2 : اقول !! شلونج بس ؟؟ بالله شنو هالمناظر ماشوف شي تحت الماي شنبي فيها ؟؟

سارة 1 : حرام عليكم ياناس والله بيموتون من التلوث البحري خل الناس تخفف من زبالتها ، مو كل شي تحذفونه على بحر @@ لازم نغير المثل ونقول ( جمع زبالتك وقطها بحر ) ، اي جمع زبالتك : افعل الخير والي اهو انك جمعت زبالتك ماحذفتها وقطها بحر معروفة .

سارة 2 : انتي شفيج قمتي تتحلطمين ، شتبيننا نسوي ؟؟

سارة 1 : الواحد لازم يتابع جميع الامور الي تدور بديرته ، دام الحدود مرسومة برا وبحرا حوالين ديرته يعني هالشي منا وفينا لازم نحافظ اكثر ، والمصيبة الكبرى ان الوافدين لمن يشوفون اهل الديرة جذي مو مهتميين بديرتهم تلقاهم اهم بعد مايهمهم ، اموت قهر لمن اشوف وافد بالشارع يشرب ماي ويقطه على الارض وصندوق الزبالة يمه ، بس لمن افكر فيها اقول شذنبه اهو ؟؟ دام شاف اهل الديرة مو معطيين ديرتهم اي احترام وتقدير .






سارة 1 : دائما أحط بالمقام الاول ، ان الدولة المتحضرة أساسها العلم مو النفط ولا الطاقة ، ومع الاسف العلم بالكويت موجود ولكن المتعلمين والمحبين للعلم قليلون ، فليش مانسوي مدارس ذكية ؟؟




سارة 2: وهذي شنو بعد ؟؟


سارة 1 : أنا أقول لج ، المدرسة هذي تختص بالطلبة المتفوقيين ، وعلشان ماتصير واسطات والمدرسيين الي ينجحون الطلبة بالدز تسوي هذي المدرسة اختبارات حق المتفوقيين من جميع مدارس الكويت وتختار الي نجحوا تدخلهم المدرسة هذي ، المدرسة هذي تنمي مهارات الطالب وتطور ذكائه ، بس مو بس الطالب ، حتى المدرس لازم تكون عليه شروط يعني اييبون مدرسيين شطار مو حي الله الي داش التربية علشان معاش ، ويكون معاشه اقل من معاش المدرس العادي علشان حزتها نعرف منو الي داش تدريس لله وتطوير عقول الطلبة والي داش علشان بس معاش ويكون المدرس ذكي واتوقع اكثر الي بينقبلون بهالمدرسة مدرسيين اجانب :)


سارة 2 : يحليلج والله تفكرين وايد !!


سارة 1 : الطلبة هذول لمن يتخرجون الف مبروك راح يتمنى يوظفهم علشان عقولهم المنتجة ، حزتها لي دشوا المجلس يفكرون الف مرة قب ما يتكلمون ويدرسون كل قضية من جميع النواحي السياسية والاقتصادية والاجتماعية والدينية وغيرها ، يعني يصير عقليته دبلات وأضعاف هقلية النائب اليوم ، ماراح نسمع صراخ ماراح نشوف مناقز وتكفخ ، راح نقعد نتابع الجلسة بهدوء كل واحد يعرض قضيته بتحضر وعقلانية ونقعد نضحك نشوف الفرق بين نواب الامس ونواب اليوم ، شي مفرح مبكي بصراحة ، ولا تنسين ان ممكن هالعقول راح تكون جهة ضغط على الحكومة وتحسسها بالغفلة الي كانت فيه راح نلقى ديرتنا خضرا وبحرنا ازرق يلمع ونشم هوا منعش وبيأرئش ، أحلا كلام .





سارة 2 : لحظة لحظة على هالورة قولي بعد تبين الكويتيين يسوقون قواري ؟

سارة 1 : وليش لا @@؟ ؟ سمعيني زين ، انا ماقلت يسوقون قواري بطريج الملك فهد مثلا @@ ، في شوارع معينة محتاجة لتخفيف ازمة السير فيها ، راح يخف الازدحام ثانيا حق الي يعانون من السمنة زين عليهم وتنشيط دور الرياضة في البلد ، اخيرا يخففون من الاستخدام الزايد للسيارات والتسبب بالتلوث . والله خوش فكرة ترا مو حرام ولاعيب .







سارة 2 : خل ننتقل للنقطة الي وراها .

سارة 1 : ماكو نقطة وراها اهو المفروض فيه بس تعبت من القرقة واكيد القراء لايعة جبودهم ونصهم قروا اول سطرين وقالوا ماراح تخلص فيابخت من كتب وخفف :q










ــــــــــــــــــــــــــــــــــــــــــــــــــــــــ





















مقولة اليوم :

















من لا يخشى الحقائق ، لا يخشى التفاصيل










توماس جفرسون .... الرئيس الثالث للولايات المتحدة الأمريكية







0 comments: