2011-07-30

مذكرات رمضانية !!!








في البداية كل عام والجميع بألف خير يارب وياعساه ينعاد علينا كل سنة بكل حب ومحبة وسعادة يارب ...


في كل رمضان من زمنا الدايخ تمر علينا أمور دايخة وكل سنة هالامور تدوخ اكثر واكثر ..


بصراحة كل ما فتحت موضوع نقاش الحين يكون نقاشهم جدا هادف .... !!


تدرون شنو اهو النقاش ؟


تأيدين يعرضون مسلسل ( ...... ) علشان ما اسوي لهم دعاية لانهم مو كفو !!! ولا لا ..


واعتقد ان جريدة الوطن سوت لهم خوش دعاية من خلال نشرها لاستبيان مابين مؤيد ومعارض وكتبت عنهم في اول صفحة في الجريدة ..


أنا بصراحة الاجابة دائما تكون مني .. اني أؤيد ان الناس تسكر التلفزيون وتقعد تجتمع برمضان جمعة حلوة .. افضل من متابعة هذي المسلسلات الي ماتدل الا على رداءة الاعلام وعدم احترامه لصيامنا في هذا الشهر الكريم ..


وعلى رداءة الممثلين الي ما يبدعون الا حق رمضان !!!


أنا مايهمني البنات شيسوون بالمدارس ولا يهمني مشاكل البيوت الي بالناس مكفيها .. الي بعرفه ليش واقعنا الفاسد ما يتم عرضه الا برمضان ؟؟


جم رمضان بالسنة ؟؟ وهل راح نعيش كل رمضان ؟؟؟






حاولت أتذكر رمضان أول !!! صج انا للحين صغيرة ورمضان القديم احلا من رمضان قبل 15 سنة ...

أتذكر مسلسل واحد ينعرض بالتلفزيون وبعد الفطور يحطون لنا مسلسل كارتوني .. وماكو شي مخل للاداب ولا استعراض اجسام واشكال .


كنا قبل الفطور نروح للجيران نوزع الهريس والجريش !!!


أنا آسفة ما أذكر وايد اشياء بس اذكر كنا بالقرقيعان نروح نزور عمتي الله يرحمها ونقرقع عندها ... كانت تملي البيت قرقيعان ونغني مستانسين ..


القرقيعان كان كله حب وان لقينا حلاوة وحدة نتهاوش عليها ..!!


كنا بعد الفطور نبخر البيت !! وننطر قبل صلاة التراويح نتوضى ونروح للمسجد مشي !! نخلص صلاة التراويح أمر الفرع أييب حلاو واكل وانا رادة بالطريج !!


كان رمضان بسيط مافي حريم يقطون فلوس بالهبل علشان بنتها تلبس احلا لبس قرقيعان .. ومنافسة منو الي قرقيعان عيالها أحلا .. !!!


في أشياء كثيرة مع الاسف ما أذكرها بس كان رمضان له طعم .. طعم حلو جدا !!!!!


رمضان اليوم طعمه تلفزيون @@



متى راح يحترمون رمضان ؟؟@@





.



.



.



ـــــــــــــــــــــــــ


مقولة اليوم :






الحكومة ليست سلطة على الناس ، ولكنها سلطة لخدمة الناس ، لذلك فان مقياس نجاح الحكومة هو رضا المتعاملين ...


محمد بن راشد آل مكتوم ...... سياسي اماراتي وحاكم إمارة دبي

14 comments:

miya يقول...

فعلاااا والله صادقة .. بس انتو بالكويت عندكم قناة جدا محترمة اسمها البوادي .. اتابع فيها برنامج الفنون فنون واي وثائقي يشدني.
اما بالنسبة لرمضان السنة هذي اعتزال بإذن الواحد الاحد واتابع يوتيوب السعودية لو حينزلوا حلقات في رمضان افضل بكثيير من المسخرة اللي بيجيبوهاالتلفزيون في الشهر دا.

رمضان مبارك عليكي وعلى امة محمد اجمعين.

AbEeR يقول...

يا حلاة رمضان قبل ويا زين ايام اول برمضان و غيره
الحين الزمن تغير واتجاه الاعلام تغير بعد
وللأسف هالتغير صار للأسوأ مو للأحسن
وعن تصويت المسلسل كنت من اللي صوتوا بـ لا
لكن اللي عرفته انه هالمسلسل ما راح ينعرض بس بفترة رمضان
وبعد رمضان بيعرضونه
بصراحه مادري ليش وعلى شنو بيعرضون جذي مسلسلات
القصد منها تشويه صورة البنت الكويتيه عند الدول الثانيه ولا شنوو !!!

طموحة مملوحة يقول...

miya

فديتج انا ماطالع تلفزيونات وايد والله بس حتى لو طالعت اعلق واقوم ...

كل عام وانتي والسعودية وكل ديار المسلمين بخير

طموحة مملوحة يقول...

عبورة


تذكرين عبدالله البري والبحري ؟؟ لوووول جن كانوا يعرضونه برمضان مو ؟

والله بصراحة اذا ماعرضته الوطن اكيد بتعرضه قناة ثانية ماشاء الله كل القنوات موجودة بوقت واحد يعني بيشوفون بيشوفون ...

وبالله شناطرة من ناس تمثل علشان فلوس وناس تبدع علشان الفلوس وتنتج علشان الفلوس تبينهم يطبلون لبنت الكويت ويعرضون صورتها المشرفة ؟؟ لا طبعا بيحطون اقبح الصور .. واقذر الصور الي تمثل البنت الكويتية .. ويليت بوقت سنع لا ( برمضان ) ... ودايم اقول ماتشرفني ممثلة ياية من برا تسوي نفسها كويتية وتتكلم عن بنات الكويت ... مايوصلون مواصيل البنت الكويتية :)

كويــتي لايــعه كبــده يقول...

ان كان مستوى رضاء المتعاملين هو مقياس نجاح الحكومة فإن حكومتنا فاااشلة.. ولا مفاجأة هنا

كل عام وانت بخير
ومبارك عليك الشهر

طموحة مملوحة يقول...

معاك حق ....

وانت بخير وبصحة وسلامة

عقد الجمان يقول...

حبيبتي :
المسألة ليست استعراض وكسب أموال فقط ..
المسألة مسألة عقيدة وإيمان بعقائدهم والسعي في إنجاز واجباتهم المقدسة إن صح التعبير ..
الإعلام حرب فكرية بحتة ..
واستغلالها ليس أمراً عادياً ولا يقع إلا في أيدي أمينة إئتمنها الغرب على عقولنا وديننا ..
ولو قرأتي في الحروب الفكرية المقامة على العقول العربية لعلمتي حقاً أننا في مواجهة عقائدة ناقصة يريدون أن ينقصونا بنقصهم ..
والمشكلة أن تربة العقل العربي خصبة تتقبل أي فكرة وتسلم بها كقيمة صحيحة لا تقبل النقد ..
ولذا صار إعلامنا يحاكي واقعنا ويؤيد ضعفنا ويزيد خدرنا و(دوختنا) ويبارك فيه بما يضيف ..
ونحن .... وغينا ساهون والله المستعان
ورمضان الفرصة الكبرى للفوز نخسرها من أجل لا شيء

AbEeR يقول...

طموحه :~
وييي شخباري .. شذكرج فيه
اي چنه كان ينعرض برمضان .. والله خوش مسلسل كان ومغامراتهم حلووه تخلي الواحد وده الحلقه ما تخلص ^_*

ومعاج حق بخصوص المسلسل .. مو ضارهم شي اهما واهم شي عندهم الماده
مالهم شغل لا بتشويه صورة البنت الكويتيه ولا بغيره دام اغلبهم مو كويتيات

مبدعه يقول...

اولا الشهر مبارك عليك

ثانيا اشوفك متشائمة بزيادة شوي

عادي المسلسلات تعطي نكهة حلوة لرمضان

بس اكيد ما تكوون طول الوقت انا راح اعطيها ساعتين من وقتي بس


وبالعكس احس كل سنة رمضان احلا من اللي قبله بالنسبة لي لاني اصير اعرف كيف استفيد منه بشكل افضل من العام اللي قبله

بس اللي قهرني فوازير مريام دعايتها رقص في رقص حراااام

واكيد اللي ما يعجبني ما راح اشوفه

وشكرا

مبدعه يقول...

ونسيت اقول بعد

ان رمضان بعد يبدع لنا ببرامج روعه
مثل برامج طارق السويدان علمتني الحياة

وبرنامج مشاري الخراز وبرنامج خواطر وحجر الزاوية

والاعلام مثل ما فيه جزء منحط فيه جزء راااقي ويستحق اعطيه من وقتي

طموحة مملوحة يقول...

عقد الجمان

ارفع القبعة اعجابا بتعليقك الرائع ... 100% كلام صحيح

طموحة مملوحة يقول...

عبورة

تدرين على ايامها كنت اقعد فوق الغنفة واسوي نفسي اسبح مثلهم انا واختي كنا مغامرات وكان هادف بصراحة .... اييييييه والله ايام بريئة لوول

طموحة مملوحة يقول...

مبدعة

والله ميريام وحليمة قبلها استعرضوا رقصوا حرقوا نفسكم بالطقاق بس مو برمضان .. انتي ماتدرين تحسين ان هالمسلسلات عادية بس اهي تحاكي عقلج الباطن باشياء ثانية .. وكل سنة عن سنة يتفصخون اكثر وصارت منافسة :)

وعلى البرامج الي ذكرتيها طارق السويدان عجيب ببرامجه واشرطته وكتبه طبيعي الله يبارك له يارب ومحمد العوضي بعد احس حتى مواضيعه قبل مششوقة كنت اتضايق لي خلص البرنامج قبل الفطور ... الله يكثر من امثالهم يارب

طموحة مملوحة يقول...

مبدعة

والله ميريام وحليمة قبلها استعرضوا رقصوا حرقوا نفسكم بالطقاق بس مو برمضان .. انتي ماتدرين تحسين ان هالمسلسلات عادية بس اهي تحاكي عقلج الباطن باشياء ثانية .. وكل سنة عن سنة يتفصخون اكثر وصارت منافسة :)

وعلى البرامج الي ذكرتيها طارق السويدان عجيب ببرامجه واشرطته وكتبه طبيعي الله يبارك له يارب ومحمد العوضي بعد احس حتى مواضيعه قبل مششوقة كنت اتضايق لي خلص البرنامج قبل الفطور ... الله يكثر من امثالهم يارب