2011-09-12

وزارة التربية و( التعليب ) !!












للأسف الشديد التعليم بالكويت من حال ردي لأردى ... والمصيبة العظمى عسى ماقدمنا بالديوان قطونا تربية ... اذا في نسبة مدرسين قليلة مو معناها تحطون كل من تخرج يصير مدرس ... !!!! لأن جد مصختها وزارة التربية عسى ما يا وزير ماعدل المدرسيين التافهييين الي مايراعون الله ( إلا من رحم ربي ) وطبعا النسبة القليلة الي داشيين يردسون بذمة وضمير







الحين الموقف الي يبط الجبد ، اني كنت ادرس ولد أخوي علوم عليه دور ثاني ، ودرسته الجيولوجيا بضمير خليت المعلومة ماتطلع من راسه ، سألته اليوم شسوى طبعا كالعادة بكل المدارس .... (( الأستاذ غششنا الأمتحان كله )) !!! الأستاذ عباله انه علشان استاذ فهو فاهم حده يعني الأساتذة كلش مافيهم نسبة غباء ، اعذروني اذا غلطت لأن جد فوق ما الموضوع يبط الجبد كل سنة يغششون والطلبة ينجحون بدون مجهود وتعب.....







قال لي : عمتي انتي قلتي لي ان نسبة الصخور النارية بالارض نسبتها 95% انا حطيت صح !! ياني إستاذ مراقب قال لا غلط الصخور الرسوبية الي نسبتها 95% حط غلط ....







الحيين يعني 6 سنين وانا متعمقة بهالعلم والكتاب ذكر هالمعلومة ايي هالمدرس ويعمم على الطلبة يحطون اجابة غلط ؟؟؟؟ وبعد الامتحان يايهم استاذ ثاني يقول شكو اصلا الاجابة صح ..!!!!! الحييين بالله هذا تعليم ؟؟؟





المدرسييين بالكويت شاطرين بشغلة وحدة بس ... بس شغلة وحدة يتغلبون فيها على كل مدرسيين العالم ، لمن تيي السالفة بالمعاش والفلوس يطلعون الفلس الواحد من العين ...!!!!





بس الطلبة بالطقاق عنه مافهم يتخرجون ( حمييير ) من مدارس الكويت طبعا محد هامه ... المهم الجيل يكبر الممية بحلجه والآي باد بيده ، ولي كبر طقا له شهادة بجم دينار وخذا اعلا المناصب !!!!!!!!





موقف يبط الجبد ويغث بصراحة ، أنا جد لاعت جبدي يطلعون اعتصامات ومطالبات ومخليييين طلبتنا يتعلمون علوم تافهة بايخة وكلها غلط .. طبعا مو من الكتاب ... من حضرات المدرسييين !!!!







أنا أقول لو تردون لهم مدرسيين المصريين والاردنييين والله أبرك الي يايين من برا ويراعون الطالب الي جدامهم انه يتعلم ، بالله احنا نبي احد يعلم مدرسيينا علشان نعلم الطلبة ...!!!! وانا ماتحجيت من هالموقف هذا بس لأنه يتكرر لدرجة ان الي عليهم دور ثاني مايدرسون تحت حجة ( الأساتذة راح يغششونا )





وزارة فاشلة .... تعليم فاشل ... نظام فاشل ... مدرسيين فاشليين ... طلبة فاشليين





اذا الطالب ماشال نفسه ولا اهله شالوه ضاع من الاسف الشديد !!!









مواطنة مقهورة





4 comments:

نون النساء يقول...

لا تشوفين البراشيم والقصاصات والمصغرات
جدام الفصول عقب الإمتحانات
الممر يصير أبيض من كثر الورق
وآخر شي متفوقين


عشان جذي غصت الكليات وفاضت بالطلبة
ونسب مرتفعة بعد


ولا شلوووووووون وحده نسبتها93 بس ب12
تسقط بإمتحان قدرات الجامعة

مو راضية تركب عندي معناتها السالفة مادخل فيها الكتاب والدراسه :)

طموحة مملوحة يقول...

نون النسوة


بايام الجامعة ممكن الدكتور يعدي للطالب لاسباب معينة ماعليه المهم الموضوع بيد الدكتور ، عكس المدارس مجال الابداع معدوم ،، انا الي باط جبدي ولد اخوي زفيته قلت له اذا عندك معلومة واثق فيها لا تغيرها كلش جان يقول لي الاستاذ وقف على راسه يقول له امسحها يالله غلط هذي امسحها ... والله حدي منقهرة من هالسالفة ذكرتني بالثانوي مرة عاقبتني مدرسة لاني قلت لها ان حل المسألة الي كتبتها غير صحيحة وعطيتها الحل الصحيح هاشوتني وهزأتني جدام الطالبات تخيلي ولمن وقفت بنص المسألة ماقدرت تكملها جان تقول اي طريقة سارة اهي الصح ... عقب شنو عقب ما تهزأت على ايدها ؟@@
لايلومون الطالب اذا تخرج غبي .. نظام التربية احفظ صم ولا تناقش

Seema* يقول...

الظاهر كل شخص فينا عنده موقف مشابه مر فيه..
الله المستعان!

مالك الأسلمي يقول...

المسألة أكبر من المدرس، النظام المتَّبع العجوز، والروتينية التراكمية الميتة، والمزاجية في تقييم المعلمين، وتسخيف ومحاربة أي جهد ابداعي لغرض (لا تفتح العيون علينا خلنا نايمين)، وعدم وجود قانون واضح وصريح يحارب الواسطة في النجاح ويحارب الغش ويحارب اللي يعبدون الغياب والطبيات ويقدسونها.

التعليم هني يبيله تربوي درس ابتدائي وصعد للمتوسط وصعد للثانوي ومسك أعمال ادارية كم سنة، تسلم له الوزارة ويعطى الضو الأخضر لنسف التعليم من أساساته وبناءه من جديد على أسس صحيحة تواكب العصر، أما الشلة اللي ما تعرف تستخدم الووردMicrosoft Word والتعليم عندهم حشو ورق ونسب نجاح، ترى هم مستانسين إن نسب النجاح بالثانوية مرتفعة ولايدرون إنها كلها بالغش الا من رحم ربي، هذي الشلة اللي تعتبر (وضع المنهج بفلاش ميموري) تطور وإدخال للتقنية بالتعليم هههههه شر البلية ما يضحك، هالشلة اغسلي ايدج منهم، وين البرمجيات التعليمية وين القنوات التلفزيونية اللي تستقطب الطلبة وتحببهم بالعلم ليش ما يسوون برنامج مثل (برنامج المناهل) الأردني القديم اللي مايعرفه يشوفه بيوتيوب صح إنه بيكلفهم مادياً لكن بيكون له عائد على جيل طلابي كامل.

الطالب ضحية والمعلم أيضاً ضحية مو ذنب المعلم المجتهد إن الوزارة ما تعاقب وتطرد المعلم الخامل. ولا يقولج في معلم طق مدير مدرسة عاقبوه بخصم ثلاث أيام ههههههه <-- ترى مو نكته

اكتفي